香港版行貨 Apple Watch Sports 版上手體驗篇

之前已經同大家分享過 Apple Watch Sports 香港行貨版的開箱，而家就等 Edward 同大家分享一下戴上手的第一體驗啦。

少少膠但接受得到

Sports 版 Apple Watch 採用了膠錶帶，本來覺得會好「膠」，但真係上到手，又唔覺得好差，始終係塑膠物料，梗係有啲膠感架啦，但又唔會係個種 cheap 膠的感覺，都算接受得到。

▲雖然係膠錶帶，但玩具感來講相比其他膠錶，小編覺得已經唔算好重。

錶身用鋁合金手感唔錯

另外，錶身採用了 7000 Series Aluminum 鋁合金物料，手感其實都唔錯，感覺就似 iPhone 銀色機背所用的物料（如果係黑色版本，會同 iPhone 太空灰版的物料近似 / 相同），所以係有啲跣手，不過隻錶咁細隻，大家就唔洗擔心好似 iPhone 咁會跣到跌落地下啦。

▲Sports 版同普通版 Apple Watch 唔同，錶玉外殼係用 7000 Series Aluminum 鋁合金物料製造，手感同 iPhone 銀色版的機殼物料差唔多。

膠錶帶幾易扣

至於膠錶帶方面，其實都幾易扣，基本上戴慣錶的小編，4、5 秒鐘左右就已經佩戴完成，完全無難度。而方法係錶玉放在手腕後，先扣上固定長度的小洞，然後將長出來的錶帶攝入長方形孔入面，就完成了，超級簡單。

▲今次 Sports 版 Apple Watch 條膠錶帶都幾易扣，一禁一攝就得，戴慣錶的小編全程唔洗 5 秒戴完。

▲上半部的錶帶，會顯示相關錶款，而 42mm 是指熒幕顯示位置的尺寸。

換錶帶無難度

今次 Apple Watch Sports 版跟錶有一條膠錶帶，但其實日後大家要因應唔同場合或服裝，其實是可以購買其他物料，包括：鋼、皮革等錶帶以作配襯。至於換錶帶的步驟亦十分簡單，只需要按一下錶帶同錶玉接口位的按鍵，然後向左或右滑出錶帶，再滑入希望換上的錶帶，當聽到輕微的「啪」一聲，就代表替換完成了。

▲換錶帶其實好簡單，只需要禁一下上圖錶玉呢個位置的制。

▲然後向左或右滑出錶帶就可以了。安裝更加簡單，滑入錶帶，當聽到輕微「啪」一聲，就完成了。

都幾輕唔覺重量

戴慣錶之人，都唔想戴住隻重錶係手，因為每次舉起手睇資料，如果錶身太重，其實都幾累。今次的 Apple Watch Sports 版，其實都幾輕，戴上手成個下午小編都唔係太覺累，大家就唔洗擔心了。

 

差電算方便一吸就得

至於充電方面，其實只要將充電頭吸附在 Apple Watch 背面就可以了，好簡單。另外，其實 Apple Watch 的火牛電壓輸出都只不過係 5V 1A，即係話只要大家帶住條充電線跟身，只要有外置充電器係身，就可以隨時為 Apple Watch 充電，唔洗用專用座，都幾方便。

 

小結：上手感覺唔錯‧之後再講功能分享

整體來講，今次的 Apple Watch Sports 版，本身係無乜期待（因為 Edward 好驚膠感好重的錶），但真係到手戴起來，其實都唔係太差，至少比唔少塑膠錶（例如：一代 Pebble Watch）好得多，感覺亦無咁玩具。當然，如果同金屬錶來比，Sports 版 Apple Watch 肯定係玩具感重啲架啦（原罪……），但如果想平平地體驗 Apple Watch 功能的話，都不失為一個好選擇。

其實之前 unwire 其他記者已經同大家分享過 Apple Watch 有咩功能，但實際生活用起來感覺又點？Edward 打算來個 48 小時連續實測（瞓覺沖涼都會戴住！），下星期初再同大家分享功能試用分享啦，想知更多就要留意相關報導啦！

分享到 :

最新影片