趁著英鎊大跌，唔知大家有冇打算乘機執筍貨呢？其實要執筍貨，都唔一定要搭飛機去英國買，係香港坐定定係電腦前面一樣買得到，隨時仲平過港行！而家就教教各位 unwire.hk 讀者點樣在英國網購站執筍貨啦。
英國網購 3 大類
其實要在英國進行網購，一般都有 3 大種類的網購店，現在就為各位 unwire.hk 讀者逐一介紹啦。
一）季節優惠執平貨
第一類就是一般的商店，有些是百貨公司，有些是品牌直營的專門網購店，更有些是專做網購生意的店舖。其實網購店都有一個特色，就是每季不定時都會有限時限刻的季節或節日優惠，以前就話英鎊貴到成 14 個幾港紙對 1 蚊英鎊唔抵買，但而家就算未跌破十算都挨近十，加上季節 / 節日優惠隨時來個七折、六折甚至半價，就算店家沒有提供國際付運，找集運運回香港，都隨時抵過香港買同一件產品！
二）可寄香港仲幫你搞退稅
有些較大型的店舖，例如：百貨公司、專做網購的網上百貨等，都有機會為部分商店提供付運香港服務，更甚者有些商店無論大家買幾多東西都好，都是劃一價錢付運到香港！例如：Harrods 就是一個最佳例子，無論買幾多都好，都是劃一 25 蚊英鎊運費，加埋上文提及的季節 / 節日優惠，做埋會員仲有時可用 Promotion Code 再平啲，咁樣夾埋幾個朋友一齊「濕平」，好大機會仲平過係香港平港行架，而且點計都好似穩陣過集運，話哂官方服務嘛！仲有值得一提的是，有些這類網購店，甚至會有可能會為你提供自動退稅服務，只要各位 unwire.hk 讀者選好產品，到 Checkout / Shopping Cart 中選擇香港為付運點，系統就會自動幫你退稅，又可以再慳多啲，正呀！
三）買夠數即免運費送香港
筆者本來以為只有上面兩種網購店優惠，誰不知再找找資料，發現有些店舖只要大家買滿一定金額的產品，就可以完全免運費寄番來香港，真係抵到爛！就好似專賣名牌產品的英國網站 Matchesfashion，只要買滿 HK$2,500 就已經可以免運費寄番香港，計埋英鎊跌價後，隨時買歉鞋或者買個名牌手袋，都可能比在香港相關的專門店平好多。又係個句：夾埋幾個朋友一齊掃貨，仲要係名牌，幾千蚊個關口，要湊夠數其實不難。不過要留意的是，這類網站似乎以時裝類為主，希望遲啲會有賣其他種類產品的網站有呢種服務啦！
要執平貨，先做功課
如果大家要真係執到平貨，真係要先做好功課先至好入手，唔係隨時香港做緊大減價，買番來無得即時著 / 玩，仲要貴過香港就唔好啦！究竟要做好咩功課？而家就等 Edward 教教大家啦！
一）Join 定會員隨時拿 Code
其實無論是本地定係外國主力做網購的網站，都好興不定時玩快閃或季節 / 節日優惠，有些會公開給全地球人 / 英國人（英國地址限定）購買，有些就只是「Members Only」。所以如果你的心儀品牌沒有限制做會員的一定要有英國地址，不妨先去官網或相關網頁做定會員，當一有優惠時就會即時收到電郵通知 Promotion Code 是甚麼，要隨時網購筍貨就無難度啦。
二）上官網 / 上格價網 / 去門市睇價
另外不少品牌或產品，在英國及香港均有售，只是因為最近英鎊跌得太厲害，所以才有望比香港行貨平。當然，香港代理 / 品牌方面都唔蠢，為了避免各位 unwire.hk 讀者一窩蜂撲去買英國水貨，隨時可能會在這陣子推出大劈價優惠，兌番港紙價位隨時與英國方面標價十分接近。除非大家購買的店舖提供國際免運費啦，否則事先上香港官網、網上一些格價網、甚至到該品牌或百貨公司門市睇睇再落手，咁就唔會買貴貨俾人笑到面黃啦。
三）搵間平 + 方便集運公司
