除了 Mac OS X 及 iOS 外，Apple 在今年的 WWDC，亦推出了全新的 Apple Watch OS：watchOS 2。究竟這個新智能手錶 OS，用起來又覺得點？Edward 就係 Apple Watch 上面安裝咗，而家就同大家分享一下試用了一日之後的感受啦。
唔窒但有 bug 會自動重啟
首先先講使用體驗吧。整體來講，watchOS 2 流暢度其實同上版本 1.0.1 差唔多，係 Apple Watch 上面基本上唔覺有任何窒的情況。不過穩定性方面就差好多，一日內唔止試過無故自動重啟或 hang 機數次（最少 4、5 次），而且錶冠按鍵似乎太敏感，有時按一下不是 quit APP 或者進入 APP Home 介面，而係啟動了 Siri（此情況一日內試過 5 次以上）。這些 bugs，係 1.0.1 版本時是未曾出現過的。當然，現在 watchOS 2 仍只是第一個 beta 版本，理論上正式推出時，應該會大幅改善的，但如果大家討厭不穩定，就建議唔好裝了。
▲正用 Siri 講開始跑步的指令，點知 Apple Watch 就自動重啟，仲要出現呢個 format 後還原備份的畫面，真係嚇死人咩！
終於可以自設錶面！Time-Lapse 確很耗電
watchOS 1 給予 Edward 的最大感覺，就係所有功能都唔錯，但最「難頂」係唔可以自設錶面，結果一街都係米奇老鼠或者指針簡約錶面，感覺都幾悶。係 watchOS 2，就加入了自設錶面功能！當然，佢未至於好似 Moto 360 咁可以每項細節均自行設計，但預設錶面已經可以設定指針顏色、標示詳細度、顯示資訊種類等（Apple 還開放 API 讓 developer 可以將自己程式的資訊加入至供用家選擇的選項中，可預期未來會有更多資訊可以俾用家按個人需要選擇顯示係錶面，讚！），而喜歡用自己相片做背景的用家，亦可以用 Photo Album 錶面（Photo Album face）或者在 Apple Watch 的照片 APP 中自選一張相片（Photo face）來設定為錶面背景。
▲要做 Photo 錶面，Apple Watch 預設是以喜好項目作同步相簿的，而大家要將相片同步到 Apple Watch，就要先係 iPhone 入面，係打算做錶面的相片下面按下心心。
▲之後，係 Apple Watch 開照片 APP，然後揀到想做錶面的相片，大家亦可以用錶冠裁相。
▲之後大力按在熒幕上，再選擇「Create Watch Face」。
▲自製相片錶面完成了！
▲如果有多張相片，可以係轉錶面介面揀 Photo Album。
▲之後 Apple Watch 就會自動隔一會轉一轉背景相片了，當然大家要多過一張相片放係「喜好項目」相簿，並已同步到 Apple Watch，佢先識轉啦！
▲至於其他內置錶面，都多咗介面俾大家揀，就好似呢個錶面，連時間刻度風格都有得揀。
▲有啲就連錶底或者秒針的顏色都可以自行設定哩！真係似足 Moto 360。
當然，最吸引的肯定係加入 Time-Lapse 錶面（Time-Lapse face），提供 5 個城市，包括：香港、倫敦、麥克湖（Make Lake）、紐約及上海俾大家揀，呢項功能就連 Android Wear 都仲未做到！不過，用 Time-Lapse 做錶面，就唔可以設定顯示資訊種類，而且最重要的係：真係好哂電！以前 Apple Watch 用一日都仲有最少 35% 至 40% 電剩，但用了 Time-Lapse 錶面後，就只剩下 5% 左右！所以大家如果想「型」，就要記住帶埋充電線同外置充電器出街，隨時為 Apple Watch 充電了。
▲Time-Lapse 錶面就無得俾大家自設啦，不過 Apple 都有 5 個城市俾大家揀。只要進入錶面選擇介面並揀 Time-Lapse，之後點按「自訂」。
▲然後就可以係 5 個城市之間揀啦。
而家就一次過俾大家睇 5 個 Time-Lapse 錶面的效果啦。
影片製作中……
相關文章:
【實測】Apple Watch 即時翻譯旅行超方便 20 多種語言任選 + 即時出翻譯結果 Apple 為 Snoopy 迷送上聖誕禮物 Apple Watch 錶面和 Apple TV 4K 螢幕保護程式 網傳小米正研究方案 讓 Android 手機能對應 Apple Watch
查一日前、後日程超方便
