唔知大家有冇發現 Facebook 最近除咗有愈來愈多直播同影片 Post 之外，最近仲興起一樣嘢－直播投票（Live Polling）呢？其實自從 Facebook 出咗 reactions 之後，已經有好多人用嚟做投票 呃 like，期望得到更多大家嘅 feedback，而最新嘅 Live Poll 就有埋「即時點票顯示版」功能，畀用家睇到幾多人投咗票畀邊個。
港女其實第一眼見到 Live Polling 係覺得幾新鮮嘅，但認真，有幾多人真係會撳入去睇個 Live 先？
原因之一：哪有 data？
我估大家或多或少都知道港女成日都爆 data，睇片呢啲高消費活動，港女係唔會亂嚟，更何況係 Live Poll 呢啲無內容嘅活動？撳個制就走啦，仲睇咩？
原因之二：都唔知投嚟做乜
港女發現好多投票都係亂嚟。例如下圖，喂阿哥，星座有 12 個，你畀得 5 個我揀做乜？同埋，啲咁無聊嘅題目使唔使做到咁大，要 Live Poll 咁誇張？建議各位 Facebook Admin，唔好為咗玩而玩，無錯你咁做可能吸到一萬幾千個 reactions，但除咗自我感覺良好之外，港女諗唔到有咩意義。
相關文章:
Facebook 關鍵數據改為觀看次數 取代原先的曝光數 澳洲禁 16 歲以下少年使用社交平台 社交媒體需驗證用戶年齡 Meta 或將開發 AI 搜尋引擎 減少依賴 Google、微軟
Live Poll 點用先好？
Live Poll 其實一啲都唔難做，網上就有好多人一個個步驟教你，Code 都寫好晒，要做話咁易。如果大家有興趣了解，可以去 Google Search 「直播投票」，港女就唔貼 Link 畀大家喇。但港女覺得如果你想做 Live Poll，首先要有一定 Fanbase，冇返咁上下多嘅觀眾，投來投去得幾丁友，其實嘥氣。另外，定題目及設計選項嗰陣要諗埋 follow-up actions。
港女亂作：例如你開 Live 去試一間餐廳，入面你篩選咗 5 款食物，你畀大家限時投票揀食邊樣，如果得票超過幾多，就會落 order。咁當然，你 set 到票數好低就可以 5 款都叫晒啦。
又或者，你係一個時下當紅嘅「KOL」，要去海洋公園玩哈囉喂，但又冇時間排咁多條隊，你又可以開個 Live 出嚟，一路同大家吹水，一路等大家投票玩邊幾個鬼屋。
食完玩完之後，仲可以寫返篇 Blog / Status 講下「評測」咁，當晒成個 Campaign 咁做，咪睇落完整啲囉。
留名等睇關公出動
其實呢啲花臣都係 Marketing 手段，目的都係 呃 Like 吸引大家注意，但正所謂「多隻香爐多隻鬼」，不當利用隨時變關公災難。語重心長嘅港女都係嗰句啦：大家玩時玩，小心玩出火啊?。
相關文章:
Facebook 關鍵數據改為觀看次數 取代原先的曝光數 澳洲禁 16 歲以下少年使用社交平台 社交媒體需驗證用戶年齡 Meta 或將開發 AI 搜尋引擎 減少依賴 Google、微軟
分享到 :
最新影片
