呢個星期大家都講緊「贏在子宮裡」、「贏在射精前」，計我話上多多興趣班都唔夠小朋友親身去摸去玩，再由父母從旁協助有用。今日就介紹幾個親子活動俾大家，當中有唔同的體驗活動，認識香港玩具業、腸道健康等等，相信小朋友可以學到好多嘢呢！
銀の文房具「玩具市集」
出咗篇訪問之後，唔少讀者都表示想去 銀の文房具 ，奈何平時只接受團體預約，而今個星期就係難得一見的機會啦！銀の文房具會係 6月25 – 26日舉行玩具市集，唔單止有文具展示，更會有台灣著名玩具收藏家大D 1982小時候 同 鍾老闆 等同好展示的懷舊玩具同卡通人物玩具精品。有咗咗好的題材，加埋父母同檔主們的交流，小朋友就可以從中了解到「香港制造」的玩具歷史，更有可能會更加珍惜自己的玩具添！
日期：2016年6月25日 ‑ 26日 (下午1時 ‑ 6時 )
地點：銀の文房具 》新蒲崗五芳街27-29號 永濟工業大廈1樓1B
夏日微旅程 – 童行同感
小朋友除咗鍾意玩玩具，仲係天生的旅行家，對世界好奇、愛在生活中探索。而呢個以米、竹、田野及樹木為主題的「夏日微旅程 — 童行同感」，帶領大家在社區或自然環境中觀察、感受、思考、味嚐，探索感官的無限可能。而最重要係無論參加「米」整雪糕手作坊、廢棄卡板講故事、竹篾試車場 定 泥匠小畫家 都係免費，相信會令 3-11歲小朋友享受玩遊戲的原始樂趣。
日期：2016年6月26日 (下午2時 ‑ 5時)
地點：PMQ 元創方 》香港中環鴨巴甸街35號
「肚仔輕鬆體驗嘉年華」大型BB腸道立體展
如果小朋友仲係細，都有活動啱佢地架！呢個「肚仔輕鬆體驗嘉年華」除咗 BB 有得玩之後，父母可以同 BB 一齊走進超過十二米長的巨型 BB 身體隧道中，體驗口腔、胃部、小腸等各個展區，全面認識人體消化系統，令 BB 由內而外健康成長。另外，仲有 BB 肚仔按摩班、親子肚仔瑜伽操、故事劇場等活動。父母了解咗 BB 消化系統，咁就算寶寶不說，你都知佢地心裡苦啦！
日期：2016年6月24日 (中午 ‑ 下午8時)、2016年6月25日 (上午10時 ‑ 下午8時)
地點：愉景新城 1/F 天幕大堂及露天廣場 》香港荃灣青山公路荃灣段398號
資料來源：Timable
