機王定義係乜？相信人人唔同。對於 Edward 來講，效能可以追貼時下規格、手感不錯、影相漂亮、熒幕質素高等，如果能符合這些條件，已是心目中的機王。而最近 Motorola 在香港推出的 Moto X 二代，就完全滿足呢啲條件。不過問題係，似乎推出時間遲咗啲。仲有冇競爭力？就等 Edward 同大家講講：
「永續原木」環保 + 手感好
如果講到 Moto X 二代的最大特別，肯定係佢的木質機背。有些人說是竹製機背，其實不是，包裝盒內的「證書」已說明是「永續來源」的原木材料，所以 Moto X 二代的機背見到的木紋是天然的，而非人工後期加上的，所手拿上手手感十分柔軟，Edward 覺得無論與塑膠、甚至任何金屬機背機比，手感都要好得多。
▲同一般金屬或者塑膠機背比較，Moto X 二代的木質機背手感真係好好多。
▲每部機都有證書，證明採用永續來源的天然原木製造。
▲單手拿住手機個時，食指可以放在 M 字圖案的凹入位置，進一步加強手感。
注意機身清潔
不過可能是因為採用木材關係，Moto X 二代的金屬機邊同埋木質機背的接駁位，似乎貼合得唔太緊密，呢啲空隙位當使用時間長咗，好大機會會入塵。另外，木質機背因為是天然原木，所以亦比一般塑膠、金屬機殼易污糟。當然，大家可以帶個「套」，咁就唔洗擔心，但如果咁做就會無咗裸機手掌掂住木機背的良好手感，所以要魚與熊掌兼得，大家都係勤力啲，多用乾淨軟布或眼鏡布幫部手機做清潔啦。
▲可能因為採用木質機背關係，所以金屬邊同埋木機背之間有較大空隙，好易入塵。
▲木質機背亦容易整污糟，勤力啲用軟布清潔係難以避免架啦！
單手操控一流‧體感操控易上手兼實用
至於操控方面，Moto X 二代採用了 5.2 吋熒幕，加上機身闊度都只係 72.4mm，雖然厚度官方規格寫住係 10mm，但因為採用了弧形機背，所以單手操控的手感都算唔錯。加上金屬機邊，亦提升咗手機的觀感。
▲厚度方面，Moto X 二代都有 10mm，相比 LG G3 都真係厚啲啲。
▲不過因為採用弧形機背，所以手感都 OK。
▲單手操控完全無問題。
▲採用輕觸式按鍵設計，而且在熒幕內，下方喇叭左右的兩點不是按鍵來的，大家要留意。
另外，Moto X 二代亦同第一代一樣，亦加入咗唔少體感操控，例如手掌懸浮於熒幕上，就已可開啟熒幕瀏覽信息、在熒幕上方揮手可將來電靜音或延後鬧鐘、揸車個時有來電或簡訊，可以自動使用免提操作、甚至晃動手腕兩次就可快速開啟相機等。呢啲體感操控，Edward 試過真係幾實用之餘，亦好容易上手。
▲有唔同體感操控功能供大家選擇，而且都幾實用又易上手。
▲針對有車一族，都可以預先設定開車時以免提操作通話及短訊。
熒幕質素佳‧可視角度高
至於熒幕方面，Moto X 的 5.2 吋熒幕採用了 1080p AMOLED 熒幕，並未有用上時下開始進入主流的 2K QHD 熒幕，如果追求高解像度熒幕的用家來講可能會有啲失望，不過其實 Edward 覺得現時的 QHD 熒幕發展未夠成熟，雖然係靚，但會令電量快速流失；而且 QHD 熒幕一般都有輕微偏黃情況，加上在 6 吋以下的手機熒幕，是 1080p 還是 QHD 解像度，其實就算拎起放大鏡來睇都未必睇得出，所以其實企係使用體驗來講，Moto X 二代無 QHD 熒幕，其實都唔洗太覺得可惜。
▲採用 5.2 吋熒幕，雖然只得 1080p 解像度而唔係 QHD，但係 5.2 吋熒幕上睇，其實夠用。另外內置喇叭位於前方，機頂及機頂兩條銀色 bar 就是，不過摸上去有少少界手。
至於質素方面，Moto X 二代採用的 AMOLED 熒幕，天生就擁有黑位較實的效果，Edward 用來睇戲，覺得在顯示質素上算係唔錯，用來睇 1080p YouTube 影片，夠清晰之餘，黑位亦確實好實。就算拿來睇網頁，字體都好銳利清晰，雖然有輕微偏黃問題，但都唔會太影響使用體驗。