當然，該網購店有直接付運到香港的服務自然好啦，但有些網購店可能未必有提供這項服務，不過如果大家睇睇付運細則，如果該店舖有提供免費本地付運的話，其實都可以考慮找集運公司幫手，將貨品運送到該集運公司在英國的集運站，再轉送到香港。這類英國集運公司現在已有不少，未來隨著愈來愈多人到英國網購肯定會愈來愈多，但找這類集運公司各位 unwire.hk 讀者有兩點要留意：首先是付運的產品（連包裝盒）最好不要太大，至於規格就因公司而異，建議使用服務前先睇清楚計算準則，格格價才選擇合適公司，咁就最慳到錢；其次就是最好找自取點比較接近你家的公司，尤其是如果要購買較大件的物件，或一次過掃很多東西回來，如果你沒有車的話，要拿回家都不是易事。如果自取點較近家，自然就方便得多啦。
四）申請定張網購專用信用卡
要玩網購，自然不能少了用信用卡。當然，大家用什麼銀行的什麼卡都無所謂，但如果要著數拿盡，最好就申請一些網購寧舍多優惠的信用卡啦，尤其是有些卡種，在網上購物時會提供額外數個 % 的現金回贈，如果大家是瘋狂「濕平」的話，隨時慳得更多！值得一提的是，有些卡種在迎新期間網上購物簽帳，隨時會比平時多享數倍的現金回贈，夾啱時間申請到即刻「濕平」，就筍上加筍囉！
五) 記得用英鎊結帳
有唔少較大規模的網站，為了照顧香港人的需要，都會提供香港貨幣為單位的產品售價，但要小心的是，有時如果結帳時用港紙，就失去了英鎊大跌買筍貨的優勢了。所以大家還是辛苦一點，用英鎊睇售價，然後結帳時用英鎊結算，咁就萬無一失了。
六）如買電子產品一般無保養
最後一項提提大家，如果大家打算網購電子產品的話就要留意了，因為從英國網購產品到香港使用，一般都會稱為「水貨」，而這類產品大部分公司都不提供本地保養服務的（只有少部分公司，例如：Apple 有為大部分產品提供國際保養）。所以購買前，要睇清楚該品牌有否為產品提供國際保養，否則一旦出現問題或者日後損壞需要維修，就可能要寄回英國才能做到了。
網購必買 10 大筍貨
好了，講完一大堆教學，究竟英國又有什麼筍價貨讓大家掃？而家就等 Edward 同大家分享 10 大必入筍貨啦！
1. 愛廚房人士必搶！Le Creuset 鑄鐵鍋sss
這個品牌的煮食餐具相信大家，尤其是女士們一定不會感到陌生。事實上這個由法國製造的鑄鐵鍋，無論質量及口啤都有一定保證。筆者就發現在英國著名百貨公司 Harrods 就正在做大特價，最平的圓煲都只是 115 英鎊（約 HK$1,162），同一尺寸比香港近似款式（香港款式為黑色膠煲蓋，而英國款式為銀色金屬煲蓋，兩款均能用於煮食爐及焗爐）平足足一半以上！而重點是：無論各位 unwire.hk 讀者買幾多，Harrods 都係收大家 25 英鎊運費，仲要玩空運，今日訂隨時聽日就收到，仲唔係掃煲良機？
折扣率（連運費）：半價以上！
抵買度：*****（5 * 為最高）
傳送門：http://www.harrods.com/brand/le-creuset/view-all
2. 刷番棚靚牙！Philips Sonicare DiamondClean 聲波震動牙刷
牙刷相信各位 wire 民每日都會最少用兩次吧？而懶人像筆者的話，用電動牙刷就最方便。Philips 之前有推出過 Sonicare DiamondClean 這款聲波震動牙刷，最近就在英國 Amazon 進行優惠，原價 250 磅淨牙刷（白色版本），而家 99.99 磅（約 HK$1,011）就可入手，除稅後更平到只係 83.33 英鎊（約 HK$842），而香港而家仲係賣緊 $1,900 架，就算計埋運費都平差唔多一半！另外，如果想連 4 個刷頭一齊買，除稅後都只係 116.86 英鎊（約 HK$1,222），想有棚靚牙就快啲買啦！
折扣率（連運費）：接近半價
抵買度：*****（5 * 為最高）
傳送門：https://www.amazon.co.uk/gp/product/B00R2SCHH2/ref=s9_simh_gw_g364_i1_r?ie=UTF8&fpl=fresh&pf_rd_m=A3P5ROKL5A1OLE&pf_rd_s=desktop-1&pf_rd_r=YGFG14DZRKJSRYNZRRE2&pf_rd_t=36701&pf_rd_p=26de8ef0-2ad7-412c-8634-6cd03b7b73e2&pf_rd_i=desktop
