Sony Z 系列棄用紫色之後，今日又為 Xperia Z5 Premium 推出港女色系 — 粉鑽色，買機仲有得送 Hello Kitty 同 蛋黃哥精品，到底依莉詩又 buy 唔 buy 呢？
粉鑽色似 Z5 櫻花粉
今次推出的 Xperia Z5 Premium 粉鑽色就咁睇其實同早前推出的 Z5 櫻花粉色好似，只係差 Z5 Premium 係鏡面，而 Z5 櫻花粉係磨紗面咁解。亦因為咁， Z5 Premium 就更容易沾手指模。講番隻顏色，淡粉色都幾靚，無 Samsung 粉色手機咁粉紅，從斜角睇落仲有少少淡紫，好啱想低調的可愛系女生。不過今次粉鑽色唔似之前的銀色咁反光，所以唔可以當自拍鏡用，如果要買我會揀番銀色，貪佢有多個功能嘛！
▲ Z5 Premium 粉鑽色從唔同角度睇會呈現淡粉、淡紫同淡灰色，低調又優雅。
▲ Z5 Premium 粉鑽色(左) 同 Z5櫻花粉差唔多，只差一個係鏡面，一個係磨砂，所以 Z5 Premium 粉鑽色更易沾指紋。
Kitty AR 好鬼 cute
用開 Sony 手機的都知 Z系列主打 AR相機，為咗今次 Promotion ，Sony 仲整咗個 Hello Kitty AR 比自拍，等大家都可以變花面貓。第一次玩應該覺得幾得意，不過張張都只係 key 貓鬚同貓耳唔夠喉。如果係蛋黃哥用動畫形式 hea 住走出嚟應該會更吸引啊！
▲ 我同 2位 model 都變咗花面貓啊！
蛋黃哥精品幾得意
除咗 Z5 Premium 粉鑽粉，發佈會中另一亮點就係 Hello Kitty 同 蛋黃哥精品。只要係指定特約經銷商購買 Xperia Z5 或者 Xperia Z5 Premium ，就可獲贈 Hello Kitty 或 蛋黃哥 限量版禮品套裝一套，包括 Hello Kitty 或梳乎蛋手機套乙個及縮骨遮一把。兩款造型縮骨遮的設計都好有心思，切合咗 Hello Kitty 同 蛋黃哥的性格分別加入不同風格的有趣對話，例如開朗可人的 Hello Kitty 用手機與大家開心 “Say Cheese” 群拍自拍；而悠閒傭懶的蛋黃哥則保持一股懶洋洋的風格。而雨傘造型更加入黑粗框設計，型格罕有特顯 Xperia 品牌風格。
▲ 透明的手機殼印有 Hello Kitty 或 蛋黃哥 圖案。聽講遲 D Sony 個 Facebook 會推出一系列動畫，要配合呢套手機殼先睇到效果啊！Z5 用家的我十分期待啊！
▲ 縮骨遮的設計切合 Hello Kitty 同 蛋黃哥的性格分別加入不同風格的有趣對話，十分有心思。
半價粉鑽田園拼盤好味道
今次的 Promotion 主打女性用家，所以 Sony 同 Hello Kitty Secret Garden 合作，推出咗一個「Sony Xperia x Hello Kitty Secret Garden 粉鑽田園拼盤」，套餐的主菜以蛋黃哥造型烚蛋配蛋批，甜品則為 Hello Kitty 木槺布甸，以及芒果加士多啤梨泡芙，另配上充滿春夏氣息的 Hello Kitty 士多啤梨特飲，不論賣相及味道都一流。如果係 Z5 或 Z5 Premium 的用戶由5月3日起至5月31日期間登入Xperia Lounge 應用程式，即可下載優惠券以半價 $80整個主題 tea set，超級抵呢！
▲Hello Kitty 木槺布甸 同 蛋黃哥蛋批 都貌相好可愛，相機食先是常識吧！
▲ 講番美味，蛋批的外皮鬆脆，入面有一片片火腿，鹹度適中，而泡芙入面的吉士忌廉好滑，一啖一粒好 sweet，至於木槺布甸都好滑身，加上用粉紅色的花盆裝，加咗唔少分。
▲ 食 tea 某程度都係食環境，店內的裝飾充滿歐陸風格。
▲ 蠟燭枱同 kitty 裝飾隨處可見但又沒有小朋友的稚氣，反而好高貴。
▲ Hello Kitty Secret Garden 位於大坑安庶庇街 19 號地下，環境非常寧靜，可以輕鬆嘆下午茶。
