Apple Watch 值唔值得買？unwire 編輯部 + 城中名人 + 讀者意見發表

識買梗係買玫瑰金！ 先買先贏！ 我覺得做左咁耐人連買隻錶都要左諗右諗真係好可憐！（利申：買嘢從來唔睇價錢牌！！！）

艾露貓：識買一定買……

識買一定買 38 毫米 18K 玫瑰金錶殼配玫瑰灰時尚圈扣錶帶，後尾睇睇下隻 38 毫米 18K 黃金錶殼配鮮紅色時尚圈扣錶帶又幾靚仔。最尾決定：why not both？（利申：最近玩緊 FF）

duncan：買架車好過！

如果要比十幾萬買隻錶，我會選擇買架車！電子產品折舊價低到喊，再 high-end 都唔值呢個價。最平既型號都要睇定 D 先，第二代先會考慮。

藍骨：第一代都係伏！

唔買！Apple 產品每次出第一代都係伏，而且根本唔靚。Anyway 已預訂 Pebble Time。

小編 ：零興趣！

零興趣！外觀麻麻，又要夾 iPhone 用，最麻煩係每日都要充電，買隻 G-Shock 戴都冇咁嬲……

依莉絲：考驗土豪忠誠度！

簡直是考驗土豪對 Apple 的崇拜，外型普通到就算戴住 12 萬上手都唔怕比人搶，科技既野幾年後得番條錶帶有用。而作為女仔，黑襯金、金襯白錶帶，簡直係樣衰，真係有人送都唔要囉！我寧願隻錶鑲鑽石，都好過戴隻金色錶出街，起碼保值啲，又 bling bling 啲，人地都葡萄啲囉。

天恩：Sorry 我不喜歡 smartwatch！尤其是 Apple 的…

也許有人說，名貴手錶跟智能手錶是兩個截然不同的巿場，用不著混為一談。 「Apple Watch 會對瑞士的鐘錶業造成衝擊。」這句話引來不少人當成是笑話看待，「你叫我手上的 Rolex 換上你千多元的 AppleWatch ，別說笑了！」，甚至很多手錶愛好者所追求的不是準確的報時科技、甚麼光能、動能、電波技術都沒有放在眼裡，反為去欣賞機械機芯當中的工藝。不過，當有一日 AppleWatch 把你生活所有事連在一起時候，你就只有一隻手，他們還會死守名錶放棄生活上的種種便利嗎？

沒錯的現時 smartwatch 未成為各位的必需品，但天恩相信 Apple 會全力一擊，將 smartwatch 跟人類的生活環環緊扣在一起，變成一個新標準。也許將來 smartwatch 會變成如手機一樣，不用它的話就失去很多機會。你想要穿 Rolex、IWC、CORUM、ZENITH、A.Lange & Sohne ……？對不起 Apple 不會把 OS 給你讓你將傳統手錶工藝 crossover 它的科技。

Part 2：城中 IT 名人

香港互動市務商會主席 Francis 方保僑：痴哂線！

AppleWatch 作為一隻電子錶，而且 Apple 亦非傳統瑞士名貴錶廠，但最貴的一款可以去到接近 13 萬，可以見到 Apple 對自己品牌的價值好有信心，亦某程度上挑戰住用家對品牌的忠誠度。作為用家，我覺得如果真係想試 AppleWatch，可能買隻 3 千零蚊最原始的款式就算了。要十幾萬買隻錶，一般人都會考慮「保值」呢一個元素，而 Apple 並非十大錶廠，AppleWatch 就算再限量的版本，最後與 10 大瑞士名錶廠的錶相比，仍然是「好多貨」，試問十年八載之後，還會保值？所以十幾萬買 AppleWatch，就只有一啲盲目追求名牌、或者買來炒、又或者買來送俾人「威威」的人才會入手，簡單來講一句：「痴哂線」！

香港零售科技商會副會長 Joseph 梁偉峯：鋼錶款式幾靚買得過

其實 AppleWatch 係靚嘅，尤其是採用鋼錶帶的一款，真係幾唔錯！如果真係買，都會買 4 千幾 AppleWatch 的版本（非 Sport 版本）。至於 10 幾萬一隻的 AppleWatch Edition，又唔似名廠錶咁有 serial number 又無限量（Joseph 認為如果真係名錶，就唔會放上網賣咁兒戲吧……），又唔保值，真係有錢都唔會考慮。

Part 3：unwire 讀者

我們早前 AppleWatch 剛發佈的一刻，就已經發起了這個全民投票。暫時的結果可以見到，打算買 AppleWatch 的 3,489 名讀者中，都有接近 6 成 unwire 讀者會買 AppleWatch，當中有近 4 成會考慮買 AppleWatch，亦即是鋼版；而會買最便宜 Sport 版 AppleWatch 的，都有 46%！而最驚訝的是，竟然都有約 14% unwire 讀者會買入 18K 版！！

至於剩餘約 4 成不會考慮購買 AppleWatch 的用家，有超過一半，達 56% 的 unwire 讀者表示太貴不會入手，而會選擇購買 Android Wear 智能手錶的，亦佔了 25%。值得留意的是，會購買 Pebble Time 的 unwire 讀者，都佔了不會購買 AppleWatch 的 1,400 名讀者之中的 258 人，亦即是約 18%。以單一品牌來計算，佔的比例與會購買任何品牌 Android Wear 手錶的讀者頗為接近，可見 Pebble Time 亦是 unwire 讀者們在 AppleWatch 以外的另一大選擇。