作為成日要出去工作的小編，手提電腦肯肯定係必備隨身利器。而作為經常外出工作兼日打萬字的 Edward，選購手提電腦的要求只有 4 項：夠輕薄、電量長、打字舒服同埋 USB 位夠用。之前一直就用緊 MBA，近排 Apple 推出了配備 Retina 熒幕的 MacBook（下稱 MBr），令我十分心動。究竟 MBr 係咪可以成功取代 MBA 在小編心目中的地位？以下就同大家分享一下：
無錯！真係好好輕！！
好了， 之前 Edward 都提過，選購手提電腦四大要點，其中一個就係要夠輕薄！拿起 MBr，第一感覺真係：「真係好好輕呀！！」作為一部 0.92kg 重量、35 – 131mm 厚度的手提電腦，同 MBA 的 1.08kg 重量、30 – 170mm 厚度比較，睇落唔係差好遠，但實際拿到上手，就真係覺得好好輕！基本上一隻手可以無難度地拎起，如果拿出街用應該可以進一步減輕負重。所以第一關：Pass！
▲同 MBA 11″（右）比較，MBr（左）明顯比較細部。
▲厚度方面，MBr（左）明顯是比 MBA 11″（右）薄，而且在最厚的位置比較更為明顯。
▲至於重量方面，MBA 11″ 已經是頗輕，不過長時間單手拎住仍然會有點兒累。
▲但 MBr 就因為重量連 1kg 都無，所以真係長時間單手拎機都唔覺有問題。
金色外表幾靚但不及太空灰
雖然外表來講，Edward 都唔係過份重視，但作為要成日拎出街工作的隨身「伴侶」，總要見得下人掛。之前用 MBA 11″ 已經覺得幾唔錯，而家 MBr 就更上一層樓，Edward 在 Apple Store 試的是金色機款，基本上由機殼到個蘋果 logo 都係採用金色設計，感覺就好似拿住舊「黃金戰士」出街咁，初睇又真係幾靚嘅，但如果拎來做工作機，就似乎太浮誇啦。如果你同 Edward 一樣，都係諗住買部 MBr 出去見客或者工作用，建議考慮買太空灰，因為低調得來灰黑色的感覺真係幾靚，拎出街感覺都 pro 啲！不過當然，顏色、設計呢樣嘢係好主觀的，建議大家上網禁制買機之前，之落舖頭睇下實機，揀啱顏色先至買，會比較穩陣。
▲金色機外表，係幾靚嘅。不過，睇得耐就會有啲「土豪」感覺囉。
▲係 MBA 上面發光的蘋果，變為 MBr 的金蘋果，真係好唔習慣……
▲連內籠鍵盤旁都係用金色，又真係幾統一。
相關文章:
【評測】M3 MacBook Air VS M2 MacBook Air 兩部點買好 + M3 新機特色試玩 iGBA 模擬器下架原因涉抄襲 Apple：複製其他開發者的模仿品 彭博：iOS 18 將推出 AI 功能 手機上直接運行不依賴雲端
鍵盤細了、淺了打字唔舒服
講完外表，Edward 的手提電腦選購元素第二頁：電量，因為只能在 Apple Store 測試，所以暫時都唔太知係咪可以用到好似官方所講的 9 小時無線上網或 10 小時的 iTunes 電影播放，不過以 Apple 的「往績」，應該都信得過嘅。至於第三項元素：鍵盤舒適度，Edward 就試過 MBA 11″ 同埋 MBr 的鍵盤，發覺 MBr 確實為了縮窄機身，因此減少了鍵盤左、右側的空位，但就加大了按鍵表面面積，如果單以按鍵大細來講，係好打咗嘅。不過打開字的人就知道，除了按鍵面積，另一項對舒適度更決定性的因素，就係鍵深。畢竟有足夠鍵深，令手指擊打按鍵時不至於好似打落木板度，而係有少少回彈力，先至會打得舒服。但在 MBr 上，唔止鍵深比 MBA 11″ 淺好多（感覺至少少了一半），而且回彈力極度不足，感覺就只係比係 iPad 熒幕上打字的感覺好少少。所以打字舒適度上，MBr：FAIL！
▲MBr 為了有效縮窄機身，所以鍵盤左、右側的空間被 cut 了很多。
▲MBr（上）就連頂部的 shortcut 按鍵都大了，比以前 MBA 11″（下）更長條形的設計更易按。
