LG G4 上星期先係外國發佈，但估唔到短短幾日就已經有水貨登陸香港，畢竟去年 G3 咁多人用，如果大家都好想知 G4 的相機、屏幕表現如何，或值唔值得升級就記得留意這次速試喇！（以下有更多資料。)
外表冇大變 暗藏弧面更貼手
雖說 LG G4 係今年新機，但小編 第一眼見到時就覺得佢同 G3 好似樣，因為機面冇乜改動，而且借來的 G4 是普通膠底殼（皮殼價錢不同），普通人的確未必會知係新機。不過，只要拿起 G4 即使蒙眼都會分得出，因為佢特別地方係用了微弧面設計（機面+機背），感覺跟 G Flex 2 有點似，但幅度就很輕微，而重點是令手機非常貼手，手感比 G3 仲要更好，放褲袋亦更舒服，但重量就覺得差唔多。此外，雖然 G4 機身微微彎曲，但機背底殼仍可拆除，裡面 3,000mAh 電池可替換，兼容 Micro SIM 及可插 MicroSD，而水貨配件設後備電池及充電座，但意外的是 USB 火牛竟然唔係快充（5V / 1.8A），最後裡面還有 Quadbeat 3 耳機，外形更討好，但基於借來的是現貨冇法試聽。
▲ 驟眼睇（尤其膠殼）G4 跟 G3 外表都非常相似。
▲ 機身其實用了弧面設計，放平時可看到屏幕微微向內曲。
▲ 弧面關係 G4 機身會比 G3 稍厚。
▲ 雖然機身厚少少，但弧面設計令拿起感覺超貼手，重量差唔多，單手操作亦冇問題。
▲ 底殼可以拆開，裡面 3,000mAh 電池可替換，而且兼容 Micro SIM 及可插 MicroSD。
▲ 韓水 G4 跟 G3 一樣會跟多粒電池及充電座。
▲ 跟來的 USB 火牛只有 5V 1.8A 輸出，即不支援快充功能。
▲ G4 會跟外形更靚的 QuadBeat 3 入耳式耳機。
Snapdragon 808 冇咁熱 3GB RAM 夠鬆動
自從 G4 公佈用 Qualcomm Snapdragon 808 後，感覺跟 Macbook 話用 Core-M 咁性能飽受質疑。當然質疑唔係冇道理，因為 Snapdragon 808 只有 6 顆核心，其中高性能 A57 只有 2 顆，如果同 Snapdragon 810 相比，內置 GPU（圖像處理器）還要更弱，這點同 Snapdragon 800 同 801 時僅時脈快慢差距更大。在 Antutu 測試中就錄得約 49,000 分，成績比 Snapdragon 801（G3）更高，而且運行 Antutu 時亦只是微暖。此外，G4 還配備了 3GB RAM 及 32GB 儲存空間，閒置時都有約 1.7GB Free RAM，這點比 G Flex 2 輕鬆一點。
▲ 搭載 Qualcomm Snapdragon 808 處理器及 3GB RAM，於 Antutu 錄得約 49,000 分，成績比 G3 高，但比 S6 Edge 或其他 Snapdragon 810 機種就稍低。
▲ 內置 3GB RAM，閒置時大約有 1.5GB – 1.7GB Free RAM。
▲ 內置 32GB 儲存空間，但實際可用只有 21GB 左右。
▲ 預載 Android 5.1，版本拍得住 Nexus 親身仔一樣咁新。
▲ 新增了 Smart Bulletin 其實即是在桌面最左頁加入內置 App 的快折清單。
▲ 小編 試了約 5.5 小時，又 Antutu 、睇片又「開著芒」，電池消耗了約 35%，續航力好像不錯 ！
相關文章:
Samsung OLED 電視機 今年將使用更多 LG WOLED 面板 Meta、LG 合作 Quest Pro 2 項目 挑戰 Apple、Google、Samsung 頭戴裝置
新 2K 屏幕 比 G3 更偏藍
