小米早前在北京所舉行的發表會上公佈了不少新產品，當中最值得留意的就必定非紅米 Note 3 莫屬，紅米 Note 3 採用了金屬機身及配備指紋感應器。距離上一代推出只有短短 100 日，究竟佢抵唔抵玩呢？就等我籮文同大家快速試試啦！
金屬機身‧外型升格
上一代紅米 Note 2 走青春路線，用上色彩鮮豔嘅膠背蓋；黎到第三代，最大變化就係點膠成金，飛走膠感。紅米 Note 3 其中一個大賣點就係採用金屬機身設計，雖然並非「全金屬機身」，機背金屬殼採用三段式設計，中央大面積為金屬，而上下兩端則會用上塑膠材料，但整體外型已經升格不少。不過揸上手又厚又重，加上金屬背蓋有點跣手，手感略為笨重。
▲雖然唔係「全金屬機身」，機背金屬殼採用三段式設計，中央大面積為金屬，而上下兩端則會用上塑膠材料，但整體感覺已經升格唔少。
▲上手感覺比較厚身同重身，機背有點兒跣手。
▲機身厚度差不多有一粒 AAA 電。
▲MicroUSB 位在機底。
▲3.5mm 耳機孔在機頂。
▲雙 Sim Card 插槽於左側。
▲左側有音量鍵及開關鍵。
▲機面有銀色邊突顯機身。
加入指紋識別準確度高
紅米 Note 3 另一賣點就是加入指紋識別功能，除可用來開鎖手機之外，亦可支援小米錢包這項流動支付服務。登記指紋需時比其他手機長，需要按壓十幾次，不過可以話一勞永逸，因為解鎖準確度十分高，而且解鎖不需要先按開關鍵，只要直接將指紋按到識別器就可以快速解鎖，速度亦頗快。
▲紅米 Note 3 一大賣點就是加入指紋識別功能，除可用來開鎖手機之外，同時亦可支援小米錢包這項流動支付服務。
▲登記指紋需時比其他手機長，需要按壓十幾次，但係可以話係一勞永逸，因為解鎖準確度十分高。
維持上代熒幕規格
紅米 Note 3 繼續沿用上一代的 5.5 吋 1080p 螢幕，像素密度達到 401ppi ，清晰度算頗高，就算極近距離用肉眼望都未有見到字體有起格情形。而更要一讚的是亮度，紅米 Note 3 熒幕亮度十分高，調到最光的話更有點刺眼，相信就算在烈日當空下使用，都可以清楚閱讀熒幕顯示。而喇叭位於機背，音量較到 70% 左右聲音就開始拆，整體音量夠大聲，但音質只算一般。
▲像素密度達到 401ppi ，清晰度算頗高，亦未覺有嚴重偏色問題。
▲就算極近距離用肉眼望都未有見到字體有起格情形。
▲而喇叭位於機背，音量較到70%左右聲音就開始拆，但整體音量都夠大聲。
千三萬像素鏡頭質素一般
主鏡頭用上 1,300 萬像素感應器，最高解像度達 4,160 x 3,120，雖有高像素優勢，但吸光度低，光圈只有 F/2.2，低光環境下拍照會出現嚴重雜訊問題，而且缺乏 OIS 光學防震，容易有手震導致的鬆郁矇情況，但戶外日光下成像都算可以接受，線條尚算清晰，背光時亦可以使用 HDR 功能彌補暗位。前鏡方面有 500 萬像素，內置低中高 3 級美顏功能，而且預設一個幾無聊的「估你係男定女，同埋幾多歲」功能，不過大家當它「玩玩下」好了，籮文試過極唔準，完全估錯我歲數，嬲呀！
▲後置主鏡頭用上 1,300 萬像素感應器，最高解像度達 4,160 x 3,120。
▲放大可以見到有油畫化問題
▲暗位雜訊問題更嚴重。
▲前鏡方面有 500 萬像素，內置低中高 3 級美顏功能，而且預設一個幾無聊的「估你係男定女，同埋幾多歲」功能，仲要估錯我歲數，嬲呀！
▲亦有不同濾鏡效果。
電量特大用到 10 小時以上
紅米 Note 3 規格不算很高，但都用上 MTK MT6795 八核處理器，亦有兩個型號供大家選擇： 2GB RAM / 內建儲存容量 16GB 或 3GB RAM / 內建儲存容量 32GB，籮文手上的 3GB RAM + 32GB ROM 版本跑安兔兔 v6.0 只跑到 51,550 分，成績只屬一般。但勝在有 4,000 mAh 特大電池，日常使用打機睇片都可以用到 10 小時以上，可以話係長氣王。
▲籮文手上的 3GB RAM + 32GB ROM 版本跑安兔兔 v6.0 只跑到 51,550 分，只屬一般。
▲但勝在有 4,000 mAh 特大電池，日常使用打機睇片都可以用到 10 小時以上，可以話係長氣王。
籮文：「電量十足 抵玩！係影相爭啲…」
依部紅米 Note 3 外型靚唔靚就見仁見智，但係就真係再冇其他手機嘅影子，有獨樹一格嘅感覺。規格來講中規中矩，好彩電量就十足，可以用足十幾個鐘，不過影相就差少少啦，如果你本身有相機，依家只係需要一部手機，依部都諗得過嘅，話晒只係千幾蚊貨仔，算係咁啦。
售價：899 元人民幣起（香港未有行貨）
查詢：小米（3001 1888）
分享到 :
最新影片