▲MBA 11″ 的按鍵採用傳統剪刀式結構，打字感覺就同 iMac 的無線鍵盤好似，鍵深足夠，回彈力亦足，長時間打字都唔會咁易累。
▲相反 MBr 採用蝶式結果，官方表示耐用度會高了，這就難以測試得到，但肯定的是，新結構下按鍵鍵深極淺，加上回彈力不足，就算面積大了，對打字舒適度都無補於事。
Force Click 查字超方便！使用需適應
以往使用 MBA 11″，TrackPad 一般都係提供二段式（觸碰及點擊）操控，變化主要在不同的 gesture 手勢。而今次 MBr，TrackPad 唔止用了全新加入 Force Touch 技術的 TrackPad，當中還加入 Taptic Engine 及力量感應器，Force Touch 可以令觸按準確度大幅提升，而 Edward 測試時確實感受到這一點，基本上在 TrackPad 任何一個位置點按，電腦都有反應，呢一點值得一讚；至於 Taptic Engine，就可以帶來觸感上的反應。根據 Apple 官網表示，當用家在 PDF 上對齊備註時，TrackPad 都會把實在的觸感回應傳到指尖；而力量感應器，就可以提供壓感感應，令用家不單可以繪圖時畫出粗幼不一的線條，更可以用 TrackPad 來簽名。不過測試時間有限，這一部分小編就未能測試得到了。
另外，全新 TrackPad 亦帶來了 Force Click 功能，由於採用了全新結構，MBr 的 TrackPad 可以提供三段式（觸碰、點擊一下及用力按下點擊）操控，前兩者因為以前的機款都有，所以 Edward 不多詳述；而最後一項「用力按下點擊」，就可以為用家提供更多 TrackPad 的操控功能，例如：當瀏覽網頁時，遇上某個外語不知道是什麼意思，只要使用觸碰功能 highlight 該字彙，然後在 highlight 位置用力按下點擊，用家會 feel 到按下兩層的感覺，然後熒幕就會彈出該字彙的翻譯及意義，對於經常要閱讀外國網站，然後將新聞意譯為中文並向 unwire 讀者們報導的 Edward 來講，以後查字典就更方便了！不過初期使用仍需要時間習慣，有時 Edward 都會遇上明明只是想點擊一下，結果按大力了變了用力按下點擊的情況。
▲傳統的 MBA 11″ TrackPad，只能提供二段式操控。
▲而在 MBr 上的 TrackPad，就能提供三段式操控。
▲Force click 功能可以在 TrackPad 設定上看得到。
▲以後查字真係方便好多。
▲中文都查得到。
▲由於是從 wikipedia 擷取資料，所以連 GTA V 的中文名都可以查得到呢！
USB Type-C 絕對是雞肋！
至於最後一點 Edward 選購手提電腦的元素，就是 USB 位要夠多，因為小編經常都要將不同裝置（例如：手機、相機、讀卡器等）與電腦接駁，MBA 11″ 只有 2 個 USB 插槽，其實都只係勉強夠用；而在 MBr 上，Apple 確實是「有夠狠」！因為他們將傳統 USB 插槽完全取走，取而代之的是全新的 USB Type-C 插槽，而且更只有 1 個！當然，全新的插槽，好處是大家為 MBr 充電時，可以好似 iPad、iPhone 的 Lightning 插頭般，唔洗理正反都插到入去；但唔好處是一次只能插「一樣嘢」，即係：大家為電腦充電時，要駁讀卡器抄相入電腦，就要拔走充電火牛；同樣大家想為手機充電，就唔可以駁 LCD 顯示器，在大熒幕上瀏覽畫面。更麻煩的是：現時絕大部分的 USB 裝置，都係用傳統的「大頭」，而非 MBr 所採用的「細頭」，結果如果要接駁舊的 USB 裝置用，就一定要買 adapter，又或者等這些配件公司推出支援 MBr USB Type-C 端子的款式，先至可以有得用，都咪話唔麻煩！