另一個 watchOS 2 新增的功能，就係 Time Travel。係錶面，只要轉動錶冠，就可以向前或向後進行「回到未來 / 過去」，最多可向前或向後移動 24 小時（連今日即合共 72 小時），唔止可以睇番過去或者未來的日程，而且連帶周邊資訊，例如：天氣、溫度都可以睇番 / 預測得到。呢個新功能，令大家唔洗開啟日曆都可以睇到之前約咗邊個或者之後會約邊個，方便管理作息同埋時間，真係超方便！
▲係可以顯示日程表的錶面，只要扭動錶冠，就可以使用 Time Travel 功能，瀏覽之前或之後的日程了。而要退出，只要按一下錶冠就可以。
終於可以當床頭鬧鐘！
其實就算係傳統手錶，都可以有鬧鐘功能，但 Apple Watch 推出個時，就偏偏無加，令到大家幫手錶差電個時，就只可以擺係度，完全無作用。今次推出 watchOS 2，就加入了 Nightmode 夜鐘模式功能，只要駁了差電線，然後錶冠向上橫放 Apple Watch 係檯面，就會自動變咗床頭鬧鐘，而錶冠同埋按鍵，當鬧鐘響個時就可以作為 Snooze 同埋 Off 功能，好體貼。另外，鬧鐘係以黑底綠字顯示，就算熄哂燈都唔會刺眼，夜晚「紮醒」個時如果想睇時間，只要掂一掂個熒幕就得，而且唔會搞到對眼唔舒服。
▲首先要係 iPhone 上的 Apple Watch APP 中，進入「一般」並開啟「夜鐘模式」選擇（預設是開啟的）。
▲之後駁了充電線，然後錶冠向上將 Apple Watch 橫向放係檯面，就可以進入「夜鐘模式」了。
Siri 可開 APP 好方便，但指令有限……
另一項 Edward 覺得 watchOS 2 算係「撥亂反正」的功能，就係 Siri 終於唔止可以用來查資料，仲可以用來開 APP，呢樣功能真係好方便，例如：小編講句「Start a 30 minutes run outside」，就會自動開啟「體能訓練」APP，然後自動設定以室外跑步模式及 30 分鐘時限，之後當完成倒數後，大家就可以開始跑步了！這項功能，令大家連手機都唔洗拿出來都可以運動，真係方便好多。
▲用 Siri 講句 Start Camera，就可以開啟 iPhone 相機並以 Watch 作遙控，真係好方便。
▲至於要跑步時，使用 Siri 講出「開始在戶外跑 30 分鐘」的指令。
▲之後就會進入 3 秒倒數，留意左上角，Apple Watch 已自動進入「體能訓練」的「戶外跑步」模式。
▲然後呢？就可以開始運動架啦！
▲當完成 30 分鐘時，Apple Watch 會震一下，並在熒幕顯示「達標」，提示用家運動 session 已完成。
不過要留意的係，Apple Watch 的 Siri 雖然強化了，但支援的功能始終有限，就算小編用預載的「體能訓練」APP 而非第三方軟件記錄運動時的身體狀態，但如果要停止或者結束 session，始終仍要用手操作，而不能單講一句「Pause run」或者「End run」就可解決，實在令人有點失望。希望當正式推出時，Apple 可以加入類似選項，令大家真正可以唔拿出手機，隨心所慾單用 Apple Watch keep fit 啦。
▲跑步途中如果要 check 心跳，講句指令就得！
▲但大家要留意，Siri 都唔係萬能的……
Siri 可回 Email、IM 超方便
之前的 watchOS，最煩的就係見到 Facebook 訊息、LINE messages、或者新電郵，唔係只得個「睇」字，就係只能回覆唔知表唔表達到意思的 icon 或者顏文字，都幾無癮，最後咪又係要拿番部手機出來覆！而係 watchOS 2，Siri 文字辨識功能就進一步擴大應用「版圖」，亦加入支援可用錄音機功能。即係點？即係大家可以直接靠 Siri，係 Watch 直接讀出你的回覆內容（當然唔可以太長啦！），然後 Siri 會用語音辨識功能將你的聲音譯成文字，然後直接傳送出來，而 Edward 亦測試過，發現準繩度都幾高，點計都方便過係 iPhone 5c 的細小熒幕上面慢慢打字覆。
▲Apple Watch 的 Mail 係 watchOS 2 多了 Reply 功能。
▲只要點按它，再點按右下角的咪高峰圖示，再說出回覆內容（盡量短，可提高準繩度）。
▲最後確認辨識內容無誤，再按下 Send 就可以覆電郵了。
