正所謂「休息是為了走更長的路」， KUMAMON 熊本熊喺一田嘅 IZUMI CURRY 做咗成年店長，終於決定放個長假番熊本縣休息休息，並將餐廳交由屁股圓碌碌嘅蛋黃哥主理。今日我依莉詩就同 YouTuber 柏力芝去探班，睇下一向 Hea 底嘅蛋黃哥有無搞到間餐廳一塌糊塗先！
▲ 今日喺蛋黃哥榮升店長嘅第二日，雖然喺星期一中午，但都超多人排隊呢！可見蛋黃哥嘅魅力真喺無可抵擋。
熊本熊走咗短短幾日，蛋黃哥就將 YATA gudetama café by IZUMI CURRY 佈置成黃白色，唔單止牆上貼滿佢嘅嘜頭，仲連天花、枱面、餐具都有佢嘅蹤影，誓要一改 hea 爆形象，做個勤力店長咁話啵！而最正嘅就喺張蛋蛋凳，坐墊除咗有蛋黃哥個頹樣，仲加咗句「呀！無力啦！」、「好重呀！」，聽佢咁講，真喺問你忍唔忍心坐落去！
▲ 相比起之前蛋黃哥點心，呢度嘅佈置一 D 都唔 hea！四圍都見到蛋黃哥蹤影。
▲ 餐牌同枱面都印咗廚師蛋黃哥個樣，超萌呢！
▲ 最正嘅就喺張蛋蛋凳，坐墊除咗有蛋黃哥個頹樣，仲加咗句「呀！無力啦！」，聽佢咁講，真喺問你忍唔忍心坐落去。
▲ 店內佈置精緻，仲有好多蛋黃哥 cushion hea 喺食客坐位，服侍你食飯，好體貼啊！
▲ 餐紙都有 4款，佢句 「瞓多 3分鐘～～」簡直喺我每朝心聲！
▲ 杯墊 D 抵死金句加埋佢個無力樣，真喺心都軟晒！
雖然話蛋黃哥嘅食品好易模仿，只要你買到有蛋黃哥個樣嘅米紙，再整隻蛋貼上去就搞掂。不過，今次蛋黃哥搞咗 D 新意思，除咗喺煎蛋、太陽蛋、烚蛋上加自己個樣，仲用卡紙整咗頂廚師帽同對白插喺嘢食上面，可愛到爆！而菜單亦有唔少選擇：有飯、烏冬、小食同沙律。不過就喺無甜品，鳴呀！唔制呀！
▲ 雞蛋海鮮沙律 $69
烚蛋加沙律本來就無乜特別，不過加埋中間嘅半熟蛋黃哥之後就完全唔同晒，上碟個陣震騰騰，拮穿佢攪入沙律到，口感即刻唔同晒！
▲日式海鮮燒餅 $79
木魚花被熱到郁郁下，就好似想騷擾中間嘅蛋黃哥咁，但佢依然好淡定啊！燒餅嘅醬汁濃郁，底部仲喺蛋黃哥張煙肉被，我就覺得好好味啦！
▲ 芝士漢堡扒咖哩飯 $129
蛋黃哥最鍾意瞓喺咖哩漢堡上，仲舉埋牌叫你唔好煩佢。不過要襯熱食，唔好好似我地咁，掛住影相，搞到 D 芝士硬晒，無晒味呀！
▲ 奄列吉列豬扒咖哩飯 $119
咖喱系列仲有個吉列豬扒咖哩飯，望到都「嘩！」「嘩！」聲呀！
▲ 明太子海鮮烏冬 $99
蛋黃哥話「我睇唔透呀！」，又真喺嘅蛋汁同明太子醬撈埋之後，又點分得清邊 D 喺自己呢？
▲ 洋食餐 $99
睇嚟蛋黃哥平時瞓得太晏，無咩機會食早餐，所以就將蛋、腸、煙肉同飯一齊食，嚟個 brunch 咁話。
▲ 奄列牛肉飯 $109
巨型嘅咖喱牛肉蛋包飯，睇見都飽。食完唔 hea 下，應該都幾難消化。
▲ 他他醬炸蝦漢堡扒奄列飯 $119
又真喺「你睇我唔到～」啵！但我明明就見到好大個蛋包飯囉！哈哈！
▲ 叉燒咖哩烏冬 $79
蛋黃哥化身糖心蛋 hea 住浸喺咖哩烏冬中，睇到都流口水！
▲ 天婦羅咖哩烏冬 $79
溫泉蛋黃哥浸喺咖哩烏冬入面，今次真喺「你睇我唔到～」啦！
▲ 買任何套餐可以加 $48 換限量蛋黃哥杯，不過今日仲未有貨，我都好想買呢！
▲ 後面仲有佢條靚股隙，圓碌碌超得意呢！
餐廳旁邊有間蛋黃哥精品店，唔單止所有蛋黃哥精品有 9 折，一田 VIP 卡仲有額外 95 折，食完嘢蛋迷一定要去掃貨啦！另外，為慶祝蛋黃哥榮升店長，一田仲設計咗 4 款 cushion 同 2 款衛衣，既可愛又實用。
▲ 餐廳旁邊嘅蛋黃哥精品店充滿非常多而且混亂嘅蛋黃哥精品，睇嚟佢掛住打理餐廳，唔得閒控制瘋狂掃貨嘅蛋迷啵！
▲ 每個特別版嘅 Gudetama cushion ($159) 都有抵死對白，我都好想「瞓住食～」呀！
▲ Gudetama 衛衣 $390 (左) $320(右)，一人一件親子裝。
▲ 盒紙巾都有蛋黃哥印花架，買番嚟都唔捨得用呢！
▲ 精品店旁邊有 4 部扭蛋機 $20 扭一次，睇嚟價格好似回落咗。
呢間蛋黃哥 café 唔算太大，而且 2 人位比較多，大過 The One 間蛋黃哥點心少少，而且 2 人位多，比較啱情侶或者同好姊妹去。佈置方面都好有心思，特別喺張蛋蛋凳超特別，見到句「好重呀！」，真喺唔忍心坐落去。今次餐廳除咗將蛋黃哥個樣嘅米紙貼上去，仲整咗 D 有對白嘅紙牌插上去，令 D 嘢食搞笑晒。至於味道同份量都同一般餐廳差唔多，位於觀塘，遲 D 熱潮過咗都可以間唔中去食下 lunch。
地點：觀塘觀塘道418號創紀之城五期 (apm) LG 一田百貨內
營業時間：11am – 10:30pm
查詢：3580 2883
相關影片﹕
