港女煲的熱潮係香港一觸即發！Le Creuset 係今個月尾係利東街開設 2,000呎全新專門店，更有星級名廚作免費烹飪示範。我依莉詩當然急不及待去潮聖啦！
兩層彩虹色系專門店
相信有留意的 wire 民都知 Le Creuset 本身係中環有專門店，不過今次利東街專門店開咗之後就正式取代雲咸街專門店，而呢間新店有咩咁特別？就係一個字 — 大！灣仔新店面積逾 2,000呎，共分為兩層，1樓主要售賣各式煲具，而 2樓就係 Le Creuset Cooking Studio ，買完煲再上堂，一條龍服務。店面裝修非常簡潔，白色的層架上放滿彩虹色系的煲具，非常突出。
▲ 灣仔店外牆配合利東街全新的歐陸花園風格，設計充滿法式風情。
▲ 1樓主要售賣 Le Creuset 煲，唔少煲都貼有售價，而且比平時係街買平呢！
▲ 呢 set 春日糖果色系 Powder Pink、Powder Blue 同 Powder Purple 放係店中間，令整間店充滿幸福氣息。
▲ 設計師特意把上層以 Le Creuset 著名的色彩繽紛產品創作出立體的彩虹色調格局，令廚具都變成裝飾品。
▲ Le Creuset 的廚具本身已經色彩繽紛，幾個放埋一齊令廚房變得生動活潑。
4大星級名廚強勢坐鎮 Cooking Studio
專門店只係賣煲又點夠，只要係專門店買滿 $3000或以上(單一發票) 就可以免費參加普通烹飪班一次。如果想體驗完先再買，都可以用 $200 參加新手體驗班，報名費仲可全數換購 Le Creuset 產品。另外，Le Creuset 亦會定期請來 4位專業用家，包括烹飪導師 Hilda Leung、潮流養生食療達人Yoko Tsang、著名飲食節目主持 Christian Yang 同 蛇王芬第四代主理人Gigi Ng 和主廚任錦松師傅，同粉絲分享烹飪技巧。靚煲配美食，諗起都興奮啊！
▲ 雖然話呢間鋪有 2000呎，但 Cooking Studio 的位置唔算大，要 15人一齊睇師傅示範好似有 D 逼。
灣仔店優先發售 Bluebell Purple系列
Le Creuset 每次有新色系都會引起搶購潮，而今次新店開張當然少得限量煲啦！Bluebell Purple 漸變紫將會係 4月22日再次推出，當中 Bluebell Purple單柄鑄鐵鍋及花形鑄鐵鍋更是新店的限定貨品添！唔係唔搶呀？
▲ 今次的 Bluebell Purple單柄鑄鐵鍋和 Bluebell Purple花形鑄鐵鍋均設有花形合成樹脂鍋蓋頭和花形不鏽鋼鍋蓋頭，非常特別。而呢個花形瓷器廚具更加會係灣仔店優先發售限定 100套。
▲ 而 Bluebell Purple單柄鑄鐵鍋更係灣仔店限定貨品添。
發現有趣小精品！
Le Creuset 其求一個煲成千蚊，自問窮到褲穿窿的小編就無錢買了。不過就比我發現到咁 D 煲一樣樣的磁石同煲塞，超級可愛呢！
▲ 呢 D 磁石就好似港女煲的迷你版咁，咩色都有，好得意啊！
▲ 呢 D 煲塞都係超迷你，而且百幾蚊有 4粒，買唔係起真煲可以買嚟扮下嘢！
Le Creuset灣仔專門店
地址﹕香港灣仔皇后大道東200號利東街地下G26號舖及一樓F26A號舖
電話﹕2790 1802
營業時間﹕星期一至日10:00am to 10:00pm
