如果講到近期比較熱門的手機，其中一部肯定係早前在 MWC 前夕發佈的 Samsung GALAXY S6 Edge。這部全球首部採用雙曲面熒幕的智能手機，究竟有什麼魅力，令它的預訂反應如此熱烈？Edward 就有幸率先試玩了此機一整日，現在就同大家分享一下試玩一日後的感受吧。
手感比 Note Edge 好得多！
如果講起曲面熒幕手機（不是 Samsung GALAXY Round、LG GFlex 系列的屈曲手機，唔好搞亂），相信大家第一時間會諗起 Samsung 去年與 GALAXY Note 4 一同推出的 Note Edge。不過 Note Edge 可能一來太大部（Edward 的手掌明顯沒有小編 咁大 Orz…），二來熒幕彎曲位置在熒幕右側，不但手感不算太好，而且由於 Edward 的右手是「主力手」，習慣用右手操控手機，所以單手操控時經常掃到在熒幕右側的側熒幕，用起來好麻煩。
▲之前用 Note Edge，始終有番咁上下大部，加上側熒幕要「就住就住」用，所以比較難用。
▲尤其是對於 Edward 這種以右手為「主力手」的用家，就會經常誤開側熒幕。
今次 Samsung 推出的 GALAXY S6 Edge，熒幕兩側均採用彎曲設計，而且可讓 Edward 自行設定是使用左方還是右方的側熒幕，加上 S6 Edge 機身大細及厚度均比 Note Edge 細及薄，所以無論用家是左手還是右手是「主力手」，都唔洗驚唔覺意掂到側熒幕，單手操控感受好好多！
▲S6 Edge 擁有雙邊曲面熒幕，而且機身較細較薄，手感比 Note Edge 好得多！
▲可讓用家自行選擇選用左側還是右側的曲面熒幕作為側熒幕。
▲對於以右手為「主力手」的 Edward，以後就唔洗驚會誤觸側熒幕啦。
新舊 Edge 各有好處
不過由於 S6 Edge 的側熒幕彎曲弧度比 Note Edge 細得多，所以就唔可以好似 Note Edge 咁，將 APP 捷徑放係側熒幕度，不過預覽信息、睇 APP 通知、瀏覽最新新聞等功能就仍然保留。不過好處反而係當橫向使用手機時，只要在側熒幕位置向內一掃，就可以好似其他手機咁睇到熒幕頂部的狀態欄（Note Edge 只能掃出側熒幕，而不能做到呢一點）。所以整體來講，各有好處，視乎用家需要。而 Edward 我就覺得 S6 Edge 較適合自己。
▲Note Edge 的側熒幕由於弧形較大而且較闊，所以可以連 APP 捷徑都可以放在上面。
▲相比 S6 Edge 弧度較細，APP 捷徑就不能放在上，不過訊息預覽、APP 通知等都仲可以睇到。
▲在使用橫向全熒幕的 APP 時，如果在 Note Edge，從顯示頂部向下掃，只能睇到側熒幕內容，要強制令手機從另一橫向使用（顯示頂部在非曲面熒幕那邊），才可以預覽狀態欄。
▲而在 S6 Edge 上，無論從哪個方向使用橫向全熒幕，在顯示頂部向下掃均可睇到狀態欄，使用上方便得多。
▲S6 Edge 的曲面熒幕仍然保留多數 Note Edge 側熒幕的功能。
▲最特別可說是「我的聯絡人」，只要在曲熒幕那一邊向內掃（留意下圖紅圈），就可以呼叫出上圖的我的聯絡人清單，用家可以將最重要的聯絡人加進去。
▲當放在「我的聯絡人」內的聯絡人聯絡用家，而手機又處於熒幕向下的狀態（靜音狀態）及開啟了側熒閃光功能，就會在側熒幕閃出相關顏色，令用家無須開啟熒幕，已可知道是誰致電。
▲用家亦可以用手指按住心跳感應器兩秒左右，就可以拒絕來電並即時向對方傳送預設的 SMS。
▲也可以預設什麼時間開始以側熒幕開啟夜時鐘，這樣在晚間關燈後，也可以隨時睇到時間，又不會覺得「掁眼」。
