1996 年嘅科幻大片《天煞地球反擊戰》，終於係相隔廿年之後返嚟啦！今次續集《天煞地球反擊戰：復甦紀元》不但同上集係時間軸上接軌，而且有唔少主要角色回歸（除咗 Will Smith 因為片酬問題而角色「被殺掉」）。作為災難片嘅經典作，觀眾都非常興奮﹑期待續集；但另一方面，續集《復甦紀元》係上映前已經受到影評人一致唔睇好。咁到底呢部經典災難片續集最終會唔會變成災難呢？

相隔廿年 續集整體水準有所提升

續集《復甦紀元》最明顯嘅進步當然就係場景同 CG 效果（畢竟「廿年前 VS 廿年後」水平真係差好遠），地球被外星人母艦摧毀﹑吞噬嘅特效都做得相當好，而劇情方面亦就上集問題改進了不少。不少觀眾對於上集最深刻嘅印象來自於後半段總統演講嘅人物戲碼同各平民英雄角色嘅塑造，而今集仍然會有類似嘅情節，無令觀眾失望。而且今次仲加入咗更多嘅情感戲，上集主打親情牌，而今次續集則由親情﹑友情到愛情，甚至係同志情都有。呢啲情感戲雖然都只係故事支線，但對豐富災難片劇情加分不少。

加入唔同國藉種族角色 唯中國置入式廣告非常突兀

上集被人詬病嘅大美國主義問題亦係今集得到解決。《復甦紀元》加入咗唔同國藉種族嘅演員，包括我地都非常熟悉嘅 Angelababy ﹑新加坡演員黃經漢以及黑人 Deobia Oparei 等。尤其係 Angelababy 同 Deobia ，兩位係今次續集戲份都相當重。今次《復甦紀元》試圖打造人類四海一家﹑一致向外﹑We are all in this together 嘅氛圍，亦都算非常成功。不過，今次續集嘅置入式廣告雖然並唔多，但就非常突兀，而且都係來自中國嘅蒙牛同 QQ ，可能會令部份觀眾反感。

總結：「睇《天煞》為回憶」

其實今次《復甦紀元》整體而言水平都係合格之上嘅，雖然細節位真係有啲失敗同置入廣告太突兀之外，劇情﹑人物戲碼﹑場景同 CG 各方面都做得都算唔錯。不過，《天煞》嘅魅力已不再：廿年前呢類電影並唔多，而且當時對總統同其他平民角色塑造成英雄確實係幾激勵人心，到今日依舊賣大美國英雄救世主主義，經過廿年嚟到 2016 年就變得有點 cheesy 了。加上係呢廿年時間嘅沉澱中，近年市場不乏同類型嘅好電影就如《第九禁區》，確實會有將《天煞》比下去嘅感覺。

如果係以前有睇第一集，我會覺得續集仍然值得睇，因為呢套經典絕對係影迷嘅集體回憶之一

【以下有劇透！】 

.

.

.

.

.

.

.

.

.

.

..

.

.

.

.

.

.

做大戲不拘小節？講古勿駁古

雖然筆者話《復甦紀元》比上集改善咗，但電影細節位依然問題多多，筆者就同大家逐一數數（若然仲未睇嘅讀者，記得跳過呢段以免睇到劇透）：

主角有不死身設定還可以，但有一幕係男主角 Jake 揸住拖機同 David 等人一齊睇住外星人母艦點樣吸走地球上所有嘢嘅時候，拖機竟然好似有防護功能咁可以郁都無郁？另外，自稱為「外星母艦唯一的最大威脅」嘅外星種族 – 球體，係成套戲入面除咗做餌引女王過嚟之外，並無真正幫過手；雖然最後有用球體蘊藏大量最新科技埋下第三集伏線，但係今集嘅作用說得上係零，砍掉都唔會對劇情有咩影響。

有一段更誇張，總統揸住轟炸機衝入女王母艦要用炸彈同佢同歸於盡，然而女王自己本身亦有防護罩所以絲毫無損；但之後總統個女 Patricia 好憤怒咁用轟炸機尖叫掃射幾下之後，個防護罩就咁玩完。um… 會唔會兒戲咗啲？

分享到 :

最新影片