本來想分享下上星期聽左個同新媒體有關的 Talk，文都已經打好，點知一打完個晚俾我開口中，就出事啦！
本來篇文係想講：
當日個 Talk 有個講者一開場就開左佢個人嘅 Facebook Page 出黎，同大家講：而家的後生仔唔睇報紙唔睇電視，淨係睇電話睇 Facebook 架咋。佢地嘅資訊咪就係朋友度黎囉，你個 friend share 左啲咩，你咪睇咩囉。跟住佢就開始講自己有幾多 like 呀，點樣可以吸引到啲人 like 你啲野呀云云。
＊個人經驗：如果你 Like 左好多 Page，而個啲 Page 經常更新，你又成日 Like 晒個啲 Posts，最後你個 Facebook 就好似冇晒朋友咁，得返啲新聞專欄文章惡搞圖飛機文J圖偽文青Status你想睇嘅野。
席間現場有位觀眾問（唔好理佢係咩背景，你懂的）：啲人成日話政府做唔夠宣傳，唔識用社交媒體，如果叫你俾啲建議政府，你會點幫佢改善？
講者就簡單地答：而家的網絡世界係年輕人主場，如果「老餅」想踏足＆分一杯羹＆滲透意識型態…就要學識佢地的 language，咁先會得到年輕人的認同 同埋混到入去佢地個圈子。
我聽完之後覺得其實並唔係咁簡單，唔係學識 you lum you la 就可以融入到呢個世界，如果一單野係唔 make sense，無論你寫嘅野用左幾多潮語，拍左幾多條廣告，用左幾多明星，最終可能都只會變左潮文。個日跟手返去做左少少 research，上左去政府一站通度睇下政府有乜野 in-house social media，睇睇個問題係邊。隨即發現最多 like 個個係港台（26k+），其次係政府青少年網站（10k+，但係啲 posts 得一兩個，甚至冇 like…），第三先到政府新聞網，仲要得 5k+ 個 like… 但係講真，真係 like 唔落，因為內容實在好唔吸引…利申：有發現過一啲 Outsourced 出去做 PR 的 page 係好睇的，例如大嘥鬼 😀
點知個晚就「出事」啦，政府新聞網的小編出左個 post，宣揚辭職環遊世界的訊息話唔捨得隔離個同事辭職環遊世界，並祝同事旅途愉快。此 post 一出，即令政府新聞網個 page 人氣飆升，一下子由 4 千 like 變左 5 千 like，更惹來大量網民抨擊，話小編將政府新聞網個 page 公器私用，個 post 並無「提供最新的香港特區政府資訊」，跟住愈演愈烈，一大堆指控。
點解大家會有咁大反應呢？
首先，內容方面，我認為係大眾對於政府資訊發放係有期望的。雖然網絡世界嘅野好多時「認真便輸了」，但始終個 page 係代表緊政府發聲，無論資訊幾無聊抵鬧都好，網民都希望透過佢了解政府／官方的最新動向，而個啲動向係會影響到市民大眾，包含公眾利益的，而唔係同政府一向以經濟發展為先唱反調，以葡萄撚的姿態大大隻字打出黎，仲要hashtag＃辭工旅行真開心。當然我暗啞底認同＃辭工旅行真開心。
第二，大家實在怨氣太多鬧慣左看不過眼政府用個咁 casual 的 tone 同大家「傾計」。尤其近幾年，冇商冇量冇傾冇講唔啱咀型的政府，突然用高登仔的口吻同你搭晒膊頭講野，邊個都驚一驚窒一窒啦。政府姿態一向俾人上行下效的感覺，少不免的官腔，用軟性啲的語氣係 ok，但唔係 180 度轉 tone 囉…
所以頭先講，話點解我覺得搞社交媒體唔係「學識個 language」咁簡單，點樣發佈網民接受而又與政府理念一致的內容，拿捏適當的語氣，先係增加 organic reach 的最佳方法。
Facebook／其他社交媒體係塑造形象的一個好好的渠道，好多公司／人都係靠呢啲社交媒體 market 自己，你睇下奧巴馬個 Page 就係活生生的成功例子。咁當然最好你係言行一致啦，post 啲真係發生過嘅野啦，發表一啲真實的感受，因為無論你係社交媒體吹到幾大，最終你的人生都不只於建立係網上世界。
▲形象嘅野，一張相，一句 Caption，得左。Source：Barack Obama Facebook Page
媒體嘅野，新又好，傳統都好啦，萬變不離其宗，都只係傳播訊息的渠道。只係隨住科技及社會發展，多左好多不成文的潛規則，要識玩就先要學懂規矩，了解受眾的取向口味，先拉攏到人心 like 你個 page 架嘛。
