成部電腦放落褲袋四圍走！睇片 / 文書樣樣得！

2016-04-28

Published by

丫丫

香港居住環境細，好多人都未必有足夠既空間擺部 Desktop，如果覺得只係用平板電腦開唔到 Windows 軟件，用 Notebook 又嫌個 MON 細，咁就不如試下 ASUS 呢條全新既 VIVOStick PC 喇，佢體積細小只有 USB 手指咁上下，但就已經是一部擁有所有電腦基本功能，只要插入 MON 或電視既 HDMI 位，透過 microUSB 取電同駁埋鍵盤滑鼠就即時可以用，就算要出街做 Presentation 甚至出 Trip 都非常方便。

細過部電話

一部 PC 可以有幾細？相信好多人都會諗到各式各樣既 HTPC 或者 MiniPC，又可能會諗到 Ultrabook 或者 MacBook Air，但始終有個 MON 同埋有機箱，所以部機真係細極有限，所以好多女士就算真係要外出見客或者做 Presentation，都未必願意拎部 Notebook 出街，可能用部平板加個轉插駁 Projector 就算，最大限制在於效能較低，萬一臨時要改個 Powerpoint 都會 Load 得好慢。ASUS VIVOStick PC 重量只有 75g，外觀同一條普通 USB 手指，體積就比一部電話仲要細，真係放落褲袋周圍走都仲得。

▲VIVOStick PC 只係比八達通大小小，想放係邊都咁方便，但已經擁有完整既電腦功能。

▲跟機分別有火牛、USB 延長線同埋方便將 VIVOStick PC 掛喺熒幕嘅配件。

駁 MON 駁鍵盤滑鼠就用得

VIVOStick PC 要用其實唔難，佢本身就已經有一個 HDMI，只要插落電視或電腦熒幕，再經 microUSB 取電就可以即時著機入 Windows，但佢個輸入要用到 9V / 2A，所以係就唔可以用「尿袋」呢類流動充電器，呢點就有點可惜，所以出街用就記得帶埋隻火牛。

始終對於文書等工作，用鍵盤滑鼠點都會更加之方便同快，但好多時呢類以細小輕巧作賣點既產品，都未必可有足夠擴充介面。ASUS VIVOStick PC 就分別有 USB 3.0 同 USB 2.0 各一，仲加埋有藍牙，所以無論有線或無線鍵盤滑鼠都可以駁，至於個 USB 3.0 就可以用作接駁 USB 手指或外置硬碟，USB 3.0 速度方面都相當唔錯，唔會好似部份產品咁會有速度下降問題。

▲用 USB 3.0 介面接駁 USB 手指，檔案抄寫速度平均有 70MB/s。

相關文章:

【評測】ASUS ZenFone 11 Ultra　外形　手感　屏幕　相機　效能詳細開箱評測

【評測】ROG Zephyrus G16 (2024) 外形手感打機表現效能鍵盤端子開箱評測

【評測】ASUS ZenBook Duo　外形　手感　功能　使用體驗　屏幕　操控　效能開箱評測

終極懶人方案：用手機 App 控制

出街或者出 Trip 就梗係越輕便越好，如果大家連鍵盤滑鼠都唔想帶，就可以利用ASUS Wi-Fi GO ! Remote 既 App，可以將手機當 Keyboard 同 Mouse 用，當然靈敏度就一定無實體鍵盤滑鼠咁快，同埋要連接至同一個 WiFi 先用到，但今時今日好多酒店或辦公室都已經有免費 WiFi。除此之外，仲可以將手機同 VIVOStick PC 既檔案進行雙向傳送，做完既文件可以直接 Save 就行得。

▲透過個 App 除左可以當滑鼠之外，文字輸入都一樣無問題，可以完全擺脫鍵盤同滑鼠，出 Trip 就更方便。

▲仲可以當埋遙控，直接控制多媒體播放，坐係梳化用手指就輕鬆攪掂。

獨有 3.5mm 連接耳機用埋 Skype

如果要出 Trip 好多時都會用到 Skype 進行通訊，呢條 StickPC 就特別加入3.5mm 介面可以駁咪用，又或者大家可以駁耳機聽歌睇戲，就算夜晚要加大音量都唔怕嘈住其他人。加上佢機身內只係得一把小型風扇仔，運作既時候都十分寧靜，完全唔會同一般 PC 咁聽到唔同既風扇聲。

▲除咗有 2 個 USB 之外，最特別就係加入 3.5mm 介面，方便駁咪玩 Skype 或者耳機聽歌。

返工做文書放工睇下片

ASUS VIVOStick PC 如果講效能可以比得上 Desktop 就一定無可能，硬件配置同市面上既 Windows 平板相近，速度同反應都快，10 秒左右就可以入到 Windows 即時開工或睇片。加埋 2GB RAM 同 32GB 容量，就算裝左 Windows 10 之後都仲有約 10GB 可用空間，由於都唔會安裝其他大食軟件例如 Game，所以都非常夠用，又或者可以用 USB 手指/外置硬碟擴充。流暢度嚟講處理文書要一齊開 Browser 同 Word 都好流暢，嘗試開 YouTube 睇 1080P 片都非常足夠，並未出現跳格或聲畫唔同步問題。

▲如果要外出做 Presentation，配合埋一個流動 Projector 就攪掂晒，真係連 Notebook 都唔洗拎。

▲雖然係 YouTube 睇 1080P 片會出現 CPU 100% 全負載，但唔影響流暢度同聲畫同步。

▲雖然得一把小型風扇，全負載下亦只係 38 度左右，唔洗擔心過熱 Hang 機。