提起手提電腦,近年都有唔少主打入書上網用途為主的入門機款,不過一係就重得滯,一係個樣就薯得滯唔見得人,一係就規格入門但售價一點都唔算「入門」。Acer 就將會在香港引入 Chromebook,初期主攻教育市場。昨日 Edward 就得以上手速試呢部輕薄又文書唔錯的機款,而家就同大家介紹下啦。
今次 Acer 引入的 Chromebook 機款,同美國推出的機款相同,同樣有齊 11 吋同 13 吋兩種機款,規格合共有 5 個,售價由 $2,398 至 $3,498 不等,算係幾平。最吸引 Edward 的地方,就係無論係 11 吋定係 13 吋機款,機身都好輕同好薄:11 吋重量只有 1.1kg 左右,厚度亦只有 18.54mm;而 13 吋重量也只有 1.5kg 左右,厚度就比 11 吋更薄!只有 18mm 左右。Edward 就算單手拿住一陣都唔覺重,拿出街做文書上網打稿真係幾方便。
至於介面方面,雖然 Chromebook 算薄,但仍然應有盡有,USB 端子方面,11 吋有 1 個 USB 2.0 同埋 1 個 USB 3.0;而 13 吋兩個 USB 端子仲要都係 3.0。另外,兩款都有 SD 讀卡器,亦有 HDMI 輸出,當然都一定有 3.5mm 耳機插孔。無論拿出街定係係 office 工作,都算夠用。
▲機身右側有 3.5mm 耳機插孔及 USB 端子。
▲至於另一個 USB 端子就在機身左側,SD 讀卡器亦在此位置。至於 HDMI 輸出就在機背,介面設計好合邏輯。
▲而立體聲喇叭就係機底。
講得上文書上網機,打字自然好重要,所以 Edward 都為大家測試過用它打字的感受。Chrome OS 內置了唔止有英文輸入,亦有中文輸入,而倉頡、速成、拼音呢 D 港人常用的輸入法都一一有齊。唯一 Edward 覺得好麻煩的,就是輸入中文的時候,如果要揀字,係唔可以好似係 Windows、Mac OS 咁用鍵盤數字選字,而係要靠 TouchPad click 字來揀,大大影響文字輸入速度呀!
▲文字輸入支援中文,亦有港人常用的倉頡、速度、拼音等。
▲有得打中文,介面自然可以揀繁中啦。
▲輸入英文就無乜問題,不過明明用鍵盤打字,熒幕又唔支援觸控,但就半個畫面俾個虛擬鍵盤霸住,真係好唔 like!
▲但如果輸入中文,就要用 TouchPad 揀字好麻煩呀!
不過鍵盤打字的舒適度就算幾好,感覺同一般手提電腦無乜分別,TouchPad 禁落去都唔算太實,好易就 click 到。整體來講,如果你是主力輸入英文的話,Chromebook 應該可以俾到你唔錯的文字輸入體驗;但如果主力係輸入中文,你就要考慮下係咪要入手 Chromebook 啦。
▲Acer Chromebook 鍵盤打字都算舒服。
▲要 refresh?唔好再搵 F5 啦,Chromebook 鍵盤最頂個行左邊數起第 4 個制就係。
全新 HP Chromebook 發表 四款型號全部搭配 14 吋屏幕 改善 Chromebook 使用體驗 Google 將推出 App Mall 程式商店
至於規格方面,Acer Chromebook 11 吋就採用了 Intel Celeron N2830 2.16 雙核心處理器、Intel HD Graphics 圖像處理晶片、2GB / 4GB RAM 同埋 16GB / 32GB 儲存空間;而 13 吋就更採用了 NVIDIA Tegra K1 2.1GHz 四核心處理器、NVIDIA 圖像處理晶片、2GB / 4GB RAM 同埋 16 / 32GB 儲存空間,如果用來上網睇 YouTube、搵料或者睇討論區,又或者用來做文書工作,呢個效能綽綽有餘。但如果打機的話,就唔好諗啦,因為兩個尺寸的圖像處理晶片都唔係獨顯(Chromebook 亦唔係俾大家用來打機啦……),如果係 Chrome OS Store 入面下載 D mini games 都仲應付到,但如果想玩傳統電腦 game,一來系統應付唔來,二來呢部唔係用 Windows,相信大家想打都打唔到喇!
