今日 Samsung 終於係香港推出他們旗下首款採用圓形錶肉嘅智能手錶 Gear S2 及 Gear S2 Classic，當中以 Gear S2 Classic 最得 Edward 歡心，因為無論從外型定係設計，筆者都覺得似番隻可以襯衫、出街見得下人嘅傳統型錶。但用落究竟點樣？而家就等我同大家分享一下啦。
Gear S2 Classic 加 3 舊更型仔抵買
今次 Samsung 推出 Gear S2 同埋 Gear S2 Classic，功能來講兩隻係一樣嘅，只係外型有少少唔同：Gear S2 就比較 sporty 同埋採用較簡約設計，錶肉表面比較啞色唔反光，而跟錶錶帶就採用塑膠物料；至於 Gear S2 Classic 就採用較拋光反光物料做錶肉，錶帶就採用真皮皮革錶帶，但兩隻錶售價只係相差 $300，所以如果大家想要隻型啲嘅錶襯衫，點睇都係買隻 Gear S2 Classic 更划算。
▲有錶帶嘅係 Gear S2 Classic，而無錶帶嘅係 Gear S2，可見 Gear S2 Classic 拋光錶側設計係比較靚嘅。
▲至於錶身同厚度，其實兩隻版本都差唔多。
▲另外 Gear S2 Classic 採用真皮錶帶，而 Gear S2 就採用膠錶帶。
▲Gear S2 換錶帶比較簡單，錶帶近錶肉位置有條隙縫，只要插指甲入去再輕輕向上一拉，就可拉出錶帶。而插回錶帶只要睇準插槽插入即可。至於 Gear S2 Classic，換錶帶就似乎比較困難了。
▲不過要留意嘅係，Gear S2 Classic 可以放平隻錶係檯面，但 Gear S2 就唔得了。
不再只局限 Samsung 手機
以往嘅 Samsung 智能手錶，其實就算功能幾好，都唔算太受歡迎，原因唔係產品唔得，而係支援嘅機款就只得 Samsung 手機，變相局限使用者群。今次推出 Gear S2 及 Gear S2 Classic，就終於改為支援其他廠商嘅機款（支援清單可按此），至少筆者睇到唔止 HTC、LG、Motorola、Sony 等大品牌嘅機款，就連 Huawei、ZTE 等都有，雖然未至於所有最新機款都能支援，但最少係行出正確嘅一步。至於做法，就係大家只要係 Play Store 下載番 Samsung Gear 隻 APP，然後再進行配對就可以了，十分簡單。
▲呢隻 Samsung Gear APP 用新推出嘅 Samsung 手機就係內置嘅，但如果係其他品牌嘅手機用家，就要從 Play Store 下載，先可以配對 Gear S2 Classic 使用了。
手感不錯皮帶少許偏硬
至於手感方面，其實兩隻錶手感都算唔錯，但由於 Classic 版採用拋光物料製造，所以會比較容易黏上指紋。至於錶帶方面，膠錶帶採用較柔軟物料，戴係手度會比較舒服；而 Classic 嘅跟錶真皮錶帶就比較硬身，初用個時應該會唔太舒服，但如果係真皮，理論上使用一段時間後皮質應會變軟，屆時應該會舒服好多。至於錶身方面，戴上手其實都算幾輕，唔會有種重甸甸嘅感覺，無論男女應該都唔會覺得累。
▲Gear S2 Classic 錶帶採用真皮物料，而且有細中大三個碼俾唔同手臂粗幼嘅用家使用。
▲皮物料係幾靚，不過屬於硬皮，初期使用應該會比較硬同唔舒服，相信要用番一年半載先會變軟啲。
▲相反 Gear S2 採用嘅膠錶帶，戴上手就舒服好多。
▲Samsung 亦與唔同公司 crossover 推出 Gear S2 Classic 錶帶，就好似呢款就係同周大福合作，為 18K 白色黃金壓花真皮錶帶，錶帶上鑲有鑽石，價值 $29,800，好貴哦！
▲而另一款同樣係同周大福合作嘅，就係呢款 S925 娟面真皮錶帶，錶帶上有條手鏈仔，都算幾 elegant。索價方面雖然平過上面 18K 個款，但都一啲唔平，承惠 $2,680，差唔多成隻錶價錢啦！！
操控方法多轉盤好用
