之前蛋黃哥點心紅極一時，但懶洋洋的蛋黃哥又點肯長駐店面咁辛苦，於是就叫咗 Little Twin Stars 接替自己由 12月 29日 (尖沙咀店) 及12 月30日 (中環店) 開始成為 Dim sum icon 的代表。今日我依莉詩就率先到中環店相機食先！
7 大繽紛傳統點心夠可愛
▲ Little Twin Stars 水晶白蝦餃 $59
薄薄的蝦餃皮上印有 Little Twin Stars 的圖案，非常可愛。
▲ Little Twin Stars 彩色蝦餃 $59
彩色蝦餃皮以 Kiki 同 Lala 的粉藍同粉紅代替純白餃皮，造型簡單。
▲ Little Twin Stars 原粒帶子燒賣 $69
鵪鶉蛋燒賣見得多，今次 Kiki 同 Lala 隱身大大粒帶子中，並伏係豬肉燒賣上，爽口彈牙。
▲ Little Twin Stars 鮮蝦腸粉 $49
腸粉即叫即拉即蒸，就算加上了 Little Twin Stars 可愛圖案都能保留傳統腸粉的水準，口感幼滑。
▲ Little Twin Stars 奶皇流沙包 $49
之前蛋黃哥流沙包嘔奶黃夠晒經典，今次的 Little Twin Stars 奶皇流沙包混合好立克，同樣有流沙效果，味道唔太濃，食幾個都仲得。
▲ Little Twin Stars 鮮甜菜肉包 $$39
菜肉包餡以高麗菜同豬肉混合而成，食落啖啖肉汁，記得襯熱食啊！
▲ Little Twin Stars 雪山叉燒包 $49
同傳統叉燒包唔同，雪山叉燒包外層香脆得嚟又鬆軟，入面淡淡叉燒，最啱食肉獸。如果同埋上面的白朱古力一齊食，效果完全改變，難以形容。
3 大創意主食有星味
▲ Little Twin Stars 海鮮凱撒沙律 $79
Kiki 同 Lala 係沙律菜中起舞，就連蘿蔔都變成星星呢！
▲ Little Twin Stars 海鮮五穀炒飯 $99
五殼米連同瑤柱碎、柚子汁炒到非常金香，配合海斑、青口、大蝦、小魚干，用料十足。
▲ 星星青芥一口堡 $59
雖然叫一口堡，不過呢對咁可愛的星形漢堡一口一定食唔晒。美式漢堡中層以鮮蝦混合芥末醬打成蝦餅，唔會太辣，但非常惹味。
4 大甜品好滋潤
▲ Little Twin Stars 燉奶椰皇 $69
冬天食番個椰皇燉鮮奶個身即刻暖笠笠，唔洗講椰皇的清香同牛奶蛋白幾時都咁夾，夠晒滋潤。
▲ Kiki / Lala 牛奶戚風杯子蛋糕 $49
杯子蛋糕上除了 Little Twin Stars 白朱古力外，仲有一朵朵糖霜花朵，未食都已經攞滿分。
▲ Kiki / Lala星星奶凍 $49
其實 Kiki 同 Lala 奶凍味道差唔多，只係顏色上的差別。另外仲可以自己加上星星裝飾，實行相機食先之選。
▲ Little Twin Stars 白朱古力芝士撻 $49
新鮮出爐的芝士撻外層鬆脆，中間奶味濃郁，散發淡淡芝士香。
可愛杯碟帶番屋企
▲ 除了 Little Twin Stars 美食之外，當中用的杯碟都有 Little Twin Stars 圖案，而呢 set 茶壺同杯就最特別。
▲ 部份的餐具更加可以買番屋企慢慢用，不過暫時未知定價。
依莉詩：「粉色系點心甜品好 sweet！」
今次的食品種類明顯比蛋黃哥主題的時候多，除了沙律、炒飯同漢堡之外，傳統點心同甜品都加入 Little Twin Stars 元素，非常有心思。至於味道上，可能今次襯熱食，我覺得比蛋黃哥點心個次更加好食。而且中環新店比尖沙咀店更大，坐得更舒服。可惜今日到場的時候仲未裝飾好，所以現場沒有 Little Twin Stars 主題餐廳的氣氛呢！
Dim Sum Icon
地址：中環德己立街1-13號世紀廣場 B/f (11am – 2am)、尖沙咀The One L3層L308號舖 (11am – 11pm)