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 Samsung Galaxy Book5 Pro 發表 同時提供 Galaxy AI、Copilot+ 人工智能
玻璃機背高貴但易附上指紋
至於機身設計方面，S6 Edge 就一改以往 GALAXY S 系的「膠機」風格，改用金屬內框連機邊，而機背就用上強化玻璃物料製造，雖然不像 Note 系列般採用「軟淋淋」的皮革物料般舒服，但總比過往的 S 系手機高貴得多，手感亦肯定比「膠機」舒服！不過代價是 S6 Edge 的機背較易附上指紋，所以建議有「潔癖」的用家要不就採用保護套 / 殼，又或者隨身帶備抹布隨時為機背清潔了。
▲相比 S5（左），S6 Edge 的玻璃機背感覺更高貴，最少沒有了那種「膠感」。
▲S6 Edge 就算同一貫使用玻璃機背的 Sony Xperia Z 系列手機相比，靚的程度都不遑多讓。
▲玻璃機背的唯一缺點是易附上指紋。
值得一提的是，S6 Edge 的強化玻璃機背，用色都算大膽，唔止有傳統的黑、白兩色，仲有金色同埋寶石綠色，尤其是寶石綠色，更是智能手機入面少見的，用此顏色的玻璃機背同埋熒幕邊框，配合銀色金屬機邊，睇起來好 sharp 好靚。而且它的玻璃機背，內裡加上一層微光學薄膜，配合唔同燈光折射角度，會有唔同深淺顏色顯示出來，都睇得出 S6 Edge 的造工已非昔日 S 系的「膠機」可比擬。
▲上圖可以睇到 S6 Edge 的寶石綠款式，用此色確實幾大膽，在現時智能手機上亦屬少有，Edward 覺得幾討喜，不過要襯衫就難啲啲。
真實「落地測試」
Samsung 的智能手機，以往總不乏用家支持，除了規格上乘之外，另一原因就是現存行貨手機市場中很少有還同時支援插 microSD 記憶卡擴充容量，以及可以隨時換電池的設計。不過在 S6 Edge 上，這兩個設計就因為採用一體化機身而取消了，強化玻璃機背、金屬機邊同埋機面的彎曲熒幕緊密扣在一起，中間完全不見任何隙縫，無論睇起來或者摸上去都係好靚。但係對於喜歡插卡的用家，同埋寧願帶多幾舊電而唔少帶住粒外置充電池出 trip 的商務用家來講，可能會比較失望。
▲一體化機身，S6 Edge 拿在手上手感都幾紮實。
▲不過可以插卡換電的特性（上圖右為 S5，左為 S6 Edge），在 S6 Edge 上就完全抽走了。
但一體化機身其實唔係無好處，就好似 Edward 昨晚外出食飯回家時，在大廈走廊不慎將手機跌在硬地上（由褲袋跌出，高度大約是 1 米左右），原以為評測未寫手機熒幕就已經「被粉碎」，但拾起來後才發覺熒幕完好無缺之餘，機身只是 S6 Edge 的 3 個角位崩了或刮花了少許。可見一體化機身令手機更耐跌（當然唔係建議大家粗用手機，畢竟幾千蚊買部手機番來，跌花了都會心痛吧……），對於經常跌手機的大頭蝦用家來講，可以說是福音吧！
▲一體化機身好處是機身抗跌更強，Edward 的 S6 Edge 在一米左右跌在地上，都只係角位跌花或跌崩了少許。
指紋辨識更容易：一按就得！
以往的 Samsung 手機，指紋辨識位通常都係 Home 鍵位置，今次的 S6 Edge 都唔例外。不過辨識方法就有分別了：以往的指紋辨識，是要用手指在 Home 鍵由上而下掃下去才能辨識得到，這令 Edward 要一隻手拿住手機，另一隻手騰空出來用來掃指紋，好麻煩。而在 S6 Edge，它就採用了類似 iPhone 的指紋辨識方法，就是將手指按在 Home 鍵上方，大約 1 秒左右就可完成辨識，唔止速度快，而且單手操控時都可以輕鬆解鎖，對於鍾意係港鐵企係度時用手機的小編來講，呢個設計簡直係「德政」：因為終於唔洗為了解指紋，而要雙手並用操控手機了！