而對於 Edward 呢種鐘意駁無線 mouse、外接 2nd Mon 同埋駁手機、相機抄檔案入電腦的用家來講，唯一方法就係買機時要同時購買 adapter 線。但萬一唔記得帶呢條 adapter 線番工，咁成日就真係「楝咗係度」，唔洗做嘢；又或者要下下靠雲端或 email 傳送檔案，都真係超麻煩！所以要有足夠 USB 位呢一點，又係 FAIL！
▲MBr 採用 USB Type-C 插槽，係就話唔洗理正反都插得入，但問題市面上支援 USB Type-C 的裝置有幾多？而且成部機得一個插槽，真係好麻煩，駁得呢樣駁唔到個樣。同埋如果你身邊唔多人用 MBr，萬一唔記得帶火牛，要差電時都幾麻煩。
▲相比 MBA 11″（左）有 2 個 USB 插槽及 Mini DisplayPort 視頻輸出插槽，MBr（右）在使用上真係好唔方便（至少對於 Edward 而言）。
熒幕銳利度高視覺一流
另外，MBr 的另一大吸引點，就是它的熒幕，因為終於升級至採用 Retina 解像度：2,304 x 1,440，當瀏覽網頁或文字時，確實比只有可憐的 1,366 x 768 解像度的 MBA 好得超多！銳利度高兼且顏色自然，相信大家如果重視熒幕質素，應該會一用愛上！
▲MBr（右）採用了 Retina 熒幕，與 MBA 11″（左）相比質素真係好好多。
▲MBr 在顯示文字上，確實十分銳利。
▲相反在 MBA 11″ 的熒幕上顯示相同內容，一比之下真係高下立見！！
相關文章:
【評測】M3 MacBook Air VS M2 MacBook Air 兩部點買好 + M3 新機特色試玩 iGBA 模擬器下架原因涉抄襲 Apple：複製其他開發者的模仿品 彭博：iOS 18 將推出 AI 功能 手機上直接運行不依賴雲端
喇叭真係大聲好多！
仲有一項 MBr 相比 MBA 11″ 的一大改進，就係內置喇叭。當然，Apple 係 MBr 上，並唔係好似其他廠咁，只係加入 Dolby、咩音效強化乜乜乜，而只係將喇叭位轉移到去鍵盤正上方位置。用來睇 YouTube 片個時，雖然感覺音效都係一般，但係就一改以前 MBA 就算音量較到最大都唔係好夠聲的問題，就算 Edward 在中午時份的極嘈吵 Apple Store 內，仍然可以清晰聽到 YouTube 影片的音效。呢個簡單的改變，確實令使用感受直線上升。
▲喇叭設計係鍵盤正上方，呢個設計改動已經足夠令音量大幅提升！
總結：還是覺得你（MBA 11″ 2014）最好！
其實 Edward 覺得每個品牌推出全新系列的產品，總是有它的吸引點的。MBr 挾著最輕薄兼熒幕最高清最靚的形象示眾，確實能吸引之前本來想等 iPad Pro，又擔心無 keyboard 及 TrackPad 影響使用體驗，而且沒有電腦效能（MBr 畢竟最少都有 Intel Core M 1.1GHz 雙核心處理器、8GB DDR3 RAM 及 256GB SSD）的用家改用。不過對於像 Edward 呢種重視打字舒適度及 USB 要夠用的用家，MBr 的吸引度，始終不及效能更高（Intel Core i 處理器）、打字更舒服及最少都有 2 個 USB 插槽兼有 1 個 Mini DisplayPort 視頻輸出插槽的 MBA 11″ 吸引。所以，Edward 再三考慮下，都係打算為舊年先買的 MBA 11″ 買多兩年 Apple Care 算數，然後等下年睇下有冇 MacBook Air Retina 現身！唔知大家的選擇，又會係點呢？不妨討論一下。
售價：$9,988 起
查詢：Apple（800 908 988）
相關文章:
【評測】M3 MacBook Air VS M2 MacBook Air 兩部點買好 + M3 新機特色試玩 iGBA 模擬器下架原因涉抄襲 Apple：複製其他開發者的模仿品 彭博：iOS 18 將推出 AI 功能 手機上直接運行不依賴雲端
分享到 :
最新影片
