一到秋天就係食蟹嘅季節，大閘蟹當然好味，不過醬油蟹始終都係哈韓族嘅摯愛。我依莉詩今日就去咗韓流村食爆膏醬油蟹啦！
開胃前菜免費任食任添
去韓國餐廳第一時間當然要試下涼伴前菜，呢度只要點燒肉類嘅食物就會送 6碟前菜，包括：韓式泡菜、涼拌通菜、大豆芽、蓮藕、洋蔥青椒及用來包烤肉嘅爽口生菜，食完仲有得免費 refill，大大減低燒肉的油膩感。
▲ 五顏六色嘅前菜醃得恰到好處，蓮藕同大豆芽清新爽口，韓式泡菜辛勁十足，非常開胃。
正宗韓式料理
尖東一帶有好多韓國食肆，不過真正韓國老闆主理嘅都係少數，而韓流村老闆不但係韓國人，而且經營韓國食材批發，所以餐廳所用嘅材料都係韓國直送，亦因為咁，醬油蟹嘅價錢仲平過係韓國食呢！
▲ 醬油蟹 $298/2隻
醬螃蟹由韓國直接入口嘅藍蟹用店家秘製醬汁生醃 2至3天而成，雖然係生蟹，但一啲都唔腥，咸味恰到好處，掩蓋腥味的同時帶點果味，連同附送嘅紫菜飯糰放入蟹蓋食，每啖飯都有濃濃蟹膏味。蟹肉札實 Q彈，輕咬蟹身，蟹肉同蟹膏唧晒出嚟，入口滑順軟綿，口腔內鹹鮮味久久不散。不過要食就要 3日前 book 定啊！
▲ 醬油蟹無論係蟹蓋定蟹身都處於爆膏狀態，望到都流晒口水！
▲ 原味牛排骨 $228/2件
呢度燒肉主要分為牛、豬、雞同海鮮 4 大類，重類唔算特別，不過都算大份，一份夠 2-3個人分。當中牛排骨選用優質美國上等牛肉，一份剪大約可以剪到 8塊，入口肉質十分柔軟且帶點嚼勁，牛味濃郁。
▲ 燒炙後，牛排骨油脂甘香，肥膏部份入口即溶。
▲ 辣芝士牛肉 $288
韓國菜最吸引就係芝士嘅拉絲效果，呢個辣芝士牛肉用美國 Prime grade 牛肋骨製成，除了年糕、白蘿蔔及紅蘿蔔作配菜，仲加入咗大量芝士，唔算太辣，不過十分惹味。
▲ 水冷面 $88
食完燒肉，不妨叫碗水冷面中和一下。湯底加入冰塊十分冰涼，麵條彈滑，非常煙韌，上方放上雪梨、青瓜絲同半隻烚蛋，非常清爽。
依莉詩：「高質素嘅韓式料理」
尖東一帶有好多韓國食肆，不過真正韓國老闆主理嘅都係少數，而呢間主打正宗韓國料理十分難得。當中醬油蟹更加唔係度度有得食，隻隻爆醬超吸引，不過一叫就兩隻起，加上大部份食物份量都係 3-4人份量，所以要多幾個人一齊食比較好。至於價格其實都比較貴，不過如果想享受高質素韓式料理，呢間都係唔錯嘅選擇。
韓流村
地址： 尖沙咀漆咸道南 53 – 55 號嘉芙中心地庫
營業時間： 11:30am – 11:00pm (星期日至四)、11:30am – 12:00am (星期五、六及假期前夕)
電話： 3622 1854