而有些 IM 平台，未來更有望加入「錄音機」功能，只要收到訊息時按回覆，然後錄下你的回覆訊息，之後傳送出來，對方就可以收到你的 voice message，情況就好似而家係手機用 voice messages 覆 WhatsApp、Facebook Messenger、LINE 的訊息咁方便。不過似乎而家仲未有 APPS 可以支援，不過相信等 watchOS 2 係年底推出個時，應該唔少主流溝通 APPS 都可以支援得到了。
▲雖然 Apple 係 keynote 入面提過 WeChat 可用錄音機傳語音訊息，但而家因為 WeChat 仲未更新，所以仲未用得到。
相關文章:
【實測】Apple Watch 即時翻譯旅行超方便 20 多種語言任選 + 即時出翻譯結果 Apple 為 Snoopy 迷送上聖誕禮物 Apple Watch 錶面和 Apple TV 4K 螢幕保護程式 網傳小米正研究方案 讓 Android 手機能對應 Apple Watch
朋友清單可分類 + 可傳多色圖案
Apple Watch 初推出時，它內建的「朋友」功能其實都幾有趣，除了可以直接係手錶打電話或者傳訊息給朋友，而且更可以向對方畫畫、甚至以心跳傳情！不過要加朋友一定要透過 iPhone 上的 Watch APP，而且又只可以 add 12 個人，真係多啲 friends 都搞唔掂。而係 watchOS 2，唔止大家可以直接係 Apple Watch 上面加朋友，而且仲加多頁，俾大家為唔同朋友分類，例如：第一頁的 12 個係「酒肉朋友」，而第二頁的 12 個係「公事朋友」，令大家可以「公私分明」。
▲終於可以係 Apple Watch 上將朋友加入清單，而唔洗透過 iPhone 的 Watch APP 先做到了。
▲而且有兩頁俾大家揀，唔止可以分類，加入朋友數量更增加至 24 個，真係好好（但可能對於朋友極多的用家來講都唔夠用吧……）。
另外，畫畫方面，之前 1.0.1 版本只可以揀一隻顏色，感覺有點悶；而係 watchOS 2 入面，就可以揀多過一隻顏色畫畫（只要你夠快，係佢未傳出去之前揀好色而且畫下線條），大家就可以係 Watch 細小的熒幕上面，施展你的「不加思索」畫風了。
▲而且畫畫可以用多種顏色，真係好方便！不過大前提係，大家轉色要夠快！
總結：期待 Native Watch APP
整體來講，用咗一日裝了 watchOS 2 的 Apple Watch，感覺係 watchOS 1 的「完美版」，好多應該有嘅功能都已經加入去，而最令 Edward 期待的有兩點：第一個就係 Apple 終於開放唔少 Watch 內的硬件 API 供 developer 使用，包括：錶冠（Digital Crown）、Taptic Engine、加速器（Accelerometer）、心跳計、咪高峰等等，令研發人員可以係自己的 Watch APP 入面，盡用 Apple Watch 的硬件，強化使用體驗及加入更方便使用的功能。而第二點，就係 Apple 終於願意容許 developer 將 iPhone APP 的 App Logic 搬到 Watch APP 上，換言之，即係有望係年底 watchOS 2 正式推出時，市場上已有不少可原生單獨係 Apple Watch 上運作，而且效果更暢順的 APP 現身，而運動 APP 正是最大的「得益者」（因為大家終於可以完全將 iPhone 放係屋企，只係戴住隻 Apple Watch 出街運動）！
▲由於小編並非身處英國，所以係 Apple Watch 上的 Apple Maps APP 並未能睇到公共交通班次。
▲由於香港仍未支援 ApplePay，所以內建的 Wallet 都得物無所用。
至於最大需要改善、或者強化的地方，就是 Siri。雖然 Apple Watch 的 Siri 已比 watchOS 1 時強了很多，但始終指令有限。當然，其實 iPhone 的 Siri 語音指令亦不足夠，希望 Apple 可以在不久的將來，進一步強化 Siri 語音功能，咁大家無論係拿住手機或者單係用 Apple Watch，都可以放棄鍵盤，投入語音的世界了！
相關文章:
【實測】Apple Watch 即時翻譯旅行超方便 20 多種語言任選 + 即時出翻譯結果 Apple 為 Snoopy 迷送上聖誕禮物 Apple Watch 錶面和 Apple TV 4K 螢幕保護程式 網傳小米正研究方案 讓 Android 手機能對應 Apple Watch
分享到 :
最新影片