▲與之前有指紋辨識的 Samsung 手機不同，S6 Edge 的辨識方法不用掃，只要像 iPhone 般輕放手指在 Home 鍵上一會兒就可以了。
▲至於加入指紋時，就好像 iPhone 般要不停將同一隻手指輕按在 Home 鍵上，直至去到 100% 就代表完成，過程大約需要按十幾下左右。
▲從上面影片可以睇到，S6 Edge 在指紋辨識效果上十分理想，基本上是放手指在 Home 鍵上 1 秒或更少時間，就已經完成解鎖。
▲在設定中，可以選擇是否顯示通知內容。
▲指紋除了可以解鎖熒幕外，亦可以用來登入網站及驗證三星帳戶，不過就唔可以在 Play Store 購買收費程式時進行身份驗證，這功能就比不上 iPhone 了。
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 Samsung Galaxy Book5 Pro 發表 同時提供 Galaxy AI、Copilot+ 人工智能
QHD 熒幕銳利而色彩自然
以往的 Samsung S 系手機，早已採用了 AMOLED 材質熒幕，顏色是靚，不過有些用家就批評好「味精」。其實「味精」芒的「不名譽」稱號，係 S4 開始已經一代比一代改善，去到 S6 Edge，「味精」芒情況 Edward 膽敢說已經唔再存在，因為它的 5.1 吋 QHD 2K Super AMOLED 熒幕，唔止銳利，而且色彩上採用了「Real RGB」，在預設情況下都已經好自然，用來睇相睇片已經有唔錯的體驗。另外，它的亮度亦十分高，基本上 Edward 就算在太陽底下睇芒，都唔洗調至最光（大約 70% 左右）都可以清晰睇到。
▲全新的 5.1 吋 2K QHD 解像度 Super AMOLED 熒幕，亮度十分高，就算在太陽底下，唔洗開到熒幕最光都可以睇到熒幕顯示。
▲色準頗高，可見白色還原度都算唔錯，而且字體銳利度亦十分高。
▲用來欣賞影片，色彩都算好自然，而且亦十分清晰。
▲S6 Edge 熒幕的可視角度亦十分高，可見從側面睇都唔覺顏色有太大改變。
當然，如果大家好「懷緬」昔日 S3 或之前年代的「味精」芒，大可在設定 –> 顯示中的熒幕模式，選擇「AMOLED 電影院」（雖然「味精」感也沒有當年那麼重……），但 Edward 覺得為了大家雙眼健康著想，還是選擇預設的「最佳化顯示」算了。
▲S6 Edge 都容許用家按個人喜好選擇合適的熒幕顯示模式，喜歡重「味精」的不妨選擇 AMOLED 電影院模式，不過 Edward 就覺得預設的「最佳化顯示」是最理想的顯示效果。
唯一用 S6 Edge 熒幕睇網頁唔太慣的，就好似之前小編 所講，部分顯示會出現在側熒幕位置，令網頁邊位顯示有點彎曲，感覺有點奇怪，但使用時間長了，Edward 算是習慣了。
▲不過睇網頁時，連曲面熒幕位置都會顯示內容，睇起來有點奇怪。
相機影相質素大改進 + 自拍算見得人
至於鏡頭方面，Samsung 號稱 S6 Edge 採用的鏡頭是市場上最佳表現的相機，雖然像素上仍然是 S5 年代的 1,600 萬像素，但光圈有 F/1.9，亦設有光學防手震功能，也支援最快 0.7 秒啟動相機，功能上同 S5 看似沒有分別，但實際上影相的質素，Edward 覺得比 S5 好得多，不但色彩自然，而且十分銳利，影相對焦準繩度亦高得多。最重要是，因為 S6 Edge 有更大光圈及 OIS，在更暗環境影相，唔止可以手持手機亦可以拍攝到清晰相片，雜訊亦相對更少。
▲雖然 S6 Edge 的主鏡頭在像素中未有提升，但質素卻大有改善。
▲S6 Edge 的攝影介面與 S5 分別唔算太大。
▲不過就加入了「專業」模式，可讓用家設定更多功能。
▲還可以有最多 3 個自訂模式供用家加入。
▲至於像素方面，仍然是 1,600 萬像素。