▲用來睇網頁，字體好銳利，圖片色彩亦自然，不過有少許偏黃。
▲可視角度亦算高，側面睇都可以清晰睇到細字。
▲睇 1080p 影片，色彩都幾自然，而且黑位都幾實，值得一讚。
相機像素不高但質素唔錯
至於鏡頭方面，Moto X 採用了 1,300 萬像素鏡頭，雖然睇落像素唔算高（而家唔少其他品牌嘅旗艦手機，都已經達到 1,600 萬甚至 2,000 萬像素），但係都有 F/2.25 大光圈，拍攝出來的相片質素都算幾高，即使逆光拍攝，亦都可以影到清晰兼唔會黑媽媽的相片。而且，Edward 都好鍾意佢個相機可以控制對焦同埋曝光，只要開啟相關功能，再拖動綠色圈，就可以調節相片曝光效果。不過曝光及對焦位置一定要同一個位置，而不能分開，Edward 覺得如果可以分開，就可以影到更具創意的相片了。
▲Moto X 二代相機像素為 1,300 萬，雖然比一代的 1,000 萬已經高咗，但係都係追唔上其他廠的旗艦機。
▲拍片支援最高 4K 質素，不過 frame 數似乎較低，如果要拍 4K 質素的高速移動物件，效果只是一般。
▲介面算易用，基本上可以一按即影。
▲設有控制對焦與曝光功能。
可以拖動綠圈，就可以改變對焦點及曝光值。
試相區
原裝 Android 介面‧效能不錯暢順
至於介面方面，Moto X 二代採用咗 Android 5.0 Lollipop 原裝介面，所以使用起來，同埋之前推出的 Nexus 9，或者水貨早抵港的 Nexus 6 是一樣的。可能是因為採用了 stock ROM，加上 Moto X 二代採用咗舊年的旗艦手機規格，所以整體操控效能是不錯的，無論是入、出 APP，睇高清片或者睇網頁，或者玩遊戲等，都有好暢順的效果。
▲採用原裝 Android UI。
▲出廠已是 Android 5.0 Lollipop 作業系統，可以講得上係第一部賣街的 Android-L 旗艦手機。
▲如果想由舊機過資料去新機，Moto X 二代設有移轉功能，可以將舊手機的相片、影片、音樂、通話記錄及其他資料轉移去新機，幾體貼。
▲SIM 卡槽在機頂，採用而家主流嘅 Nano SIM。
▲用跟機附送的針，就可以篤出 SIM 卡槽。
▲跟機送的差電火牛，都支援速差功能，可以 15 分鐘差可用 8 個鐘的電量。
Edward：「遲來的機王，定價貴咗啲喎！」
老實說，Moto X 二代在規格上，如果以 2014 年來講，確實係旗艦級數。但去到 2015 年 Motorola 先至係香港推出，當全世界旗艦都係用緊 Qualcomm Snapdragon 810 或者同級 CPU，而且一般都有 3GB RAM 或以上的規格，而 Moto X 二代就只係用 Qualcomm Snapdragon 801 CPU、2GB RAM 等規格，雖然用起來都真係暢順，但係就真係遲咗啲囉。加上定價都成 $4,998，而且得個 16GB 儲存空間，又唔可以插卡，未裝 APP 都係得番 8.53GB 用，點夠？而且美國有 17 種機身顏色、4 種唔同木料同埋 4 種唔同皮革料機背供用家選擇，但香港就只得原木材質機背。以呢個設計同售價，點解不考慮同價但同規格，而且鏡頭像素有成 2,000 萬像素又可以插卡又有防水功能嘅 Sony Xperia Z3？或者同樣有防水功能，鏡頭像素都有 1,600 萬的 Samsung GALAXY S5？又或者 RAM 有成 3GB 而且可以換電嘅 LG G3？呢一點，係 Edward 抓爆頭都諗唔明的入手原因。
售價：$4,998
查詢：BrightStar（2980 8088）
分享到 :
最新影片
