港女科技一週:探索被流放 20 年的「機場核心計劃」展覽中心

讚好此文:

六月 24, 2016 •數碼港女週記, 獨立評論

上星期趁好天,港女同朋友仔去咗深井嗰頭行山,呼吸一下新鮮空氣,同埋欣賞下自然景色。回程的時候,沿住青山公路行下行下,見到個路牌寫住轉個彎有「機場核心計劃展覽中心」喎!唔知有幾多位讀者有聽過呢個地方呢?港女孤陋寡聞,雖然好鍾意行博物館,真係第一次見到有個咁嘅地方,好奇心驅使之下,就同朋友過去睇下喇(冇野睇最多咪當去個廁所洗下面囉?)!

IMG_6634

我地真係好好彩,原來個館星期日係收六點半!唔入去尤自可,入到去都發現幾多驚喜!

首先,一入去,個冷氣好猛 呢個館嘅工作人員係極親切,唔知係咪個 reception 係瑟縮一角,驚我地睇唔到,兩個叔叔大大聲同我地講「歡迎光臨」!可能我地冇諗過入面會有人(因為成條路真係冇乜人,嗰個位又冇車到),我覺得有少少受寵若驚…

個展館其實好細,室內的地方唔使 10 分鐘就行完。有咩睇?係入面,彷彿時光倒流至未回歸/剛剛回歸的香港,即係差唔多 20 年前。

IMG_6647

其實成個展館就係講緊 1989 年香港政府推出的「玫瑰園計劃」的一個 功績 資料館。入面的展品及史料就係講「玫瑰園計劃」當中十大工程項目,例如有機鐵、三號幹線、西隧等。

但呢個館亦好明顯係一個俾人流放咗 20 年的地方,因為入面提及的十大工程項目,有不少都已經唔同晒,例如當年話要發展的東涌新市鎮,今日除咗有公屋之外,已經發展埋豪宅、酒店、旅遊景點等,但喺呢個時光停留係 20 年前的展館,連沙士都未發生,一切都彷彿仲係幾美好。

IMG_6639

話得係 20 年前的功績資料館,就當然唔好 FF 入面啲模型展品曉飛曉郁有互動喇,10 個掣入面有一半都係唔著燈都唔係好出奇啦。

IMG_6640

想下當年都幾好丫。

但驚喜仲未完架,室內部分就話冇野睇啫,佢選址其實都好有心思,室外上下兩層係有靚景睇架,180 度大海景之餘仲可以同時睇到汀九橋同青馬大橋。港女去的當日天氣極好,能見度極高,用瞭望台個望遠鏡睇,甚至連機場控制塔都睇到。個景咁靚,我諗一定會有影相發燒友發掘到呢個地方,所以佢先棟咗個牌出黎話:「切勿進行作商業用途的攝影及錄影(包括婚紗攝影)」,港女見到真係笑咗。

IMG_6652

(左)汀九橋,(右)青馬大橋

IMG_6646

唔俾婚攝個 Part 係特登貼上去架囉。

呢個迷你展館仲有一個驚喜,就係呢棟建築物原來屬於香港三級歷史建築,有相當歷史價值。不過展館入面係冇講架囉!港女都係自己唔覺意查到:機場核心計劃展覽中心的主建築原為「霍米樓」(Homi Villa),又稱「白樓」,由律敦治在 1930 年代選址於深井興建香港啤酒廠時,在附近青山公路購地興建的白色別墅。後來被香港政府購買,更改作用成為香港公務員宿舍。財政司夏鼎基 1973 年起曾經入住別墅,1995 年擴建後才變成今日的展館。

展館外有一個「香港工人死難紀念碑」,用以悼念興建赤鱲角機場時殉職的 49 名工人,及於 1989 年至 1998 年因為工業意外而不幸喪生的 2,291 名工人。唔知港珠澳大橋落成之後會唔會都有類似嘅野呢?

IMG_6651

左上個兩個人好有 feel XD

臨走的時候,港女好奇想知道呢個展館係咩政府部門負責睇,點解可以保存 20 年前的氣息咁犀利。朋友就估係康文署,因為大部分展館都係由康文署負責,我就估機管局,因為同機場有關。但係答案竟然係民政事務總署轄下的荃灣民政事務處管理,難怪個展館會係咁啦。不過,即使係咁,呢個咁僻的展館都有政府 WiFi 覆蓋,一定係成個館入面最先進的野啦(誤)。
IMG_6653

講真,港女覺得呢個展館非常值得一去,有點隱世,有點神秘,卻因為有管理又非常整潔,仲有無敵大海景,睇日落就最正喇。

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: ,

讚好此文:


Comments are closed.

unwire TV



更多同類文章:

最新文章