3. 潮人部屋必備！Dyson V6 Fluffy 無線吸塵機
另一項備受不少港人追捧的潮牌，就是 Dyson。當然，最新推出的風筒英國就仍然未開售，但他們的旗艦，在香港也有售的 V6 Fluffy 無線吸塵機，香港售價高達 $7,280，但英國 Harrods 就將它由原價 399 英鎊減至只售 359 英鎊（約 HK$3,628），足足平了一半！當然，大家要記著這項優惠只是英國限定，不會寄到其他地址的，但就算計番集運，應該都無香港賣街價咁貴，都算抵！
折扣率（連運費）：約七五折
抵買度：***（5 * 為最高）
傳送門：http://www.harrods.com/product/v6-fluffy-cordless-vacuum-cleaner/dyson/000000000004918917
4. 7k 多啲買超高清輕薄 NB！HP ENVY 13 手提電腦
既然 unwire 是科技網站，就多講少系抵買的電子產品啦。筆者就在英國網舖店舖 Currys 發現這部 HP ENVY 13 手提電腦，採用 Intel Core i5-6200U 處理器、8GB RAM、256GB SSD 等，亦已預載 Windows 10 作業系統，重點是 13.3 吋熒幕解像度高達 3,200 x 1,800，但重量只是 1.36kg！雖然並非最新 model，但勝在夠輕夠型，現時不少腦場商舖賣緊的行貨都近 9 千，但 Currys 就只售 648.97 英鎊（約 HK$6,559），就算計埋搵集運送來香港，應該都會比在香港買行貨平，都抵玩架！
折扣率（連運費）：約八五折
抵買度：**（5 * 為最高）
傳送門：http://www.currys.co.uk/gbuk/computing/laptops/laptops/hp-envy-13-d061sa-13-3-laptop-aluminium-10137769-pdt.html
5. 名牌時裝集中營！Matchesfashion
如果大家想買名牌精品，其實都可以考慮前文提及的 Matchesfashion 這間網購商店，他們主要售賣各名牌手袋、時裝等，品牌包括：Gucci、Chloé、Saint Laurent、D&G 等，最重要是買滿 HK$2,500 已可免費送貨到香港，買這些名牌產品，一個人買兩、三件都應該夠數。不過記著結帳時要在 code 一欄輸入「FREESHIP」才可享此優惠哦！
折扣率（連運費）：最高三折
抵買度：*****（5 * 為最高）
傳送門（男裝）：http://www.matchesfashion.com/intl/mens/apac-sale
傳送門（女裝）：http://www.matchesfashion.com/intl/womens/apac-sale
6. 平買花花袋！Cath Kidston
唔知有幾多女 wire 民喜歡 Cath Kidston 這個英國品牌呢？他們最吸引大家的，一般都唔係服裝，而是靚靚花花袋。好似有啲 Tablet 袋仔，原價 30 英鎊，而家怒劈到除稅後只賣 10 英鎊唔洗（約 HK$84），相比香港未必有這些款式，索價又達到近 HK$300，真係好抵！而且 Cath Kidston 同 Harrods 一樣，收劃一運費，運去他們列表中的任一國家都是收 20 英鎊運費，而且全部自動退稅，如果買得多自然有 so！不過嘛……大家要留意的是，他們列表中是沒有香港的，最接近的是中國或者台灣，睇睇大家會不會去中國或者台灣一轉短旅行，順便收件；又或者找集運公司幫手了。
折扣率（連運費）：最高半價
抵買度：****（5 * 為最高）
傳送門：https://www.cathkidston.com/outlet/further-markdowns/list?
