近來有好多關於虐待動物的新聞，港女睇到真係覺得好心噏，所以搵咗一單鼓舞人心的消息俾大家。
呢一兩年，3D 打印技術愈來愈普及，就連小學生都要學，亦有一啲專門嘅組織及研究，嘗試以 3D 打印技術為受傷或有先天缺陷的動物，提供義肢及行動輔助器，令佢地免於人道毀滅。最近又有喜訊！巴西有一隻烏龜（Freddy），雖然從森林大火逃過一劫，但龜殼因大火有 85％ 燒毀，Freddy 仲因此發生嚴重的併發症。當地一個由獸醫、牙醫及 3D 設計師等人組成的義工組織－「動物復仇者聯盟」（Animal Avengers）就為 Freddy 整左全球第一個 3D 打印龜殼，等佢可以重獲新生。
Freddy 經過大火之後不但龜殼嚴重燒毀，仲發生過兩次肺炎，45 日冇食過野。Animal Avengers 見到 Freddy 咁並冇放棄佢，義工團隊入面包括 4 名獸醫、1 名牙醫及 1 名圖像設計師幫佢前後左右唔同角度影左 40 張相，將佢同一隻同品種的正常烏龜做比對，重新設計一個龜殼俾 Freddy。
設計師將龜殼分成 4 部分印出黎，及後再以入榫的方法拼埋一齊。Print 一舊要用 50 個鐘，四舊就 200 個鐘，最快都要 10 日先搞得掂。Print 完、砌完都未得架喎，因為 print 完出黎的龜殼係白色嘅，做唔到保護色。義工團隊於是又搵左個畫家幫佢個龜殼畫上圖案，等佢睇起黎同其他烏龜一樣。佢地仲特登用左啲唔容易甩，又唔會對 Freddy 有害的顏料。於是乎，Freddy 就成為世界上第一隻使用「3D 打印龜殼」的烏龜喇。
其實 Animal Avengers 今次並唔係第一次用 3D 打印技術幫動物重建身體，之前亦都有試過幫大咀鳥、鵝同鸚鵡用 3D 打印製出喙部。
港女雖然無養開動物，但係我覺得生命無分貴賤，都一樣要好好珍惜，如果科技係可以拯救到生命，就要好好利用。
資料來源：Huffinton Post
