上星期五，Edward 同大家介紹過正式開賣的 Apple Watch 在使用上初步感受如何，不過功能上的測試，總不能輕試就同大家報告咁求其啦。試了一個 weekend，而家就等小編同大家報告一下啦。
電量超長用逾一日都得！但部 iPhone……
相信大家最關心小編的用後感，肯定係 Apple Watch 粒電究竟可以用到幾耐。官方聲稱可以用到 18 小時，小編未有用 timer 計足由 100% 至 0% 究竟 Apple Watch 用到幾耐，但由中午 12 點開始用，用到半夜 1 點，電量都仲有 50% 以上，所以理論上 18 小時使用應該係計少咗。雖然小編都唔係成日同人玩心跳、畫畫寫字傳情，但用 1 日以上應該係無問題。
▲用了一日，都仲剩番 57% 電量，Apple Watch 的電量其實幾襟用。
另外，小編都試過，只要帶備 Apple Watch 本身的充電線在身，只要接駁外置充電器，就可以隨時為手錶充電，而且速度都幾快，基本上好快就差滿，根本唔洗擔心電力不足。
▲有充電線在身，其實只要駁住外置充電器都充到電。
那麼，故事是否有個完美結局？Sorry 實際上不是！因為小編試了 Apple Watch 兩日，配搭小編自己的 iPhone 5c（對，我仍然是用 5c，盡情笑我吧……）來用，發現大家要擔心的，並非 Apple Watch 本身的電量，而是……iPhone 本身！未知什麼原因，但用了 Apple Watch 後，發覺 iPhone 5c 的耗電速度，比未用之前快了最少 20%！以前 5c 的電池都勉強用到一日，但有一日用，下午 2 點左右還有 100%，但去到晚上 10 點半左右，已經得番唔夠 20%！由此可見，大家與其擔心 Apple Watch 無電，都係顧住 iPhone 的電夠唔夠用好過啦，畢竟 Apple Watch 無咗 iPhone，等於廢了大半武功……
▲其實 Apple Watch 唔算哂電，反而長期駁住 iPhone，令小編的 iPhone 5c 耗電量比平時最少快了 20%。
防水功能唔錯！運動 + 沖涼戴住都得
另外，據 Apple 官方表示，Apple Watch 的防水性能達到 IPX7 級數，究竟代表可以做得咩？基本上落雨無擔遮、又或者洗手個時水花濺上錶身，都唔會有問題。小編為咗再試盡啲，決定全日 24 小時，包括平時工作、食飯、行路、搭車、跑步、甚至去廁所、沖涼、瞓覺都戴住。尤其是沖涼個時，就算用花灑沖水、甚至梘液濺上錶身錶面，沖完涼後只要用毛巾抹乾就得，完全對 Apple Watch 本身無任何影響。所以，大家粗用日戴夜戴就可以了，唔洗就住就住。不過 Edward 提提大家，雖然小編試過沖水或者戴住沖涼都無事，但如果大家的水喉或者花灑水壓太高，都有機會令 Apple Watch 本身機能受損的。所以如果個水喉或者花灑有呢個情況，就建議大家都係除咗隻 Apple Watch 先洗手或者沖涼啦。
▲係水喉下面，就算洗手時沖到水，Apple Watch 運作上都無問題。
▲就算戴住沖涼，係花灑下面沖，都唔影響 Apple Watch 運作。
鋁錶玉 + Ion-X 玻璃錶面又幾耐用
至於錶身方面，Edward 手上的 Apple Watch Sports 版用了 7000 Series 鋁合金物料製造錶玉，而錶面就採用了 Ion-X 玻璃，這款玻璃一般是應用於製造穿梭機或高速火車的玻璃，所以耐用度理論上係好高。而事實上，小編無貼任何保護貼的情況下用了兩日，無論錶玉定係錶面玻璃都唔見有明顯刮花痕跡。加上前面提過擁有生活防水功能，所以大家用個時真係可以粗用唔洗就住就住了。
▲基本上戴住成日，錶面同錶玉本身都唔會咁易花，其實幾耐用。
Never miss a message！
好了，講了本身設計上的用後感，就等 Edward 再講講 Apple Watch 在使用上的體驗啦。智能手錶，相信最重要都係收 notification。用了兩日，Apple Watch 基本上未試過 miss 任何一個 message，而重點唔只係肯定傳送到去 Apple Watch 度俾小編睇，而係伴隨著 message send 到，手錶會輕微震一震作提醒，呢個設計確實令小編唔會錯過任何重要訊息，係抵讚嘅。
▲每次有 notifications 提示傳送到 iPhone，Apple Watch 上面都會收到，而且都會震一震，基本上唔會錯過任何訊息。
齋睇無得覆要等 update
不過上面提及的好處，只限不會錯過「收到」任何訊息，可能有些程式仍然未更新到啦（例如：WhatsApp、Facebook Messenger 等），變成得個「睇」字，要回覆對方仍然需要返去手機度打字或者講 voice message，而唔可以直接係手錶度用 voice message 回覆。雖然呢個缺點係 APP 未更新的問題，對於 Apple Watch 本身來講係「非戰之罪」，但使用起來始終唔夠方便（暫時應該只有 wechat 可以 send voice message 同貼圖、LINE 可以 send 貼圖）。希望港人常用 APPS，好似 WhatsApp、Facebook、Facebook Messenger 等可以盡快支援啦。
