睇完星期六晚港台節目《我係乜乜乜》，再睇昨晚的《勁歌金曲》總選，兩位阿哥叻哥、坤哥年資當然相差得遠，不過將兩件事件放在一起睇，卻讓筆者重新反思什麼才是「叻」。經常認叻是陳百祥的性格，自詡跑馬中三 T，做生意做電視拍電影瓣瓣掂，面不紅氣不喘在節目話黃之鋒唔叻，考唔到 12 個 A，如果年青一點會是 Facebook 創辦人。
在 70、80 年代缺乏娛樂選擇的年代，藝人做電視拍電影唱歌機會多的是，要紅要有代表作要給觀眾留下記憶並不難，看看和阿叻好 Friend 的曾志偉、譚詠麟在電影和音樂方面的成就，就會發現陳百祥無論在音樂、電視、電影都沒有令人讚許的成就，「叻」從來都不是自己讚自己。講一點往事，筆者初出茅廬時正值科網泡沫爆破之前，親眼看著阿叻有份創辦的 StarEastNet 如何營運，如今再聽到他在電視上說年輕一點會是 Facebook 創辦人，我笑而不語。也許 StarEastNet 能夠發掘出樂壇小強 E-Kids 的 Tommy 是最叻的成就。
究竟「叻」是否要中三 T，是否要考 12 個 A，還是 8 大大學爭住收？筆者認為能夠堅持自己的理想，在逆境中用盡方法尋找出路都算「叻」。陳百祥說他除了馬會和財經就不上網，其實網絡世界已經和現實世界不可分開，吳業坤坤哥為了唱歌不介意做二打六角色，不介意做「棋」，在 YouTube 堅持唱歌維持歌手身份，用盡心機接觸網民吸納粉絲。現時藝人要突圍而出，比 70、80 年代難得多，經營自己的事業好比做生意，要拎 1 個獎可能難過攞 1 個 A，大學畢業容易過在 FB、IG、微博、YouTube 有粉絲。hashtag 打錯字「#食好西」都可以變潮語，你話叻哥坤哥邊個真係叻，筆者會認為是吳業坤，除非你喜歡睇麻甩佬著泳褲著豹紋。
分享到 :
最新影片
