仲有一個月就母親節，自問係孝子賢孫的都係時候訂定枱慰勞下媽媽一年的辛苦照顧。今日我依莉詩就介紹一下美心中菜最新推介的「味道‧福建」系列，大部份材料都取自福建，再由大廚用傳統方法烹調。唔知可否一解母親的思鄉之情呢？
福建位處東南沿海，因為得天獨厚的環境，盛產多種海鮮如海蠣、魷魚、海參等，所以當地人對烹飪海鮮亦甚有心得，除了製成發酵食品、醃菜、海味乾貨，亦懂得以溜、蒸、炒、煨、燉烹調，更擅於用糟、製作湯餸。而今次的「味道‧福建」系列就由大廚豐富經驗與精湛功夫將地道食材製造出一道道充滿福建味道的小菜。
▲ 漳州風味五香卷 (左)、南安紫菜BB蝦 (右)、泉州菠蘿海蜇球 (後) $58/小食
首先試食的當然是頭盤，係漳州風味五香卷 、南安紫菜BB蝦 、泉州菠蘿海蜇球 3道當中，我特別欣賞海蜇球。因為佢口落非常厚身爽脆，加入少許的蔥油作涼拌，有少少鹹、香，非常開胃。師傅仲話，一舊海蜇球已經係成隻水母，非常矜貴。
▲ 傳統福建佛跳牆 $148/每位
相傳清朝年間，一名福州官員將雞、鴨、海產等十多種原料放進酒罈，以慢火隔水燉煮而成，罈蓋一開滿屋葷香，引得文人讚頌提詩。而今次呢盎迷你佛跳牆都好唔簡單，不但用咗鮑魚、乾貝、花膠、海參等材料，仲加入了傳統福建老酒、盡現閩菜「海味」、「葷菜」、「湯煨」三種手巧功夫。名貴材料唔多講，單單係隻白鴿蛋蛋味十足，絕非普通蛋可以媲美。
▲ 福州包心荔枝肉 $88/例
主菜就有包心荔枝肉，但原來「荔枝」並非指以水果入饌，而係取福州特產荔枝而盛名。以豬肉包裹馬蹄，搓成球狀再油炸，最後加入紅糟糖醋汁炒製，令外型也變得跟荔枝相似。味道方面甜甜酸酸，有肉丸的彈牙，十分惹味。
▲ 海帶魚丸肉燕餃 $88/例
福建菜的「湯」唔似廣東菜一定用嚟滋補，亦包括湯汁豐富的菜餚，而海帶湯清甜亦有多重鮮味，用嚟送飯唔錯。至於燕皮餃以豬肉同蕃薯粉打成皮，再包豬肉而成，爽滑彈牙。
▲ 生炊芋粿炒素菜 $78/例
呢道菜看似普通的清炒時蔬，特別在於當中的芋粿口感軟糯帶芋香，配合西蘭花、小雲耳等一齊炒，食味清新。
▲ 古早味同安封肉 $128/例
安封肉睇落好肥，不過配以冬菇、蝦乾、薑蔥、栗子、蓮子等，先炆後蒸約共六小時後，五層肉已經變得入味軟腍，完全唔覺油膩。
▲ 安溪三不做米粉 $98/例
所謂「三不做」是指安溪人必須集齊「湖頭大米、閬溪甘泉、晴朗天氣」三種條件才會動手製作米粉。亦因為試食會當日落大雨，所以沒有這道菜啊！
▲ 花生芋頭清甜湯(左) 中點/每位、桂花紅棗糯米粿(右) 小點/各四粒
中式甜品的外型往往都唔夠西式吸引，但普普通通的外表唔代表普通，就好似白色的桂花糯米粿外表毫無特別，但入口後桂花味淡淡散發，比想像中好味得多。至於花生芋頭清甜湯，花生入口即化、酥爛香甜，配上粉糯芋頭，口感配搭唔錯。
平時好少出街食中菜，總係覺得家常便飯咁，不如食番 D 其他地方的菜。但經過今日試食之後，發覺中菜唔一定係咁簡單，亦可以有好多變化。就算睇落普普通通的海帶魚丸肉燕餃同桂花紅棗糯米粿，原來都可以好好味。就快母親節，不妨帶媽媽去試下丫！
「味道‧福建」
餐廳：美心皇宮、翠園、映月樓、怡翠軒、海逸軒、八月花