▲小編試過港人常用的 WhatsApp 及 Facebook Messenger，都只可以係 Apple Watch 上面睇收到的信息，而唔可以覆。
▲至於另一個港人常用的程式 LINE，就只可以用貼圖回覆，而且還要係 Apple Watch 入面 進入LINE APP 先可以做到。
▲至於另一個港人常用的 Wechat，收到訊息時就可以進入程式，以語音輸入文字，又或者用貼圖回覆對方，算是比較全面。
心跳傳情必須雙方加入朋友清單……
另外，Apple Watch 的另一個幾好玩的功能，就係可以同其他擁有 Apple Watch 的朋友，用畫畫、輕點、甚至心跳傳情。說實在，呢個係幾過癮的功能，不過就純玩樂為主，小編覺得係咪溝到仔 / 女或者討得心儀者歡心，還是要靠實際行動。不過呢項功能最麻煩的是，要雙方都將大家加入自己 Apple Watch 的清單入面先至用得到，亦即係話如果要玩，你一定要先通知對方將自己加入清單，而清單又得 12 個 slot 俾大家揀，似乎少咗啲。另外，要通知咗對方先有得玩，就好似無咗啲驚喜（因為對方都知你會 send 咩出來）。如果可以對方唔洗加自己入 list 都睇到，咁就好玩好多了。
▲首先要雙方都將對方加入至朋友清單，先可以玩到心跳傳情。
▲然後在 Apple Watch 上面禁錶右側下面粒制，就可以叫出朋友清單。
▲進入後，點按中間的按鍵，就可以玩了。
▲輕點就可以畫出線條，亦可以寫字畫畫。
▲而用雙指大力按住熒幕，就可以將自己的心跳傳給對方。
運動測試效果唔錯
Apple Watch 的另一項重點功能，就係運動功能，呢樣亦係 Apple Watch 幾主打的功能，唔止可以透過運動量計住大家每日消耗了幾多卡路里，亦會計算運動了幾耐，最特別係「站立」指數，即係指大家每日有幾多次長時間坐下之後會站起來，等好似 office 工作為主的小編，唔會長期坐住，責住個「大肚腩」一世。
▲介面來講都算幾靚。
至於運動效果方面，其實小編之前都試過其他智能手錶，都不約而同遇到一個問題：就係將平時慢行路都當了運動，結果就係每日運動量都好似好夠，但實際就效用不大；而 Apple Watch 的運動就有所分別，只有大家快步行或者真係跑步個時，先會計算為運動。為了測試係咪真係咁有效，小編星期六就出咗去行了成日，結果夜晚番到屋企，只係發覺 Apple Watch 紀錄了一整天小編只係運動了 10 分鐘（設定運動時間為 30 分鐘）！小編估計應是跑步追巴士或者趕時間快步行個時，Apple Watch 先計算為運動。小編為了證實真係有效，而唔係未同步數據，所以夜晚特登落樓係停車場跑了 1 分鐘步，結果 Apple Watch 又真係感應到又計算在內。從呢一日的測試，小編就知道 Apple Watch 確實對計算運動效能有幫助了。
另外，Watch 其實入面都有一個叫做體能訓練的 APP，只要大家係入面選擇適合的運動，手錶就會準確計算步數、距離、所耗熱量等。而且運動都好廣泛，唔止有戶外跑步、步行等，仲有單車、划步、划船、跑步機等，而跑步、步行同埋單車，仲有分室外室內之分添！呢方面，確實令小編不得不佩服 Apple 的細心。
▲運動細項個度，唔指分得好仔細，仲有室外室內之分。
▲當選擇運動後，可以選擇用咩來做目標。
▲當選擇開始後，就會進入 3 秒倒數，然後就可以開始啦！
總結：魔鬼在細節！
最後，就等 Edward 總結一下整體感受啦。其實在體驗上，小編覺得 Apple Watch 係一隻睇落平平無奇，但實際用落係造工一流，而且會「用上癮」的智能手錶，因為好多 Apple 的魔鬼式「細心」，其實係細節裡：手錶如果一直戴在手上，就算熒幕關掉，只要抬起手臂，就可以繼續使用；但如果除下手錶，再拿起或戴上時，就需要輸入密碼，加強保安功能。此外，在 APP 介面中，只要將想使用的 APP 移至熒幕中央，再轉它的旋轉按鍵，就一定可以開啟該 APP，永遠不會開錯。另外，心跳偵測率上，小編亦拿來心跳計及另一隻可量度心跳的智能手錶比較，發覺 Apple Watch 的偵測表現都算唔錯，準繩度都好高，唯一係慢了一點而已（其他手錶幾秒就量到，Apple Watch 就要大半至一分鐘左右）。
▲心跳偵測效果都算幾準確。
▲只要除下手錶，就需要輸入密碼；但如果長期戴住手錶，就唔需要再輸入密碼，呢方面係幾體貼。
當然，Apple Watch 亦非完美，例如之前提過，會令 iPhone 耗電量大幅上升，而且錶面一係就好睇但顯示內容少（例如：米奇老鼠款），一係就太過實用（多資料顯示但介面唔靚）。唯有希望第日可以係 App Store 買到更多錶面，iPhone 耗電問題亦獲解決，咁 Apple Watch 又真係好用啦！
▲其實 Apple Watch 可以揀的錶面唔多，而且靚的唔夠實用，實用的又唔夠位顯示資訊。
▲好似米奇個錶面，就只可以有一個位選擇顯示咩資訊，結果顯示得日期就唔可以係運動個時顯示清耗了多少卡路里。
分享到 :
最新影片