▲至於影片方面，最高解像度為 UHD 4K。
另外，S6 Edge 亦大大改進了前置鏡頭，唔止像素提升至 500 萬像素，亦加入了唔少自拍模式，除了擁有一貫的 8 級美顏功能外，Edward 最鍾意就係新加入的「廣角自拍」模式，只要在拍攝了自拍照後，再將手機向左及右旋轉一點，就可以拍攝出更廣角的自拍照，此功能十分方便大家係旅行時拍到背景更宏偉漂亮的 selfie 相片。
▲Edward 最鍾意就係呢個「廣角自拍」，可以影到更闊背景的自拍相片。
▲至於前置鏡頭，影像最高為 QHD 2K 質素。
試相區（點按可睇原相）
介面微改造有得有失
至於 S6 Edge 的介面上，相比之前的 Samsung 手機也有適量的「改造」，圖示如前代一樣採用平面設計，不過就在首頁加入「熒幕縮圖」設定，讓用家設定熒幕格數是 4 x 4、4 x 5 還是 5 x 5，當然愈大就代表可以在同一頁放入更多 APP 捷徑或 Widgets，但亦代表字體、圖示會較細，這能提供用家彈性，按自己能力及需要選擇最適合自己的介面。此外，文件夾亦首次可讓用家自行設定顏色，雖然色彩只有 5 個選擇，但也算是個好開始。
▲S6 Edge 是少數 Samsung 手機可以自行設定頁面排列格數。
▲文件夾亦可以自行設定顏色，可惜只有 5 種選擇。
▲其餘介面與 S5 分別唔算太大。
不過新介面的缺點是，無論是首頁還是程式目錄介面，去到最尾一頁再向同一方向劃動，唔再可以返回最頭一頁，一定要反方面捲動才可返轉頭。對於習慣了舊介面的用家，可能要點時間適應。
▲要係翻頁到最後一頁時回到最頭，就要向反方向捲動頁面，比較麻煩。
▲程式目錄亦大幅簡化，現在只可以建立文件夾（將同類程式捷徑放在一個文件夾）、刪除程式及調位。
效能不錯機身微熱
至於效能方面，Samsung 今次終於完全放棄 Qualcomm 處理器，改為採用自家研發的 Exynos 7420 八核心處理器，它是由 Cortex-A53 架構的 1.5GHz 四核心處理器及 Cortex-A57 架構的 2.1GHz 四核心處理器組成，會因應使用 APP 的需求而決定使用哪邊架構的處理器。雖然仍未是真正可以同時八個核心運作的架構，但在效能上仍然比採用 Qualcomm Snapdragon 810 八核心處理器的機款好得多。根據安兔兔評測的結果顯示，S6 Edge 獲得 55,519 的高分數，相比之前 HTC 推出的 One M9 在同一測試軟件獲得的 50,581 分，明顯是高出一截。
▲S6 Edge 在安兔兔評測中獲得 55,519 分的極高分數。
▲相比採用同樣是八核心處理器，不過是 Qualcomm Snapdragon 810 的 HTC One M9，同樣在安兔兔評測中就只獲得 50,581 分，雖然不是相差極多，但也有一截距離。
▲在 PC Mark for Android 中亦獲得 4,995 分的高分數。
▲至於在 3D Mark Ice Storm Unlimited 測試中，亦獲得 12,669 分的優異分數。
不過要留意的是，S6 Edge 可能機身較薄，所以在 heavy load 的情況下，仍會出現機背微熱的情況（鏡頭下方位置），不過情況不算嚴重，至少未至於影響機能。
▲在使用 PC Mark for Android 測試時，可以睇到 S6 Edge 就算係 heavy load 情況下，機身溫度都只係一直處於 40 度以下，只屬微熱，未至於會影響效能。
另外，S6 Edge 亦終於用上了 3GB RAM，與之前 S5 的 2GB RAM 相比，S6 Edge 在運作上完全暢順，就算 Edward 同時開啟幾個程式，亦未見到窒的情況，這情況對於 heavy user 來講，應該可以滿足需要。
