雖然今時今日，唔少人影相拍攝都係一部手機就攪掂，貪夠晒方便又唔洗拎咁多鏡頭、腳架同閃光燈，但始終對拍攝有要求嘅專業攝影發燒友，一部專業嘅單反相機無論喺質素、連拍速度以至功能上，都並非一般手機或 DC 可以媲美，1DX 初代在香港落地的售價是 $51,800 ，如今第二代售價差不多便宜了一萬元，更加抵玩。
2,020 萬影像感應器
Canon 近日正式發布下一代旗艦單反機 EOS 1D X Mark II，為上代 1D X 的升級進化版。當中配備了 Canon 自行研發新一代 Full Frame COMS，擁有 2,020 萬像素，聲稱可以提升暗位嘅雜訊控制，就現場所看到嘅測試相，在 -3ev 情況下拍攝一張相片，透過後期推光下，雜訊表現確實較上代 1D X 改善不少，適合燈光不足情況下，例如影夜景或暗角，都可以先拍攝再用後期處理方法「執返光」，但保持到相片嘅一定水準。為咗應付唔同環境需要，好多時都會推高 ISO，1D X Mark II 就支援標準 100-51200 嘅 ISO 範圍，更可以擴展至最高 ISO 409600，足夠應付任何最惡劣環境。
▲ISO 最高可推至 409600 相信就算全黑環境下都依然可以影到相。
最強 61 點 f/8 光圈自動對焦
用得 1D X Mark II 級數嘅單反機，好多時都會有好多唔同構圖想法，要更精準捕捉相片中嘅人同物，好多時要依靠對焦點，今次 1D X Mark II 雖然同 1D X 同樣喺 61 點對焦，不過今次就算將光點 Set 到 f/8，都依然可以用到全部 61 點，就算用長鏡再加埋 EF 1.4 III 或 EF 2x III 放大器，都完全唔會減少對焦點，呢方面確實有好大改進，唔會因為要大光圈就放棄對焦點，喺構圖上會更方便。
▲內建 GPS 功能對於唔少專業旅行 Blogger 就非常有用，可以自動記錄每張相片嘅拍攝位置。
最高連拍每秒 16 張(限新電)
要捕捉最精彩一刻，加上現時影相都改用數碼化，基本上都唔會好似以前咁要計過度過先影，而連拍就可以先對目標「開一輪機關槍」，之後再慢慢揀張靚相出嚟。EOS-1D X Mark II 就喺連拍速度上再進一步，透過觀景器可以有最高每秒 14 張連追焦，如果用 Live View 就可以提升至每秒 16 張，較上代每秒 12 張/14 張再有提升，親手試過每秒 16 張連拍確實喺相當有「快感」。不過要注意就係，如果要有每秒 14 張/16 張連拍，官方話一定要用返新果粒電先得，如果用返 1D X 果粒電雖然無問題，但連拍速度就會跌返落去。
▲提升至最高每秒 16 張連拍，真喺就咁聽快門聲都值回票價。
荷李活級 DCI 4K 拍片
今時今日就連專業級單反都加入 4K 拍攝，EOS-1D X Mark II 就可以支援電影標準嘅 DCI 4K@50p/60p，解像度為 4096 x 2160，較一般嘅 3840 x 2160 可以拍攝到更多畫面，呢個設計對於後期製作就好有用，因為有空間可以用喺影片剪裁上，就算再放返落一般 4K 電視播都仲可以做到點對點。加上拍片時更可以直接透過 Live View 熒幕進行觸控對焦，咁要拍攝唔同場景或動作都更方便。而且機身內更有導熱管，減少拍攝短片時因過熱而出現停止的機會。
▲機身上大部份按鈕位置都無大變動過，對於有用開 1D X 嘅用家絕對可以即時上手，只要熟習位置後，唔睇都一樣可以快速轉 Mode 等等。
支援 CFast 2.0 拍片再無限制
今次呢部機仍然採用雙記憶卡設計，當中為 CFast 2.0 以及 CF UDMA 7 標準，採用 CFast 2.0 嘅好處在於用上 exFAT 檔案格式，拍片時就唔會再有每條片有 4GB 上限問題。不過計返條數，就算用到 128GB 卡，如果要用最高設定 4K@60p，其實都只係夠拍一條約 20 分鐘嘅片。
▲依然採用雙卡設計，其中 CFast 2.0 對於拍攝 4K 片就更快更無檔案大小限制，但始終用到 128GB 喺最高質素下都只可以影到 20 分鐘。
建議零售價：$42,480（淨機身）
同場加映
1” 高感光 PowerShot G7 X Mark II
除咗旗艦機 EOS-1D X Mark II 之外，同場更發布咗 PowerShot G7 X Mark II，呢部機用咗全新 DIGIC 7 影像處理器，配上 1” 特大高感光 CMOS，加埋特大 f/1.8 光圈同埋 4.2 倍光學變焦，對於想輕便上路嘅人嚟講，呢部機仔就相當合適。加上佢個熒幕仲可以 180 旋轉，就算要自拍都一樣無乜難度，最重要就喺呢部機可以透過 USB 充電，萬一出街影影下無電，只要用「尿袋」就得。
試相
▲ISO 200 / f11 / 1/80s，自動模式下顏色同亮度都算準確。
▲ISO 200 / f2.5 / 1/5s，淺景深效果相當明顯，顏色及細緻位都相當出色。
建議零售價：4,980
查詢：Canon（2781 1780）
分享到 :
最新影片