試完手感當然要「著芒」睇下，小編 第一眼就覺得畫面好鮮艷，感覺同 G3 好唔同。這次 G4 用的是 IPS Quantum Display 屏幕，之前都提過色域同亮度比之前強，為了睇真邊個屏幕最靚，小編 就找來 G3（第一代 2K 屏幕）及 S6 Edge（S-AMOLED 2K 屏幕）同 G4 比較一下。不過，意外地 3 款屏幕白色顯示 G4 竟然最差！三部機裡面 G3 少少偏藍，S6 Edge 白裡少少偏黃，但 G4 就明顯比 G3 偏藍。至於播片，G4 效果比 G3 鮮艷少少，藍色及綠色會更出，而 S6 Edge 就會色彩會更濃，黃（紅）、藍綠色比 G4 更鮮艷（黃甚至 Over 了），但效果似 TV 咁最搶眼。其他方面，G4 亮度只係比 G3 光少少，但打斜睇亮度仍是會下降，論視角度 S6 Edge 幾乎是完勝。另外，小編 亦發現 G4 顯示白色時隱匿會看到橫紋，這個情況 G3 都有少少（會看到十字紋）。
▲ G4（右）跟 G3（左）比較下，兩者都是偏冷色，但 G4 就會較藍。
▲ 把 G4（左）同 S6 Edge（右）比較，就會看到 S6 Edge 偏暖微黃，而 G4 就明顯地偏藍。
▲ 播片時 G4（上）跟 G3（下）色 Tone 其實很接近，但 G4 的藍色及綠色會鮮艷一點。
▲ G4（上）跟 S6 Edge（下）比較，G4 會冇 S6 Edge 咁鮮艷，灰階亦較高，但 S6 Edge 全部顏色都會好濃，甚至黃色過火。而兩機拍埋 S6 Edge 會較搶眼一點。
▲ LG IPS 屏幕向來出名可視角度，但 2K 屏幕去到 G4 打斜仍是會變暗，相反 S6 Edge 就冇這個問題。
相機大進步 有手動更好玩
這次 G4 焦點還有相機，主鏡頭升級至 1,600 萬像素，內裡用了更大感光元件（1/2.6 吋）、F/1.8 大光圈、三軸 OIS 及 Color Sensor，聽到都覺得好複雜，實際試拍 G4 反應跟 G3 唔差很遠，但曝光、白平衡計算就 G4 會較準。不過，佢地最大分別係 G4 相片質素，無論日夜景相片細節都比 G3 更清楚清晰，即使夜景存在「油畫」問題，但小編 覺得 G4 呢次先叫追返旗艦機應有質素，加上今次還加入「手動模式」令 G4 可以好似 K Zoom 咁調整 ISO、快門（1/6000s – 30s）等選項，其中慢快門可讓大家拍攝車軌、星空及 Light Painting。至於前鏡頭，這次 G4 會把它升級至 800 萬像素，拍出來相片仲要唔差（唔開美顏都油畫，但整體感覺比 S6 好少少），純網上分享綽綽有餘！
▲ 日光拍攝下，G4（上圖）明顯比 G3（下圖）更光亮。
▲ 放大後，大家可以看到 G4（上圖）的細節比 G3（下圖）明顯清晰。
▲ 夜傾拍攝，在複雜光源下 G4（上圖）的白平衡比 G3（下圖）更貼近現場。（G3 會偏藍同 Over）
▲ 雖然夜景兩機都有「油畫」問題，但 G4（上圖）的細節是完勝 G3（下圖）。
▲ 拍攝介面跟 G3 幾乎相同，而最大分別係多了手動模式，ISO、快門、白平衡都可隨意調節。
▲ 慢快門可讓大家拍攝車軌、星空及 Light Painting。
▲800 萬像素前鏡頭效果非常唔錯，同 G3 比這個才算可用。（小編 ：讀者對唔住，我要自己試自拍）
小編 ：睇樣似冇升級 用落見真章
這次 LG G4 試了整個下午，由起初覺得 G4 冇乜誠意（個樣冇大變），到用落手感更佳及相機質素大躍進，這兩點隔住櫥窗係唔會察覺到的。加上有得插卡換電，而且機背都叫有皮革底殼來辨識新機，外觀上都叫勉強合格 (One M9)。不過，小編 最失望係 Quantum IPS 屏幕比預期中有落差，冇諗過水準仲未追返 G2 果陣（相信 2K 仍是問題所在），但整體來說小編 評價都好高，要內涵我會揀 G4，要搶眼同性能就揀 S6 Edge。至於 G3 值唔值得升級 G4，如果對相機有要求，我覺得值得考慮（會放大睇），但老規矩都要睇之後價錢（行貨 / 水貨）去到咩水平。
售價：$6,680 (膠殼) / $6,980 (皮殼) (韓水)
查詢：三禾電氣（2374 0618）
相關文章:
Samsung OLED 電視機 今年將使用更多 LG WOLED 面板 Meta、LG 合作 Quest Pro 2 項目 挑戰 Apple、Google、Samsung 頭戴裝置
分享到 :
最新影片
