用卡通人物做主題的 Pop-up Cafe 多的是，但點都估唔到手機都可以做 pop-up cafe。最近 LG G5 就同香港JW萬豪酒店合作，推出主題下午茶自助餐。今日我依莉詩就急不及待去食過 tea 啦！
貓貓朱古力雕塑好得意
坦白講今次主題下午茶的裝飾就唔多，只有甜品 bar 中間個朱古力雕塑。係樹屋上面坐咗隻好得意的綠色貓貓，唔講真係唔知，原來呢隻貓係 LG 的生招牌。甜品師傅話「因為呢隻貓本身只有 2D版，要想像到佢係立體，再整出嚟用咗好多時間。」
▲ 呢個雕塑全部都係用朱古力做成，甜品師傅話佢地成 team 人用咗兩個星期先完成。睇嚟要好好咁欣賞呢件藝術品。
▲ 隻貓貓表情咁細緻，原來係整個雕塑中最難製作的部份。
▲ 樹屋下有幾部相機同幾個冷球，象徵住 Life’s Good When You Play More。
7款主題甜品重味道
其實今次的主題下午茶主要等 7款甜品，而每一款都加入咗 LG G5 智能手機的特色，就好似手機的超廣角鏡頭同抽換式電池，都放咗係甜品的設計上。你可能會覺得，車，未又係加塊朱古力牌，不過師傅就解釋「我地希望做到有 G5 特色之餘，最重要都係甜品的味道，唔希望只係為影相。」亦因如此，7款甜品有不同的元素，例如芝士蛋糕、馬卡龍等等。
▲ “Life’s Good When You Play More” 招牌松露朱古力
7款甜品中我最鍾意食呢個，70%黑朱古力松露加咗爆炸糖脆脆同咸焦糖之後香濃而不膩，不過中間的樹枝係唔食得架，唔好諗住咬落去呀。
▲ LG G5電池檸檬撻
大家都知 G5 最唔同的地方係可更換電池設計，所以呢個檸檬撻就加咗塊畫上咗電池樣的朱古力，相當搞鬼。味道方面，青檸忌廉同青檸朱古力一層一層，唔會太甜或太酸。
▲ LG 360 CAM全景相機芝士藍莓夾心餅
呢個甜品好搞笑，唔講以為係萬聖節甜品，兩塊雲尼拿餅乾夾住藍莓啫喱同忌廉芝士餡，脆而不乾。
▲ LG G5相機熱情果撻
熱情果撻上面有塊印有相機圖案的白朱古力，除咗象徵 G5 的 135° 超廣角鏡頭，原來都係用嚟中和熱情果吉士的酸度。
▲ 彩色G5貓咪馬卡龍系列 + 調皮 G5貓咪士多啤梨意式奶凍
馬卡龍有多款唔同口味，幸好唔會太甜，可以食多幾粒。而奶凍分有野生士多啤梨，樹莓啫喱及雲尼拿意式奶凍幾層，有酸有甜，刺激味蕾。
▲ 跳躍音符白朱古力慕斯杯
白朱古力慕斯同牛奶砂糖脆脆放滿係黑朱古力杯入面，雖然整個都係朱古力都就有不同口感。
環境寧靜，鹹甜點都有
除咗 7款主題甜品，JW萬豪酒店大堂酒廊的下午茶自助餐仲有鹹食。雖然話係下午餐，不過刺身、乳鴿、麵包、沙律，呢 D 自助餐會有的都有，要食飽並唔難。不過，如果想豪一次，呢度 6月就重新裝修了，要食就要快啦！
▲ 環境開揚，感覺好高級。
▲ 下午茶點少得麵包同三文治。
▲ 冷盤方面有多種芝士、水果用嚟夾火腿食。
▲ 除咗整好的食物，仲有一 D 即叫即整的 pancake 同 生滾粥。
依莉詩：「睇得又食得！」
雖然每款甜品都好好食，自助餐亦有好幾款唔同食物類型可以選擇，呢個價錢合格有餘。不過，如果話要用呢 7款主題甜品去吸引客人，不如話係對食自助餐的客人做 soft sell 好似合理 D 。
LG G5主題甜品下午茶自助餐
日期：2016年5月16日至31日
地點：香港JW萬豪酒店大堂酒廊
價格：星期一至五下午三時半至六時－港幣$258 (成人)，港幣$178 (小童)
星期六及公眾假期下午一時至六時－港幣$338 (成人)，港幣$238 (小童)
星期日下午三時半至六時－港幣$338 (成人)，港幣$238 (小童)
(另加收10％服務費)