▲S6 Edge 是 Samsung 在香港推出的 GALAXY S 系手機中第一部採用 3GB RAM 的旗艦機款，運作順暢度比採用 2GB RAM 的 S4 及 S5 高得多。
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 Samsung Galaxy Book5 Pro 發表 同時提供 Galaxy AI、Copilot+ 人工智能
使用時間半天幸好支援速差
最後一點，就讓 Edward 分享一下 S6 Edge 的使用時間吧。可能 Edward 本身是一個互聯網 heavy user，不但會用 internet 玩 Facebook、WhatsApp、LINE 等，也會經常用 Google Map 找方向，當然亦會玩一些如 Clash of Clans、SimCity BuildIt、Crusaders Quest 等網上遊戲，所以 S6 Edge 在充滿電的情況之下，大約只能用到 6 至 8 小時左右，計起來大約是半日。事實上，QHD 熒幕加上如此規格，這使用時間亦算合理。
當然要用上一日，就確實較困難，幸好 S6 Edge 也支援速差功能，只要使用原廠跟機附送的充電器及 USB 線，只要充電 10 分鐘就可以擁有使用 4 小時的電量，而由個位數字 % 充電至 100%，時間最長亦只是一小時多一點，所以問題都唔算太大。
另外，對於唔介意差電慢一點，但唔想下下插線充電的用家，S6 Edge 本身亦支援無線充電功能，只要將它放上充電板，就可以開始差電，十分方便。大家大可另購這塊無線充電板，然後將火牛、USB 線放在公司；而無線充電板就放在家中，這樣無論身在哪裡，都唔洗驚 S6 Edge 唔夠電啦。
▲S6 Edge 本身亦內建支援無線充電功能，只要將機身本面向著無線充電器放在上面，就可以啟動充電功能。
Edward：「手感勝於一切！」
總括來講，Samsung 今次推出的 GALAXY S6 Edge，可以講得上係「孤注一擲」，因為上兩代的 S 系機款銷情麻麻，如果今次 S6 Edge 作出如此大幅度改變，也未能吸引手機用家回心轉意，S6 / S6 Edge 隨時可能係 Samsung S 系手機的告別之作。但觀乎 Edward 試用了足足一日，就覺得 S6 Edge 可能是現時市面上其中一部無論係造工、功能、性能等方面，都有 Rank A 表現的智能手機，尤其是影相方面，唔止質素都幾得，Edward 最鍾意就係佢的「廣角自拍」，加上 500 萬像素兼有美顏功能，影完真係都會少幾粒「痘痘」（笑~~）。當然，S6 Edge 售價是貴了一點，32GB 已達到 $6,598，64GB 更比 Note Edge 還要貴，達到 $7,498！不過觀乎新鮮感，加上各方面的質素，S6 Edge 也值得入手，不過因為它不能插卡擴充儲存空間，Edward 建議有心入手的 unwire 讀者購買 64GB 容量，否則他日手機儲存空間唔夠位用，到時先至升級，就麻煩得多了。
售價：$6,598（32GB）；$7,498（64GB）
查詢：Samsung（3698 4698）
相關文章:
【評測】Samsung Galaxy S24 FE 詳細評測 機身輕薄手感佳 + 用色清新迎合年青人 + 熒幕顯示效果出色 + 效能不錯打機都夠 + 定價抵玩 【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高 Samsung Galaxy Book5 Pro 發表 同時提供 Galaxy AI、Copilot+ 人工智能
分享到 :
最新影片
