OnePlus 昨日除咗推出手機之外，亦同場推出入耳式耳機 一加金耳，仲聲稱一隻 399 元人仔嘅耳機，音質可以媲美 3,000 元人仔級別耳機！究竟表現係咪真係咁堅秋？而家就等 Edward 係北京現場試試。
參考管風琴設計係幾靚
一加金耳係屬於入耳式耳機款式，據官方表示係設計上喺參考管風琴而造，筆者見過真機，就發覺參考部分其實在於耳機機身本身，因為採用雙管設計，並採用鋁金屬物料製造，而雙管內採用掏空設計，可有效減輕耳機重量。另外據官方表示，它可如微型風管般調音，三重腔體可有效令音域增加，尤其是高低及低音表現部分比一般同價或更高價耳機出色，音質唔止更通透，而且亦更出色。所以呢個設計，據官方所言並唔係單純係外觀咁簡單。加上一加金耳設有 11mm 大單元，亦有助加強音色表現。
▲耳機設計參考管風琴，並加入 OnePlus 自家嘅雙阻尼管技術，有助加強音色。
▲採用 11mm 大單元，係呢個價位嘅入耳式耳機確實較少見。
戴上耳感覺還好
另外，一加金耳採用 51 度導管，據官方表示可更貼近耳道，令聲音可更舒適入耳。筆者亦試戴過，可能現場耳機所採用的耳塞較大，筆者嘅耳洞又較細，所以配戴上去感覺好似唔係好啱 size，舒適度一般，幸好官方表示跟機會有 3 種不同大細嘅耳塞俾用家選用，可能用較細耳塞配戴，筆者會覺得較舒適都唔定。至於 51 度導管設計，確實令耳機能更貼近耳朵，配戴起來亦比一般 90 度設計的入耳式耳機舒適，呢一點係值得一讚。
▲採用 51 度導管，設計同一般入耳式耳機嘅 90 度設計有所不同。
▲戴上耳都算舒適。
隔音效果一般
至於隔音效果方面，筆者測試過聽歌個時，就算音量調較至中高量，仍然聽到身邊其他記者與 OnePlus 職員的對話。本以為係因為筆者所試耳機耳塞較大，所以效果未能作準之故，但事後詢問同團其他行家，就算係耳塞合適，亦有類似情況出現，似乎一加金耳嘅隔音效果確實未如理想，睇來一加要係耳機範疇做得比其他廠出色，呢一方面真係仍要加把勁。
音色未如廠方所示咁誇
至於音質方面，由於筆者手頭未有高品質音樂，亦沒有高質素音樂播放器，所以未能試真，只能用 OnePlus X 內的一般質素 MP3 試聽。筆者試聽當中的《Hotel California》，發覺雖然音質都算唔錯，立體聲表現亦有一定水準，但如果以廠方表示「可媲美 3,000 元級別耳機」的口號來講，就肯定未到該水準！但如果用佢來挑二千蚊內港紙嘅入耳式耳機嘅機，就真係有呢個可能。所以係質素來講，399 人仔可以買得到真係無得輸，但大家唔好期望聽完佢會普通歌即刻變「天籟之音」囉。
總結：對得住個售價有餘囉！
整體而言，一加金耳雖然筆者覺得未至於好似廠商所講咁誇，可以挑戰 3 千蚊級別耳機，但確係有一定水準，如果拿其他手機嘅跟機入耳式耳機，又或者千零蚊嘅入耳式耳機比較，一加金耳贏出嘅機率確實唔低。但當然，耳機每個人口味都唔同，一加金耳係低音方面表現確係唔錯，尤其是聽 rock 歌個時都算潛得比較低，但人聲或高音，就似乎未算好高，人聲亦唔算太清。但呢樣亦可能係筆者所聽音樂 source 本身唔夠高清所致。唯有希望當正式推出時能借得賣街版本，俾負責 AV 產品的同事試一試，就知道係龍定係蟲了。
售價：399 元人民幣（約 HK$486）
查詢：OnePlus（http://www.oneplus.cn/product/accessories/yijiajiner）
分享到 :
最新影片