至於功能方面，其實今次 Gear S2 Classic 都算幾齊全，唔止有心跳偵測器，仲可以配合 S Health 記錄運動同埋身體狀況，另外亦可以聯絡朋友、回覆信息等。至於操控方面，今次除咗有 Home 鍵及返回鍵係錶側外，圓形熒幕邊位仲有個可轉動金屬邊框，可以用佢來係互動圓形介面（Circular UX）各頁面之間切換，算係幾方便。
▲Gear S2 Classic 錶面邊位有一個可轉動金屬邊框，可以轉動用來切換版面或操控互動圓形介面。下面影片就係操控示範。
▲Gear S2 Classic 採用互動圓形介面，一改以往四四方方嘅介面設計。而向左、右掃就可以轉換頁面。
▲禁住錶面唔放就可以進入編輯模式，用家可以轉換程式頁面，又或者刪除程式。
▲S6 edge+ 嘅 People Edge 功能，亦搬到 Gear S2 Classic 上。
▲另外大家可以係手錶上面發出訊號尋找手機，調番轉都可以。
▲其他功能都算齊全，就連偵測心跳後，亦可以設定係咩情況下偵測心跳，都算體貼。
改用 Tizen OS 電量可用 2 至 3 日
今次嘅 Gear S2 Classic，亦一改以往 Samsung 智能手錶採用 Android Wear OS 的慣例，改用自行研發嘅 Tizen OS。未知是否呢個改變，官方聲稱使用時間可以延長至 2 至 3 日，係咪真係可以用咁耐真係要用落先知，但如果屬實，最少唔洗再一日一充。當然，充電今代都方便好多，只要將錶放係無線充電座上就 OK。
▲今次 Gear S2 Classic 採用嘅係全新 Tizen OS，用落理論上會比以往採用 Android Wear OS 嘅款式省電。另外手錶內亦有 4GB 儲存空間，不過可用嘅空間唔算太多，大約只有一半左右。
▲大家可以同步圖像或音樂去手錶，不過筆者就唔太建議大家咁做啦，畢竟手錶內存空間唔係太多。
▲除咗 Samsung 手機外，就連手錶都內建省電模式，理論上可以令手錶更省電。係此模式下，唔止熒幕顯示會變為黑白色，功能亦只限於通話、訊息及顯示通知。
錶面更多設計•用熊大、Sally 都 OK
此外，今次改用全新 OS 後，Samsung 亦加強咗唔少手錶嘅個人化設計，例如：錶面就有好多俾大家選擇，而且唔止有實用型，仲有貪靚型，就連鍾意玩 LINE 嘅朋友，亦可以選擇饅頭人、熊大、Sally 等做錶面，女仔用真係適合不過。此外，APPS 方面亦進一步加強，唔止可以係手錶讀取唔同即時訊息軟件（例如：WhatsApp、LINE、WeChat 等）的訊息及即時係手錶回覆，亦與唔少內容供應商合作，係手錶提供即時資訊（例如：CNN 提供即時新聞、Bloomberg 提供股票行情、ESPN 提供各種運動資訊等，未來還會推出 LiveSoccer 提供球賽實時比分資訊）。呢啲改變，都有望令手錶更加實用同埋智能。
▲Gear S2 Classic 錶面都算齊全，有好多款俾大家揀。
▲想設計自己鍾意風格嘅錶面都得。
▲又或者可以下載第三方公司設計嘅錶面，例如：LINE。
▲大家亦可以下載第三方程式，加強手錶功能。不過未知呢項功能係咪只限 Samsung 手機用家專用……
總結：睇落唔錯試真先知
整體來講，今次 Samsung 推出 Gear S2 Classic，睇落真係幾唔錯，無論係外型設計、戴上手手感（唯一係皮錶帶真係初戴有啲硬……）、以及各種功能上，都真係集大成於一身，十分齊全，無論用家係運動愛好者，定係純想戴隻錶襯衫嘅型男索女，Gear S2 Classic 應該都可以內在外在滿足到大家。不過智能手錶呢家嘢唔似手機，好多嘢睇落天下無敵，係咪真係好用真係要用落先知，係記者會短短十零廿分鐘測試時間，真係試唔到啲乜。所以好唔好用，唯有留待從官方借得實物後，再同大家詳細試盡啦。
售價：$2,888（黑色）
查詢：Samsung（3698 4698）