▲13 吋 Chromebook 採用 NVIDIA K1 四核心處理器,效能都算唔錯。
▲用來做文書都仲 okay。
▲玩下 mini games 都算可以順暢運作。
▲又或者用佢內置的影相軟件加埋個 cam 影下趣怪自拍都幾得意。
▲係 Chrome OS Store 入面下載番來非 Adobe 推出的 web app 版 Photoshop,都可以令大家係 Chromebook 做到一 D 基本 Photoshop 功能既,包括:執圖、crop 相、甚至加幾層 layer 做圖都得。
至於熒幕,11 吋機款解像度為 1,366 x 768;而 13 吋機款解像度更是 1080p,都算高架喇!但顯示質素方面,Edward 只係奉勸大家唔好太大期望,睇到清晰就算啦,始終二千零三千幾的手提電腦,大家可以 expect D 乜呢?但講句老實說話:兩個尺寸的芒都算清晰,都唔會有明顯偏色情況,算係合格有餘啦。
▲顯示算係唔錯,不過就唔好太高期望啦,睇到就算。
▲11 吋機款最高解像度為 1,366 x 768。
▲至於 13 吋機款,仲有 1080p 解像度添!
好多人一聽到 Acer 的 Chromebook,第一反應就係:乜 Chromebook 唔係一定要上網先用到架咩?如果係上唔到網的地方,拿住用咪哂氣?老實,Chromebook 如果係上唔到網既地方,確實會被廢一半武功;但係咪完全哂氣?咁又未必!事實上係 Chrome OS Store 入面,都可以搵到唔少可以在離線情況下都用到的 APPS 同埋遊戲,當中仲包括 Google Docs,咁樣大家就算係上唔到網的地方,都可以做文書工作,當去到上到網既地方的時候,先至同步番去雲端,咁就唔洗驚 Chromebook 如果上唔到網就無用武之地啦。
▲Chromebook 確實唔少 services 都要靠上網先用得到。
▲但如果上唔到網係咪就無用?又唔係!Chrome OS Store 入面其實都有唔少可以離線用的 APPS 同埋遊戲。
▲不過大家就要記住在可以上網的地方先開左 Offline Sync 將檔案下載去 Chromebook 度,離線使用功能先可以用得到,好似上圖 Google Docs 就係咁的情況。
▲按住上圖指示一步步做,同步完成之後就可以離線打文件啦。
整體來講,Acer 呢兩部 Chromebook,整體表現都幾唔錯,仲好順添!加上支援 802.11ac,對應相關 router 上網表現仲可以好穩定。加上 11 吋同埋 13 吋機款,都內建了 3,220mAh 容量電池,前者可以用到 8 個半鐘,後者仲可以用到 11 個半鐘添!就算打個八折,出街用有呢個使用時間都綽綽有餘啦。唯一最大缺點,就係中交輸入好麻煩,但如果大家唔常輸入中文,Acer Chromebook 確實係出去做野的唔錯「助手」。
售價:$2,398(11 吋、2GB RAM、16GB ROM);$2,598(11 吋、4GB RAM、16GB ROM);$2,798(11 吋、4GB RAM、32GB ROM);$3,298(13 吋、4GB RAM、16GB ROM);$3,498(13 吋、4GB RAM、32GB ROM)
查詢:Acer(2821 0200)
[divider]
全新 HP Chromebook 發表 四款型號全部搭配 14 吋屏幕 改善 Chromebook 使用體驗 Google 將推出 App Mall 程式商店
今次 Acer 除了展示出兩部 Chromebook 外,仲專誠帶來未知幾時會係香港推出的 Chrome OS 迷你桌面電腦 Chromebox。設計上機身都幾平實,而且端子都好齊,如果大家想買部文書上網 Desktop PC 番屋企或者放係 office 用,呢部都係一個唔錯的選擇。不過據 Acer 方面表示,呢部 Desktop PC 暫時未知會唔會係香港賣,或者幾時開賣,所以售價就暫時唔知啦,不過 Edward 覺得,如果低過 2k,都應該有唔錯的吸引力。
▲部 Chromebox 都幾輕,Edward 一隻手掌可以輕鬆托起。
▲機身前方有開關制、SD 讀卡器同埋 2 個 USB 3.0 端子。
▲至於機背,就有多 2 個 USB 3.0 端子、LAN 同埋 3.5mm 耳機插孔。而視頻輸出方面,唔止有常見的 HDMI,仲有 DisplayPort 素,介面認真齊全!
全新 HP Chromebook 發表 四款型號全部搭配 14 吋屏幕 改善 Chromebook 使用體驗 Google 將推出 App Mall 程式商店