依家新派點心愈來愈多，唔知仲記唔記得，以前細個同屋企人去飲茶成日食菲林型芝麻卷、雞球大包、蛋煎糯米雞呢？得知會展金紫荊粵菜廳即將推出「那些年」即製粵式點心放題，主打懷舊點心，我依莉詩就急不及待去試食啦！
30款即製點心轉住上
今次介紹的放題由有多年點心部經驗的師傅製作，主打多款失傳以久的傅統點心。雖然每日只有 30款粵式點心俾你揀，比起一般酒樓的點心紙少，不過始終係由中菜廳製作，而且係即叫即造，水準點有番上下，並唔係屋邨點心放題的質素。當中除了香濃黑芝麻卷、松茸竹笙灌湯餃、蛋香雞球大包、蛋煎糯米雞及蜂巢芋角等懷舊點心之外，還有笋尖蝦餃皇、手切香菇燒賣、蜜汁义燒包、潮州粉果及迷你紅豆砵仔糕等等巧手之作。
▲ 點心部主廚黃大年師傅，精心策劃了兩組餐單，每組30款粵式點心，款款盡顯師傅心思，令食客吃出懷舊點心真滋味。
食番童年懷舊味道
講到今次的點心係咪同以前一種味，或者我就唔太夠資格講，始終少年我太年輕了。不過以我印象中的蜂巢芋角又真係同以前一樣味，而且更加鬆化添！
▲ 以我印象中的蜂巢芋角入面有好多芋蓉，出面脆卜卜，今次食番又真係同以前一樣味，而且更加鬆化添！
▲ 坦白講，我平時見的灌湯餃都係喺湯入面住浸隻餃，用鐵片上的灌湯餃真係第一次見，一咬落去 D 湯汁出晒嚟，好似食咗隻有蝦的小籠包咁，好豐富。
▲ 蛋煎糯米雞喺酒樓可能未食過，不過以前的粥店都會有。煎香的糯米雞外皮脆口入面保留材料的味道，反而無普通糯米雞咁滯。
▲ 黑芝麻卷同砵仔糕喺街市仲可能買到，不過喺酒樓就愈來愈少見，味道講真就好難唔好食，勝在砵仔糕夠多紅豆咁解。
依莉詩：「唔駛睇大中小點」
雖然話係放題，不過由中菜廳造的點心質素始終有番咁上下，並唔係屋邨點心放題可以媲美。當然價錢都唔太平民，但以灣仔的酒樓 lunch 時間嚟講，星期一至六午市，由 12點可以坐到 2點 45分，算係吸引，相信有唔少老闆請食飯的時候去，起碼已經有上限，唔怕被斬到一頸血。至於點心選擇每日只有 30款粵式點心俾你揀，比起一般酒樓的點心紙少，好似腸粉的款式就唔多，不過可以一件件咁叫，就算少人去都唔駛下下叫一籠，咁就可以試多 D 唔同的款式。另外，呢度唔似一般酒樓咁逼，出面係金紫荊廣場，有自然光，坐得都幾舒服，唔嫌行得遠的話星期六嘆過靚茶慢慢坐都幾好。
「那些年」即製粵式點心放題
日期：2016年 6 月 1日至 8月31日
價格：成人每位 $198、小童每位 $148 (兩位起，另收加一服務費)
地點：金紫荊粵菜廳(灣仔博覽道一號香港會議展覽中心博覽商場)
訂座電話：2582 7728
分享到 :
最新影片
