上回講到我依莉詩想係屋企 DIY Gel甲。經過一輪燈機既選擇，最後都係覺得 LED燈機係就係貴 D ，不過比較安全同快脆。今次我就問同事借左市面比較常見既 Depend DIY Gel甲套裝番泥測試，睇下呢部燈機會唔會有只係可以將自家品牌既甲油先照得乾既問題。
20分鐘真係做到 Gel 甲
平時放工番到屋企都成 9點幾 10點，整 Gel甲當然愈快愈好啦！比起傳統指甲油，呢套 Gel甲套裝確實比較方便，唔需要每油一層都要慢慢等佢乾。只需要跟住甲油上面既 Step，先掃一掃清潔劑，油一層底油，照燈 30秒，然後油上色油，再照燈 30秒，跟住油上面油，照燈 30秒，最後掃一掃清潔劑，讓甲面唔黏笠就 OK。如無意外，一對手 20分鐘就搞掂。當然啦，時間未計算修甲、修死皮、拆甲等前期功夫。仲有呀，如果想顏色出 D ，淺色既甲油就需要油多幾層。如果想 Keep 得耐 D，油完面油最好照 60秒，等佢乾透。所以如果想效果好，唔搞番一至兩個鐘都唔得架！
▲ Depend 套裝既 LED 燈機比較輕巧，比較窄身。對於尾指較短既小編嚟講，平放只能照到中間 3隻手指，需要用手握既方式先可以一次過照到 4隻。如果想效果好，手指公最好就分開照燈，所以需時亦相對增加。
▲ 燈機由 30粒 LED 組成，合共 6W。
▲ 照燈的時間可選擇 30秒 或 60秒，連接電源後，按一下白色圓鍵便會著燈並自動倒數， 非常方便。
甲油多色選擇
Depend 既 Gel甲油顏色選擇都幾多，有 48款不同深淺色 同 6款螢光色。而且小編同時試左用一款內地牌子既甲油同 Nailla 既三合一 Gel甲油，同樣都可以係 30秒照乾。咁係甲油既選擇又可以多好多色了。
依莉詩：「屋企都可以做 Gel 甲！」
相比去美甲店做一次淨色 Gel甲要差唔多 $200，Depend 套裝的確幾化算，而且唔難操作，新手都識用。不過要注意既係，出面既 promotion 通常都係 $499 一套，送色油同卸甲油。事實上，如果佢唔送色油，你只能油透明，而所送既卸甲油亦唔可以完全拆甲，所以最好買定 Depend 既另一支卸甲油備用。
談到甲油，小編覺得 Depend 既甲油比較稀同易控制，不過就要油多幾層。而內地牌子既甲油就有陣天拿水味，但就相對平。最後，Nailla 既三合一 Gel甲油就非常方便，唔洗好似塗 Depend 既甲油咁，要油 5個 Step，佢油一層就有同樣效果。
下一次小編會同大家分享 Nailla 既 DIY Gel甲套裝，有興趣既記得留意啊！
分享到 :
最新影片
