白啤品牌 Hoegaarden 於 6 月 24﹑25 日以及 7 月 1 至 3 日一連兩個週末係灣仔利東街舉辦「Hoegaarden 創意花園」，除咗有 Pop-up Store 售賣啤酒小食之外，亦都會有一連串嘅表演以及工作坊。小編就已經係剛剛過去嘅週末玩咗一個開心嘅下午，想知有乜好飲好食就緊係要繼續睇落去啦！
Pop-up Store 創意啤酒小食
今次 Pop-up Store 「Gourmet by Hoegaarden」一系列以 Hoegaarden 啤酒製作嘅小食 menu 由來自英國名廚 Tom Burney 創立嘅 Invisible Kitchen 設計，而且活動期間亦有調酒師駐場利用唔同口味嘅 Hoegaarden 啤油即席炮製雞尾酒。
雖然小編就無試晒 menu 上所有嘅小食同飲品，不過我個人試完嘅推薦就係：飲品當中最值得試嘅就係 Ginger Gaarden 同 Fruit Gaarden ， Ginger Gaarden 係以 Hoegaarden 白啤加入薑味糖漿及青檸汁調配嘅雞尾酒，而 Fruit Gaarden 就係用 Hoegaarden Rosee 加入熱帶果汁﹑紅桑子同迷迭香調配而成。 Hoegaarden Rosee 係相當受歡迎嘅紅桑子白啤（而小編自己對紅桑子又係毫無抵抗力嘅 XD），所以小編覺得尤其係 Fruit Gaarden 係今次活動必試雞尾酒，而且果汁酒相當易入口，男女都適合！
而小食方面，小編就特別推薦意式奶凍配紅桑子及 Hoegaarden Rosee 果凍，佢係以 Hoegaarden 果凍做底層，上層則係意式奶凍，灑上黑色嘅蛋白餅碎並以紅桑子﹑薄荷葉﹑食用花瓣同蟲仔果凍做點綴。而如果鍾意熱食的話，就可以考慮下 Hoegaarden 手撕豚肉石頭包，用 Hoegaarden 慢煮豬肩肉配灰色蒸包，味道比較清新，都係一個唔錯嘅選擇。
「花園創作坊」工作坊
除咗有得飲有得食，當然唔少得玩啦！今次 Hoegaarden 創意花園特地安排咗「花園創立坊」工作坊，參加者可以利用 Hoegaarden 經典六角形啤酒杯親手打造一個屬於自己獨一無二嘅小花園。參加方法亦相當簡單，係 Hoegaarden 嘅 Facebook 專頁「最新消息」留低個人資料，並對你心目中理想花園作出描述，一經揀選就可親臨現場製作屬於你嘅小花園。
而如果覺得呢個方法都係有啲煩？唔緊要！只要係活動期間係場內嘅 Pop-up Store 消費滿港幣 200 （包括最少一杯雞尾酒），你就有機會即場登記參與指定時段嘅工作坊！以下就睇下小編製作嘅「小花園」：
Hoegaarden 立體影相館
今次活動仲特地設立體影相館，利用上下顛倒嘅 Hoegaarden 設計；而且只有將係立體影相館所影嘅相擺上 Facebook 同 Instagram ，並加上 Hashtag #Hoegaarden 同 #LeeTungAvenue 之後展示比在場工作人員，就會送上全新嘅 Hoegaarden Rosee 啤酒，係咪好正呢？
Billy：「今個週末最佳蒲點！」
每到週末小編都好煩惱，因為鍾意同朋友去飲飲酒輕鬆一下，但又幾怕夜蒲（因為老了會眼訓）；而今次 Hoegaarden 創意花園呢個活動絕對係啱晒小編，因為可以 day drinking … 啊，唔係，係有得飲有得食而又有 workshop 玩，絕對係度過週末嘅好去處！唯一問題就係近排比較曬又焗熱，不過活動現場都設有混合甜橙﹑檸檬同佛手桔三種味道嘅水氣噴霧為大家降溫，相當唔錯嘅安排啊！
Hoegaarden 創意花園
日期： 2016 年 6 月 24 – 30 日以及 7 月 1 – 3 日
時間： 6 月 27 – 30 日（下午 4 時半至晚上 10 時） 7 月 1 – 3 日（中午 12 時至晚上 10 時）
地點：香港灣仔皇后大道東 200 號利東街
* 欲知更多詳情，請到 Hoegaarden Facebook 專頁查詢（點按此）
