除非屋企大到有個後花園，唔係想喺香港搵個地方玩平衡車都幾難。好彩觀塘工廈愈來愈多嘢玩，繼上次介紹的 Crazy Cart 試車場，最近開咗一間Azzita 平衡車試車場，而且絕非淘寶貨，咁就唔怕撞到爆炸啦！於是我依莉詩就搵埋 水哥 同 點點 一齊鬥車啦！
5千呎試車場任意駕駛
呢個試車場其實係 Azzita 的 Showroom，賣車、維修之餘索性將工廈單位改成五千幾呎，以紅白兩色的水馬包圍的多彎賽道，無論新手定高手都可以落場盡興一番。雖然同之前 Crazy Cart 試車場一樣賽道都係一眼睇晒，不過每次可以容納最多 10個人，除咗可以每節咁租，仲可以包場，幾個家庭約埋嚟玩都無問題。 試車場4月中先開，不過我地去到的時候已經有唔少有人係度體驗玩平衡車的感覺，睇嚟真係好受歡迎。
▲ 試車場有 4款車，以每半小時一節試玩， 由相中左面數起，7″ Path Finder $69/節、8″ Grandee $75/節、10″ Ergoracing $79/節 、7″ Hovercloud $85/節 ，加 $30可以玩多半個鐘。價錢比 Crazy Cart 試車場平，亦唔太貴啊！
▲ 咁多款點揀好？負責人 Rock 就話細車需要更多的時間練平衡，所以新手最好揀大車，因為有充氣呔，會有避震的效果，板身較高，無咁敏感，易控制 D，至於高手可以揀 Hovercloud，單轆控制，更有挑戰性。
▲ 5000呎賽道一次只多可以容納 10個人，夜晚同星期五、六、日都會多人，如果唔想等就要揀啱時間去啦。
1對 1教學包保 5分鐘學識
如果未玩過平衝車都唔駛擔心。呢度會有職員係賽道外的長方形範圍作 1對 1教學，要確保我地識上車落車、向前向後、轉左轉右 同 控制速度 先出得去賽道玩。佢地都教得好細心架，會係前面拖住你行，連經常「撞車」的依莉詩都可以係 5分鐘學得識，眼見 D 小朋友學得仲快啊！另外，呢度的安全措施都做得幾足，除咗要你識先可以真正落場，玩之前必須要帶護膝護肘同頭盔，而且全部牆角，柱邊都包咗最少 10mm 的軟墊，可以防撞。不過我就略嫌水馬唔夠高，扶的時候會向前鎚。Kile 就解釋「考慮過水馬太高會影響視線，唔知前面點轉彎，依家的高度已經足夠比你扶，而且可以借到力，令你跌得無咁傷。」
▲ 因為仲係新場，護膝護肘同頭盔都算新，唔會話有汗臭，可以放心戴。
▲ 既然係試車，可唔可以租一架幾個人玩呢？Kile 就表示「呢度要玩幾多架車就比幾多錢，唔係逐個人計錢，不過我地都建議番一人一架，因為要教完先可以落場。如果個個教 10分鐘再落場，就玩得唔夠盡興。」另外，Kile 亦唔建議自己帶車嚟玩，因為呢度的車都要經過香港的質量管制，咁對大家都安全 D。
購買、試車、維修一次過
呢個試車場由 Kile 同 Rock合資，月租 5萬，被問到市面已經有咁多平衡車，會唔會擔心回唔到本，Kile 就表示呢度主要係 showroom 性質，主要都係做銷售同維修，自己都賣咗平衡車幾年，一個月最少都賣到 150架。不過依莉詩一路都好有疑問，新聞咁多平衡車爆炸事故，佢地開個試車場咁未好多個爆彈一齊運作？Kile 就表示唔駛擔心，因為佢地公司本身有生產線自己整平衡車，雖然個樣同市面的差唔多，不過分別在於零件做足安全要求，每舊電池都要經過安全驗測，要睇佢過放、過充、高溫、碰撞，有無問題。但問到係邊度製造，Kile 都好坦白 「其實依家大部份都係中國造，就算標明其他產地，零件都係係中國造。其實最緊要係花成本去做足安全要求，有 D 平衡車一個電池組入面有 20粒電池，有 D 牌子會用 10粒真電池，10粒水泥，睇外表唔會知道。」另外，Kile 建議要揀一架平衡車最緊要睇佢係咪用真的 Samsung 電池，其次係睇有無 歐盟 CE、美國 UL 、FCC 同 ROHS證書，要有齊 4張先叫一架合格的平衡車。此外，買家係咪做緊自己品牌 同 有無保養都好重要，如果係 Online shop 就咁放出嚟賣的，好多時都唔知來歷，會有風險。
▲ 9歲的瑩瑩第一次玩已經玩得好瀟灑。
▲ Samson 本身有玩花式溜冰，而且自己有一部平衡車，所以就算係高難度的筋斗雲都可以應付自如，但一般人可能要兩三個鐘先玩到呢！
依莉詩後感：「有人教之前就唔駛撞玻璃」
之前公司都有部平衡車，不過就比我撞壞咗。下次如果再想玩平衡車，我諗都係去呢度好，起碼有人一對一睇住，加上提供埋安全裝備，玩起上嚟都安心 D。不過唔知係咪上次撞玻璃的心理陰影，發現身邊 D 小朋友玩得仲順過自己，睇嚟都要去練多幾次先得。
水哥後感：「如果我早啲知有呢間嘢就唔使跌咁多次」
一直都知道有平衡車呢樣嘢，我以為香港係無一間代理，因為成日問人，人哋都係話：「喔，我淘返嚟架咋！」一向唔淘寶嘅我，當然唔會特登淘返架返嚟玩。第一次玩都喺公司，其實我都跌咗好多次先駕馭到。體驗中心有樣好就係佢有人好耐心咁教你玩，而唔同款都有得試。我見到有人玩得好勁都覺得一山還有一山高，我諗如果佢搞埋一個專俾平衡車高手玩嘅場地就更爽啦！
相關影片:
分享到 :
最新影片