7. 掃衫褲鞋襪錶係時機！ASOS 低至 3 折
如果大家想買平衫，又唔想出街同人鬥迫，ASOS 這間英國網購站就正進行大清貨，唔少商店都做緊半價甚至三折優惠！佢仲要唔止有自家 ASOS 品牌，仲有其他大牌子的衫褲鞋襪，包括：Nike、Adidas、A&F、Converse、Dr Martens、Ted Baker 等，全部都做緊特價，最正的就是如果大家唔介意等耐少少 14 日先送到香港，只要買 HK$100 就已經可享免費付運；如果買夠 HK$800，在結帳時在 code 欄輸入「HK7DAYSHIP」，仲可以享有 7 日快速付運免運費！要買定衫等換季，係時候了！
折扣率（連運費）：最高三折
抵買度：*****（5 * 為最高）
傳送門：http://www.asos.com/
8. 必掃女士平衫！TOPSHOP
另一間專賣 fast fashion，在香港亦有門市的英國店舖 TOPSHOP，最近在英國官網同樣做緊半價大優惠，筆者睇過一件黑白間條連身裙由 29 英鎊怒劈到只賣 5 英鎊（約 HK$51），普通一件粉紅 Tee 又係 5 英鎊（原價 14 英鎊），真係平到笑！仲要由外到內都有，sexy 底底都大把妳揀！另外大家買滿 100 英鎊（約 HK$1,011）甚至唔洗俾運費直送香港！咁抵，大家仲洗乜去 X 寶買衫換季呢，係咪？
折扣率（連運費）：最高半價
抵買度：****（5 * 為最高）
傳送門：http://www.topshop.com/
9. 旅行用品補給站！Mankind
就來暑假相信唔少人都 plan 緊去邊旅行吧？其實去到外國住酒店，一般都會有齊沖涼液洗頭水等等，但問題是未必個個都 like 用酒店提供的這些用品。最近 Mankind 這個英國網購站就正進行旅行用品大優惠，只要在結帳時輸入 TRAVEL 這個 code，就可享 82 折。而且筆者發覺他們提供的旅行用品都幾抵買，一支 150ml 洗面用的都只是 4.49 英鎊（約 HK$45），超抵！最重要係，各位 unwire.hk 讀者無論買幾多，香港都係一律免運費，睇來大家可以去買定些旅行用品，為外遊做好準備了！提提大家，其實呢個網站前排先做緊在香港死都唔減價的 Aesop 香薰用品優惠，唔係剩係得旅行用品架，得閒睇睇隨時會跌錢，小心！小心！
折扣率（連運費）：八二折
抵買度：***（5 * 為最高）
傳送門：http://www.mankind.co.uk/home.dept
10. 球迷至愛！上網合法買英超波飛
相信不少 wire 民對英國足球都有一定情意結吧？最近英鎊大跌，大家有否心思思想去現場觀戰？當然各大英超球會波飛是沒有什麼可能減價的（加價就有！！），但英鎊大跌亦令大家買飛成本大減。球季還有一個月左右才開始，現在各大球會都已經開始預售門票，但如果要在官方渠道買飛，要不就 join 會員，另一選擇就是購買球會官方合作伙伴提供的球票 + 住宿 package。以筆者鍾情的利物浦睇，現時如果要買定聖誕節的門票仲有大把位，想坐 Long Side 中線較低位置無問題，想坐死忠球迷代表的 The Kop 看台都仲有大把飛買到，大家心動吧？
傳送門：各大球會官網（自己 Google 啦！）
相片由譚小姐提供
