近年智能手機的設計同硬件規格似乎都已經到達「樽頸位」，唔止設計上來來去去都係個啲，硬件上就算中階機都已經滿足到大部分用家需要，而旗艦機售價愈來愈貴，亦令唔少人減慢換機周期。唔少廠商於是就從其他功能上入手，就好似結合相機 + 手機功能的機款，近年就有一群固定捧場客。今次 Lenovo 推出的 VIBE Shot 就係一例，究竟用落又係點？而家就等 Edward 同大家測試一下。
機身設計似潛望鏡頭相機
VIBE Shot 最吸引到 Edward 的，首先就係機身設計：機背採用強化玻璃製造，加上整體設計同埋操控模式，令筆者有種拿住部昔日 Sony Cybershot 系列，採用潛望鏡的輕薄型相機的感覺（當然 Vibe Shot 唔似 Sony Cybershot 咁支援光學變焦啦！！），感覺都幾 grand。不過採用玻璃機背的缺點係，萬一手機不慎墜地，爛嘅就唔止係個芒，仲隨時可能爛埋個機背，個時維修費就好「甘」了。另外，玻璃機背亦比較容易痴上指紋，對於有「潔癖」的用家來講，可能就要隨身帶備一塊眼鏡布方便隨時清潔機身啦。
▲機背採用強化玻璃設計，靚就係靚，不過萬一手機不慎墜地……爛嘅就唔係正面熒幕咁簡單……
▲玻璃機背另一問題就係好易痴手指膜。
相質不俗輕微油畫化
至於鏡頭方面，VIBE Shot 採用了 1,600 萬像素 F/2.2 BSI 鏡頭，亦支援 OIS 光學防手震功能，仲擁有紅外線對焦，理論上係唔錯嘅。實際上試起來，始終作為一部二千零蚊的 4G 手機，表現都預咗唔會去到好旗艦機級數。不過佢都算唔差，起碼出來嘅相片，色彩來講算係幾自然同幾清晰，只係 100% 放大時會明顯見到有油畫化情況出現，可以講算係去到網絡分享級數。
▲2 千幾蚊機仔都有 1,600 萬像素，係有啲驚喜。
另外相機來講，佢除咗有全自動模式，亦設有 Pro 模式。但大家唔好諗住 Pro 即係代表可以影 RAW 相或者有唔同手動功能，佢意思只係大家可以手動調較曝光補償、ISO、快門、白平衡等設定。但作為一部二千幾蚊嘅手機，OK 啦！而最特別嘅係，佢機身設有實體快門鍵，唔止可以用來影相，平時熒幕關閉時，只要快按兩下，就可以在 1 秒左右時間開到相機兼影到相，對於要影稍瞬即逝的一刻，真係好有用。
▲機側有硬體快門鍵，而旁邊就有個按鍵，可以快速係自動模式（Auto）同埋專業模式（Pro）之間切換。
▲如果係專業模式，可以自行調較曝光補償、感光度等設定。
▲專業模式都有唔同攝影模式俾大家選擇。
至於自拍鏡頭方面，佢嘅前置鏡頭像素上都有 800 萬，而且支援 78 度拍攝角度，基本上兩三個朋友一齊玩 selfie 都無問題。此外，佢當然有 7 級美顏功能，亦好似 LG G 系手機咁有手勢快門功能，只要擺出 V 字手勢或者向著鏡頭揮手，就可以 selfie，自拍連制都唔洗襟。
▲而且設有手勢快門功能，只要擺出「拜拜」或「V 字」手勢，就可以啟動自拍快門。
主鏡頭試相（按圖可瀏覽原相）
相關文章:
大專手提電腦優惠計劃 2024 各電腦品牌學界獨家優惠 聯想 Legion Y700 (2024) 現身 旗艦級配置遊戲平板
金屬邊框有少少界手
至於手感方面，VIBE Shot 在中階手機上都算係落足「重本」，除之前提過前後均採用強化玻璃外，機身邊框都採用咗金屬物料，摸上手都幾 grand（但其實條邊同 iPhone 5 / 5s 都幾似……）。另外，VIBE Shot 採用了 5 吋 1080p 熒幕，而且兩側邊框都算幼，機身又算幾薄（只有 7.6mm），所以單手操控都幾容易。唯一缺點係條金屬邊框都有少少界手而已。
▲採用金屬機邊，grand 係幾 grand，不過就有少少界手。
▲SIM 卡及 microSD 記憶卡槽均是設於機身左側。
▲SIM 卡槽位於較接近機頂位置，可見支援雙卡雙待。
▲而較接近機底的就是 microSD 記憶卡槽。
熒幕質素唔錯可視角度高
至於 VIBE Shot 的熒幕，就採用了 5 吋 1080p 解像度熒幕，質素來講係 1080p 熒幕上都算唔錯，顏色自然微微偏黃，但唔算好明顯，睇落都算舒服。至於可視角度方面，從側面睇亮度又無乜大變，但熒幕色溫就轉變了，只屬一般。不過咁：二千零蚊嘅機來講，收貨啦！
▲採用 5 吋 1080p 熒幕。
▲有輕微偏黃情況，但尚算可接受，而且清晰度都幾高。
▲用來睇片真係幾唔錯！又清顏色又算自然。
▲可視角度只屬一般，從側面睇泳池顏色明顯改變了色溫。
效能足夠日常需要
最後提提 VIBE Shot 的效能，佢採用咗 Qualcomm Snapdragon 615 八核心中階處理器、3GB RAM、32GB 儲存空間，還支援雙卡雙待及以 microSD 記憶卡擴充儲存空間，中階機來講算係幾唔錯。而用安兔兔評測測試此機，獲得 39,344 分，算係中規中矩，雖然唔算好高分，但應付日常需要（例如：玩 Facebook、WhatsApp、Instagram 等），同埋間中玩下小遊戲，絕對夠用有凸。佢仲支援埋 4G LTE 網絡，性價比其實都幾高。
▲二千幾蚊的手機有接近 4 萬分的成績，好好架啦！
▲Lenovo Vibe Shot 的硬件規格。
Edward：「價錢合理相質勝預期！」
整體來講，Lenovo VIBE Shot 嘅表現真係幾唔錯，唔止效能上對得住佢二千幾蚊嘅機價有餘，而且機身設計都幾吸引（唯一係機背比較易痴指紋同埋機邊比較界手），唔講人哋都未必知呢部係中階機而唔係旗艦手機，加上影相質素都有番咁上下，用來係 Facebook、Instagram 上面分享絕對綽綽有餘。如果大家想買番部靚靚仔仔、功能唔會比旗艦手機差好多，售價又唔貴嘅後備機，VIBE Shot 都係一個唔錯嘅選擇！
售價：$2,699
查詢：BrightStar（8118 0800）
相關文章:
大專手提電腦優惠計劃 2024 各電腦品牌學界獨家優惠 聯想 Legion Y700 (2024) 現身 旗艦級配置遊戲平板
分享到 :
最新影片
