平時要拍 D 多走動嘅片都係用 Go Pro ，直到上次去鬼屋拍嘢先知一支手持的 Stabilizer 嘅重要。事關我真係太驚，搖到拍出嚟嘅片最後都唔用得。最近賣開航拍機嘅公司 － DJI 新出咗支手持雲台相機，唔單止可以連係手機即時睇，仲可以拍到 4K片添！就得我依莉詩即刻試玩先。
唔使慢慢 set 重心
傳統的 Stabilizer 加上手機後要慢慢搵重心，唔靚的產品會容易左右擺。但呢支 DJI 手持電台相機唔使 SET，佢係電子穩定器再加內置相機，用陀螺儀檢測重心所在自動修正幅度，再唔使慢慢 SET 重心，更可以用連接自己的手機做觀景器
單手可靈活操控
Osmo 雖然結合手持雲台同相機於一身，不過都唔算太重，佢嘅手柄採用人體工學設計，手掌可以緊密貼合，單手拎住都唔覺得攰。如果想控制拍攝角度，只要用手拍公同食指觸碰搖杆，雲台就能自動轉動 360°，操作簡單。另外，仲可以係自拍模式下，以你為中心，自動拍攝 180°全景照片。因為手持雲台有三個軸，所以無論隻手點搖，鏡頭都會自動保持水平，就算唔用腳架，拍出嚟嘅片都好穩定，唔會有雜亂無章嘅感覺，好適合旅行街拍。
▲ 套裝除咗有手持雲台相機，仲有 1個移動設備支架、電池、充電器同手提袋。
▲ 手柄上有齊開關、影相鍵、拍片鍵同搖杆，就算我手指短，但一隻手指公都可以控制到。
▲ 三軸雲台有 3個 lock，用嚟 lock 死相機可移動方向，以拍攝唔同效果。另外，內置高精度感測器同反應迅速嘅無刷電機，所以能夠即時補償相機嘅顛簸同抖動。
拍 4K 片畫質高
呢支雲台另一個賣點就係可以拍到每秒 25幀 4K（4096×2160）超高清視頻、每秒120幀 1080p全高清視頻 同 最高每秒連拍 5張 1200萬像素靜態照片。另外，94° 廣角鏡頭可以拍攝寬闊視野之餘又沒有 Go Pro 嘅變形咁嚴重。不過，每次充電只可以連續拍攝 1小時，如果要長時間拍攝睇嚟要帶多幾舊電。
▲ 微型4/3感測器 同 高速影像處理器令動態範圍更清晰。
▲ 可能我試的是樣本機，所以影相時嘅測光有少少問題，需要自行調校 ISO 同 EV 值，不過拍片就無呢個問題。
▲ 鏡頭後可以插 Micro SD 儲存片同相。
連接手機當取景器
Osmo 內置 WiFi，只要係移動設備安裝 DJI GO app 就可以即時睇到相機高清圖像。配合移動設備支架仲可以當作取景器使用。如果將佢固定係三腳架、加長杆或車載支架上，亦可以透過手機遠距離查看鏡頭畫面，進行拍攝或調整相機角度，非常方便。
▲ 移動設備支架可以伸縮， iPhone 6S Plus 都可以放到。
▲ 手柄上有標準接口，可以安裝三腳架、加長杆或車載支架等。
▲ 摺起其實好細支可以放入袋隨時拎出街。
依莉詩：「拍片好穩定，但用得一個鐘」
以前拍片想穩定都要拎埋腳架出街，鬼死咁重，依家呢支手持雲台又輕，單手都控制到真係夠晒方便。而且 3軸雲台夠穩定之餘，可以拍到多種效果，平時出去記招就啱晒。如果公司肯買番支就好啦，哈哈。不過因為可以拍 4K片，所以好食電，一舊電只係用一個鐘，睇嚟要慳住用。
售價：HKD $5,030
查詢：OTG OnTheGo Limited 創動樂有限公司 (3589 4189)
